30 June 2012, Saturday
近期興起團購, 我嘅一班死黨亦唔執輸, 熱衷於呢個新玩意... 之但係... 此團購不同彼團購, 哈哈!!! 我地只係一齊上網買衫, 主攻日本嘅Nissen同韓國嘅Gmarket, 夾埋一個Order送貨, 慳運費之餘, 又唔使自己一個人一次過要買太多衫... 最正嘅係... 出o黎提貨時, 又有藉口食食食!!! 呵呵呵呵~
今次嘅搵食目標... 「港島香格里拉」High Tea!!! 網民口碑唔錯, 所以我對佢充滿期望~
尋晚11點掛起8號風球, 今朝起身第一時間睇天氣報告, 嘩!!! 落晒波?!! 有冇走得咁快呀?!! 太好啦, 尋日仲好擔心今日嘅「大食會」會被迫告吹... 好彩受到上天眷顧... 下午仲好鬼猛太陽添...
由於冇得訂位, 2點正開始入座, 先到先得, 所以我地要好準時去到... (最後都冇人準時, 但係我第一個去到, 嘻嘻)
首先講講, 全餐最最最差嘅... 係張枱!!!
事緣... 貓兄話Island Shangri-la個Lobby好Grand, 叫我地去到揀個好位... 我地到達時, 只得幾枱客, 大把位剩, 但係個職員居然帶我地去靠牆邊嘅小圓枱, 冇景之餘, 其他小圓枱只有2張櫈, 果張小圓枱比幅牆頂咗一邊, 仲要放3張櫈?!! 我望一眼張小圓枱, 都計到放唔到3人Afternoon Tea啦, 個職員日日係度返工, 冇可能唔知呀嘛?!!
我同個職員理論, 我個Point好簡單 -- 我地食High Tea, 呢張枱仔點放得落2 Sets High Tea架, 3杯飲品, 3套茶壺, 3隻碟, 3 Sets 餐具?!!
kenmerry 拉姑 發表在 痞客邦 留言(0) 人氣()
29 June 2012, Friday
星期五晚去食千両一定要早, 否則... 就好似今日咁, 遲咗少少去, 都要等100分鐘...
好耐冇去千両啦, 今次再去, 一睇... 咦... 先進咗喎!!! 有部Kiosk放係門口, 輕輕按吓個畫面, 就有飛出!!! 仲可以入埋電話號碼, 到咁上下時間就有人Call你返轉頭, 可以安心去行街街... 仲Show埋而家叫到幾多號派到幾多號, 唔使個職員答到口都乾...
有微型粘土嘅同學仔比咗張積分卡比我, 佢已經食咗9百幾蚊, 我只要食多3百蚊就可以做VIP, 多謝晒~
日式燉蛋 -- 每次去食壽司, 我都一定要食, 呢度唔算有蛋味, 但幾滑, 好多料...
牛蒡薄脆 -- 好油!!! 幾脆... 炸完冇晒牛蒡味, 試一次就夠...
kenmerry 拉姑 發表在 痞客邦 留言(2) 人氣()
28 June 2012, Thursday
平時去太子, 多數都係食「和民」, 朋友今次提議食「和民」隔離間「牛陣」, 話唔使排隊, 又平d...
牛肉Shabu Shabu午市套餐+野菜放題只係48蚊起, 限時60分鐘, 好抵食咁喎...
選好牛肉同湯底, 就可以去自助區拎食物... 醬汁都係自行調配... 不過冇晒豉油, 搵職員Refill都攪咗好耐...
任食配料選擇不多, 但係絕對可以食得好飽...
蔬菜選擇不少, 比起多肉少菜嘅午餐, 呢度可以食得好健康...
kenmerry 拉姑 發表在 痞客邦 留言(2) 人氣()
23 June 2012, Saturday
食完「住家菜」已經飽到上喉嚨掟, Honey竟然仲提議去試吓係北角好出名嘅王記糖水, 唔係呀嘛?!! 不過實在太吸引喇, 我個後備胃開始啟動~
嘩!!! 門口真係好多人排隊呀!!!
