Ken & Merry 為食男女，遊走世界!!!

14 February 2013, Thursday

近年來情人節都已經轉咗食中餐, 因為唔使同人迫又唔使被迫食貴夾唔飽的套餐...

舊年開始試吓玩煮飯仔, 自己係屋企煮, 不過係煮中餐, 同埋入廚冇耐, 唔多見得人, 哈哈... (雖然而家都仲係地獄廚神)

膽粗粗今朝先上網搵食譜, 幸好有好多好心人, 無私地將畢生絕學Share上網, 將我地一眾地獄廚神從絕望的深淵拯救出o黎, 居然又比我過到骨喎, 呵呵呵呵... 總算一切順利, 係有少少阻滯咁囉... (話說... 買唔到露筍之餘, 仲要買好晒餸上咗小巴Do埋八達通, 小巴站前面撞車, 單程路, 塞死晒, 等咗好耐2幫司機都好似仲鬧緊交, 乘客開始走人, 我唯有孭住2袋餸徒步回家, 年初三行完山對腳仲酸軟緊嘅呢)

o黎, 大家睇睇今晚個餐牌啱唔啱食先...

DaDa... DIY「無題」情人節浪漫燭光「四道菜」晚餐 ♪(*^^)o∀*∀o(^^*)♪

餐飲: 日本山形縣葡萄果汁
頭盤: 香草蕃茄水牛芝士青橄欖, 黑醋
主菜: 澳洲和牛西冷伴新薯, 日式燒汁
主菜: 露筍醃火腿意粉, 新鮮羅勒醬
甜品: 布朗尼伴香檳士多啤梨雪糕
餐茶: 蜜桃芒果蜂蜜紅茶

先睇睇今日買咗咩餸先... 當收銀阿姐同我講幾錢時, 真係打個突, 拍得住同出街食一樣咁貴!!! OMG...

26 October 2011, Wednesday

今晚放工去吉豬島睇吓有咩生果好買... 咦... 點解生果櫃擺咗D迷你冬瓜係度嘅?!! 打晒BOW呔帶晒皇冠咁, 使唔使咁KAWAII呀?!!

睇真D... 哦... 原來係新鮮羅漢果o黎o架!!!

仲有張POSTER教大家點煲羅漢果薑茶, 好似幾好咁喎, 呢幾日翻風, 可以滋潤吓DRY到爆嘅喉嚨...

1盒有4個, 可以分4次煲...


1個羅漢果解體, 幾片薑, 2公升水, 煲20分鐘, 熄火再焗20分鐘, 飲得!!! SO EASY!!! 我貪心, 仲落埋桂圓, 呵呵~

1人1杯, CHEERS~

12 September 2011, Monday

「自煮中秋」2人套餐