不過經我深入調查, 發現呢條龍只係買外賣, 鋪頭入面咁啱有2個面壁位, 唔使排隊, 直入!!!
呢度最出名嘅係陳腎蠔豉豬骨粥, 但係我地今晚嘅目標係糖水...
餐牌好簡單, 得12款糖水+陳腎蠔豉豬骨粥, 阿蟬強烈連環催促下, Order咗(大)蓮子桑寄生蛋茶同埋(大)(走花奶)香芋椰汁喳咋... 落完單先發現牆上面貼咗好多凍嘅甜品名, 激死~
(大)(走花奶)香芋椰汁喳咋變(細)(冇走花奶)香芋椰汁喳咋, 阿蟬, 我以為我聽唔明你講咩啫, 乜原來你都聽唔明我地講咩o架...
kenmerry 拉姑 發表在 痞客邦 留言(2) 人氣()
23 June 2012, Saturday
1月尾o黎「住家菜」食過1次, 覺得好味又抵食, 所以介紹屋企人今晚o黎試吓...
Book位時問職員拎套餐餐單睇定先, 點知... 原來剩係做冬同過年先會供應套餐!!! 平時係得散叫o架咋!!! 最後預訂咗「招牌阿嫲雞」同「南瓜排骨盅」...
Book 7:00pm, 職員話晚餐時段分開做6:30-8:30pm同埋8:30-10:30pm, 好強調8:30pm一定要還枱!!! 唉... 8:30pm又太夜, 6:30pm又太早, 最後迫住揀6:30pm, 好彩全部屋企人都神奇地6:30pm到達...
我6:00pm就到咗, 劃定晒餸, 好等大家一到埗檢視一下就即刻可以落單, 一人齊就有得食...
先o黎2煲住家老火湯, 最嘴刃嘅都讚個湯冇落味精, 好好味...
招牌阿嫲雞(1隻) -- 依然美味, 份量十足, 好快清晒...
kenmerry 拉姑 發表在 痞客邦 留言(2) 人氣()
9 June 2012, Saturday
上完「循道衛理教育中心」嘅包稯班, 一個人, 諗o黎諗去都諗唔到去邊度食, 最後決定去附近嘅「樂農」食...
前菜--好好味, 焗芋頭好腍, 焗紫薯同黃薯超甜, 仲有花生同粟米, 超健康!!!
金沙餃--蕃茄薯仔湯餃, 美味依然, 好滿足呀!!!
生磨合桃露--超濃郁呀!!! 好似有好多粒合桃係口入味跑o黎跑去咁!!! 仲有d合桃粒粒咬吓, 又係另一番滋味!!!
每次o黎都忍唔住狂買有機產品, 原來呢幾個月腰果糖都缺貨, 職員話要6月中之後就會返貨, 仲送咗2張書籤比我, 多謝~
kenmerry 拉姑 發表在 痞客邦 留言(0) 人氣()
6 June 2012, Wednesday
前排參加咗U Food係Facebook Fan Page嘅小遊戲, 嬴咗白蘭氏InnerShine升級版活顏馥莓飲, 今次係第一次玩Facebook Game可以嬴到禮物, 太爽啦, 呵呵呵呵~
但係太興嘅【原隻鮑魚元貝裹蒸粽】及【極上醬油金沙叉燒粽】特級套裝就冇我份喇, 好彩我自己報咗名學包稯啫, 端午節唔使食白果~
kenmerry 拉姑 發表在 痞客邦 留言(0) 人氣()
30 May 2012, Wednesday
星期日突然興起, 去試吓開咗張半年嘅「百瀧」~
12點鬆d到, 要等5張枱, 諗住好快, 居然排咗45分鐘, 暈~ 對面餐廳只係半滿, 呢邊已經要排隊, 高下立見~
好彩有卡位坐, 2個人都係比4人卡位, 超寬敞~
排隊其間, 昅到佢個會員招募計劃, 好似幾抵咁, 填完表Submit時先發現自己會錯意, 誤會咗2佰幾蚊嘅會籍送6佰幾蚊Coupon, 原來係冇嘅, 衰咗!!! 都拎晒會員卡係手, 唯有頂硬上喇, 之後食多d幫返條數囉~ 結果短短4日食咗3餐!!!
~ Day 1 ~
(左) 低溫鴨胸肉蕃茄汁意大利飯--需時20分鐘, 忌廉飯好好味, 鴨胸都OK~
(右) 傳統蕃茄香草薄餅--需時20分鐘, 用傳統火山岩o黎燒, 薄餅夠晒薄同脆, 但係欠缺柔軟同煙韌感, 蕃茄香草汁唔及我地係米蘭食嘅Pizza, 又係嘅, 米蘭喎, 唔可以咁唔公平嘅... 同香港嘅"Pizza黑"計, 佢當然好d啦, 起碼唔會油淋淋...
kenmerry 拉姑 發表在 痞客邦 留言(0) 人氣()
25 May 2012, Friday
今晚「為食五人幫」為KaKaMa賀壽, 終於由四人幫變返五人幫喇~ 鑽媽唔知係咪收監太耐, 居然一早就到咗!!! 人地Book 7:30pm, 佢6:50pm未夠已經到咗?!! 自己驚遲到走去Book 7:30pm嘅KaKaMa居然6:55pm都到埋?!! 搞到我地7:30pm準時到達嘅好似大遲到咁, 慘~
正所謂「越遲越見鬼」!!! 門口帶位嘅女服務員居然話冇我地Booking, 仲耍我地去同一集團隔幾個鋪位嘅「牛陣」~ 我地轉身企係門口Check返Whatsapp嘅Record, 明明係呢間, 再拎返轉頭, 嘩!!! 點解帶位度排晒長龍o架!!! 唔理得咁多喇, 如果再排過, 以佢頭先嘅速度, 起碼要等多10分鐘!!! 我走埋去排第一嘅女士身邊同佢講"唔好意思, 我地頭先排過o架"!!! 佢喵一喵我, 冇出聲, 即係比我打尖啦, 好彩啫!!! 今次輪到經理出o黎帶位, 我投訴佢女同事頭先亂點我地話冇Booking, 經理問我地Booking用咩電話, 講完即刻Check到, 頭先個女職員真係離晒譜...
未坐低, 已經見到好大客海膽放咗係枱面... KaKaMa好強調讚媽今晚好豪, 380蚊1客海膽都叫, 380蚊1客海膽喎... (Repeat咗好多次, 哈哈哈)
我話380蚊1客海膽有幾豪啫, 係要豪嘅, 就開支Sake添啦!!! 鑽媽竟然讚同... 佢真係收監收得太耐, 哈哈哈~ 頭先KaKaMa先投訴鑽媽唔比佢叫o野飲, 而家開Sake又話好?!! 咩道理呀?!! 最後我地都係Order飲品, 冇開Sake, 因為大家都唔係好酒之徒~
北海道海膽刺身--好欣賞佢個Presentation, 紫菜垂直插係個壺仔度, 仲用白蘿蔔批咗個風車出o黎, 好有創意, 仲好靚!!! 個個都讚d海膽新鮮, 貓兄慫恿我搵粒最細嘅試吓... 的確係一d都唔腥, 不過有D苦, 嗯, 唔鐘意!!! 即刻飲茶沖走d味~
貓兄即時提起上次係築地市場, 我用海膽壽司換佢舊甜蛋壽司, 佢勁抵!!! 不過我都覺得自己好抵, 因為我鐘意食甜蛋, 哈哈哈...
KaKaMa份人好鬼均真, 居然話使唔使分開計數, 唔使我夾海膽錢... 唏!!! 咪鬼咁肉酸啦, 大家出得o黎食飯, 緊係跟人頭計o架啦, 邊有可能計得咁足喎~
好記得十幾年前出差, 人生路不熟, 係品川叫咗客5000Yen得8粒嘅壽司盛合, 我挑走d海膽, 剩係食粒白飯同紫菜, 睇到坐隔離嘅日本人眼都突埋, 拍吓我手臂問我"Are you come from Hong Kong???", 哈哈哈... 咁唔識食, 唔知咁樣算唔算係影衰香港人呢?!!
kenmerry 拉姑 發表在 痞客邦 留言(6) 人氣()
25 May 2012, Friday
今晚「為食五人幫」去尖沙咀為KaKaMa祝壽, 貓兄咁啱得到1張Tuttimelon嘅40蚊Coupon, 約埋我開餐前一齊去The One嘆Frozen Yogurt~
Tuttimelon係自助形式, 自己擠Frozen Yogurt, 自己落配料, 再拎去收銀處磅重比錢, 好特別~
每部乳酪機上面都有好清楚嘅指示, 味道、酸度、甜度、乳脂度、最佳配料, 全部一目了然~
離開乳酪區, 就到配料區... 好多配料呀, 樣樣都想食, 點揀好呀~
離開配料區, 就到收費區~ 用咗張40蚊Coupon, 承為$6.5吖~ 嘩!!! 好抵呀!!! 多謝比Coupon貓兄嘅朋友呀, 亦都多謝貓兄嘅邀請~
kenmerry 拉姑 發表在 痞客邦 留言(4) 人氣()
23 May 2012, Wednesday
太古坊鴻星12:00前埋單嘅早茶抵食又好食, 特價得o黎唔會將貨就價, 食物質數與正價時段無異, 所以我同Honey經常都會去幫襯... 不過唔知係咪撞正員工用膳時間, 只得3-4個人做o野, 服務接近「零」, 經常都食得幾勞氣, 唔係因為地點方便價錢OK食物又OK, 真係唔會去受氣囉~
今日去到, 如常冇人帶位, 如常自己行入去, 如常服務員見到你都扮見唔到, 如常自己搵位, 如常坐低都係當睇你唔到... 唔想勞氣?!! 唯有自己行去收銀處度拎點心紙, 順便叫佢開埋茶, 跟住就有個「哭喪著臉」嘅阿姐走埋o黎開茶...
如果你有報紙係手, 飲完茶會比d阿姐拎去賣嘅話, 咁就唔同講法喇!!! 你埋咗單起身鬆人阿姐都會企定定同你雞啄唔斷十幾分鐘, 就算其他茶客問佢拎點心紙佢都會視若無睹, 眼中只有你~
如果你係單身中年男士, 睇落生活悠遊, 女部長都會企定定同你雞啄唔斷十幾分鐘, 就算其他茶客三番四次問佢拎點心紙佢都會視若無睹, 眼中只有你~
我地呢d「N無人士」... 嘿~ 今日見到坐輪椅嘅婆婆同我地遭遇一樣, 佢個工人仲企咗十幾分鐘先搵到人Serve佢地~
眼見鴻星近期玩Gimmick推出「三國宴」, 仲出埋「點心篇」, 所以我地都湊吓熱鬧, 點o黎試吓~
桃園三結義--劉備、關羽、張飛被一"籠"打盡?!! 白臉劉備係奶皇包, 紅面關羽係紅豆包, 黑面張飛係芝麻包, 件件都咁好味, 仲好Kawaii呀~
kenmerry 拉姑 發表在 痞客邦 留言(4) 人氣()
22 May 2012, Tuesday
有次路過呢間餐廳, 見佢Lunch Hour大排長龍, 唔通好好食嘅?!! 今日去開北角做o野, 終於有機會去試試啦~
我12點去到, 可以直入, 2個人坐4人枱, 唔使搭枱真好~
餐廳以柔和簡潔為主, 座位都幾寬敞舒適~
睇睇餐牌, 定食&餐飲嘅選擇同食開嘅「和民」有9成相同, 但明顯「和亭」嘅價錢平「和民」少少...
我地Order咗炸豬扒咖哩定食同埋壽司定食, 因為「和民」冇呢2個午市定食~
落單後, 隔離枱換咗1轉客, 我地d食物同飲品居然去晒佢地張枱, 好彩佢地Order嘅食物同飲品完全唔同, 我唯有極速同服務員講, 果d食物同飲品係我地o架~ 我驚唔叫住佢, 我嘅午餐唔知要遊幾多個花園之後先回投入我嘅懷抱~
跟餐沙律--同「和民」一樣, 唔係太新鮮, 但可以接受~
kenmerry 拉姑 發表在 痞客邦 留言(0) 人氣()
5 May 2012, Saturday
尋日先落機, 個人仲Jet Lag緊暈吓暈吓, 今日都未瞓番夠本, 就要起身趕去尖沙咀出席U Food U Beauty U Travel x 皇家太平洋酒店 の 母親節精選甜品製作班 + 「春日‧盛燕」下午茶自助餐試食會!!!
整完蛋糕, 就可以開始試食環節啦, Yeah!!!
先介紹吓今日嘅Tasting Highlights先... 係咪好豐富呢~
. 迷你牛肉漢堡
. 雞茸燕窩粥
. 章魚燒餅
. 迷你綠茶燕窩卷
. 焦糖燕窩燉蛋
. 燕窩芒果布甸
. 燕窩蛋撻
. 燕窩濃情流心蛋糕
kenmerry 拉姑 發表在 痞客邦 留言(4) 人氣()
19 April 2012, Thursday
一個月前出席咗人生第一次嘅「星級試食會」, 都仲未興奮完, 估唔到咁快又有得食, 好開心呀!!!
今晚嘅主題係「 沙嗲軒 – 星馬滋味遊」!!! 係呢度先多謝U Food嘅誠意邀請, 同埋皇家太平洋酒店嘅細意款待~ Thank you so much~
雖然全日都落勁大雨, 但係無阻我對食嘅熱誠~ (哈哈哈, 扮咩呀, 為食就為食啦)
餐廳分開2個區域, 1個係室內, 1個係室外, 如果同Honey o黎, 我會揀室外, 可以一邊吹吓海風, 一邊欣賞維港美景, 好浪漫呀~ 服務員嘅制服都好星馬Feel, 望住佢地覺得自己好似去咗Resort渡緊假咁呀, Relax到暈...
早咗15分鐘到, 未人齊, 叫杯飲品飲吓先... 見到其他星級食家飲緊椰青, 我都好想飲呀)))))) 可惜就快要飛, 都係飲熱o野安全d...
熱薏米水--好好飲呀, Unexpected, 煲得好溶, 唔太甜, 好有薏米味, Good Good!!! 薏米仲勁多, 煲得又腍, 我狂食囉, 估唔到Refill壺仔入面都係勁多薏米, 如果唔係要留肚食美食, 我一定會再Encore多一杯囉, 最起碼... (我見有星級食家飲咗最少4杯呀)
kenmerry 拉姑 發表在 痞客邦 留言(4) 人氣()
30 March 2012, Friday
貓兄吹雞開餐, 為食四人幫(已經由5人變成4人)定必二話不說飛身撲出啦!!! 呵呵... 今次鎖定嘅目標係... 龍媽未食過嘅PizzaExpress...
貓兄事前係某開飯網站試吓網上訂位功能, 見到呢晚餐廳Full咗, 大家正煩惱緊轉去邊樹食之際, 我死唔信邪咁打去餐廳試吓Book位... Oh... 比我Book到喎!!! 不過Book 7:15pm就要8:45pm還枱, 得個半鐘真係唔多夠喉!!! 想轉地步但又懶... 算啦, 食咗先, 到時再轉場食甜品囉...
因為要好早還枱比人, 所以我特別提醒大家要準時到, 攪到大家都好大壓力... 嘩咔咔咔...
幾年前同KaKaMa同貓兄食過亞士厘道分店, 印象好差, 又嘈又迫又唔好味... 海運呢間分店開咗半年鬆d, 間鋪大好多d位又多好多, 仲可以一邊食飯一邊欣賞維港夜景, 咁仲使唸嘅, 緊係過o黎海運呢邊食啦!!!
龍媽未到, 我地好抵死咁不定Whatsapp佢, 將揀o野食嘅討論全部放上Whatsapp, 最尾一句係"你可以揀自己杯o野食", 嘩咔咔咔...
討論期間, 我口快快咁話叫個6人餐, 不過比大家Band咗... 查實我係有先見之明, 知大家叫4人餐食唔飽, 結果真係... 大家都話未試過食完咁多o野, 竟然仲咁唔飽...
kenmerry 拉姑 發表在 痞客邦 留言(2) 人氣()
18 March 2012, Sunday
一個月前初會「譚魚頭」, 對佢讚不絕口!!! 可惜, 此情不再!!!
話說, 較早前收到通函郵寄, 去譚魚頭食o野有9折!!! 當時冇為意"正價食品"呢4隻字, 不過呢個都唔係最重點...
干煸湯丸--落單半個鐘先有得食!!! 黑芝麻湯圓, 伴埋D辣椒蔥粒肉鬆一齊炒, 好惹味, 叫碗白飯撈D辣椒蔥粒肉鬆一齊食仲正!!!
拔絲咕嚕肉--等多半個鐘先出第2道菜, 已經冇心情影相!!! 碟餸一上枱, 只係用目測都已經覺得唔同咗, 2月尾食時係睇得出咕嚕汁d拔絲, 今次只係一Pat糊!!! 一放入口, 嘩, 喪酸, 同之前嘅酸甜適中差天共地!!! 仲要大部分都係肥豬肉, 有2舊仲係純炸粉漿, 好辛苦咁食咗半碟, 已經唔想再食!!!
埋單走人!!!
平時唔多睇單嘅我, 諗住睇吓係咪比咗9折, 點知... 點菜總數係$214, 折扣唔係$21.4, 竟然係$11!!! 真係點睇都唔知果$11點計出o黎, 問吓個黑衫, 佢唔知係怕我嘈到其他客聽到, 定係趕住比第2枱客入o黎, 所以隊咗我出去收銀處~
kenmerry 拉姑 發表在 痞客邦 留言(3) 人氣()
22 March 2012, Thursday
今晚有幸獲邀出席U Food x 皇家太平洋酒店 柏景餐廳 「味遊．法式饗宴」自助晚餐 の 星級試食會, 真係超級興奮!!! 我都係第一次出席呢類型嘅活動咋, 我終於升LEV啦啦啦啦!!! 今晚有12個星級食家出席, 睇o黎好似得我1個係新丁, 好緊張呀!!!
準時到達, 仲未人齊, 等我出去Buffet枱影吓相先...
翻新後第一次o黎, 真係有WoW一聲嘅感覺!!! 同以前完全唔同晒!!! 開放式大廚房, 簡潔明亮嘅環境, 寬闊嘅通道, 行得好舒服, 舒服到唔想返埋位, 哈哈哈哈...
開餐前行政總廚袁錦坤師傅從廚房出o黎同大家打個招呼, 仲同我地一班UFood星級星家影大合照!!! 好興奮呀!!! 第一次有機會同酒店嘅行政總廚影合照咋!!! 好開心呀, 嘻嘻...
擁有28年入廚經驗嘅行政總廚袁錦坤師傅, 為我地準備嘅法式海鮮拼盤!!! WoW... 好靚呀!!! 我覺得藍貝青口最好味, 好濃嘅青口味!!! 青口同雪花蟹腳都好鮮甜!!! 瀨尿蝦同蟹腳遮住咗嘅大頭蝦都OK...
好, 今晚嘅戲肉開始啦!!! 等我介紹吓今晚嘅Tasting Menu先啦!!! 去片!!!
kenmerry 拉姑 發表在 痞客邦 留言(0) 人氣()
15 March 2012, Thursday
同早兄嘆完「松記糖水」, 就慢慢散步去「Antipasto」...
今日天氣都幾清涼, 18度左右, 餐廳嘅落地玻璃摺門打開晒, 感覺好歐陸Feel, 好舒服, 一D都唔焗促...
枱上除咗有Candle Light Dinner必備嘅Candle, 仲有意大利菜必備嘅橄欖油同黑醋, 紅酒係裝飾o架咋, 唔好亂咁拎o黎飲呀, 要收錢o架!!! 最讚係... 有2支新鮮玫瑰花, 一紅一白, 好浪漫呀!!!
餐前麵包 (Free) -- 點橄欖油同黑醋食, Yummy!!! 如果係暖嘅就更加Perfect...
Lime Soda 青檸梳打 ($30) -- 餐廳係冇免費茶水供應, 與其7十幾8十蚊Share 1支750ml嘅礦泉水o黎飲, 不如叫3杯Soft Drinks仲化算, 計落差唔多價錢咋嘛... 除咗青檸梳打, 我地仲Order咗可樂同凍檸茶...
Antipasto Misto 雜錦意大利拼盆 ($109) -- 個碟超大, 放咗佢張枱已經冇晒位... 你地睇吓碟邊隻叉就知, 隻叉唔係甜品叉, 而係最大Size果種... 睇真D... WoW... 好多款頭盤呀!!! 一次過最少滿足你5個願望呀!!! 大家唔使心急, 等我介紹吓先... 咳... 有釀焗燈籠椒、巴馬火腿、煙三文魚、莎樂美腸、什錦橄欖... 沙律菜入面居然仲有白蘆筍(Asparagus)添?!!!
釀焗燈籠椒--好甜呀D燈籠椒, 釀焗咗之後就軟熟咗同Juicy咗, 好好味...
巴馬火腿--都唔錯喎... 最鐘意佢呢隻豬唔係太多肥膏...
煙三文魚--好味呀, 好肥美呀...
kenmerry 拉姑 發表在 痞客邦 留言(0) 人氣()
15 March 2012, Thursday
早輪同朋友去「得龍大飯店」食晚飯, 朋友講起佢嘅食經, 滔滔不絕... 之後佢提到食甜品一定要去銅鑼灣嘅松記, 搞到我成日心思思想試吓... 同其他朋友提起時, 人人一聽個名都MARK大晒個口咁話, "我知, 幾時都好多人排隊果間吖嘛!!! 冇可能排到o架喎!!!"... 搞到我都脅脅地...
今晚拉力早難得有飯局, 呢餐基本上係補祝番聖誕節+團年飯... 冇計... 鬼叫大家都咁忙咩...
我向早兄提起松記糖水, 佢一聽就問係咪源自元朗果間... 吓?!! 我唔知喎!!! 跟手上網做吓Research, 原來真係!!! 咁你都知... 勁!!!
我地為免要排餐死, 所以決定今晚食咗糖水先食飯, 嘩咔咔咔!!!
幻彩明珠--人人都好似係為咗呢個招牌菜而去咁, 所以我都唔執輸, 試吓先... 落單時有問我走唔走花奶... 嗯... 走吖, 唔該!!! 一見真身, 嘩, 材料真係超級多款, 有西瓜、蜜瓜、哈密瓜、大西米、黑珍珠、涼粉... 霎時間真係無從入手!!! 最後都係由面食起... 大西米撈芒果汁真係最佳組合, 好味!!! 生果唔夠甜, 黑珍珠同涼粉都唔錯, 整體都好MATCH...
雪糕明珠--早兄明明揀芒果味雪糕o架?!! 同埋自選雪糕明明只係得曲奇、朱古力、芝麻、芒果、紅豆, 點解變咗雲呢拿嘅?!! 睇真D... 哦, 原來係落咗花奶, 嚇死!!! 早兄話都幾好食, 不過冇話好似D人講到咁驚喜囉... 可能因為我地由細到大食慣B仔涼粉, 廿幾年前已經成日食呢類型嘅甜品o架啦...
kenmerry 拉姑 發表在 痞客邦 留言(2) 人氣()
台灣分區飲食 (35)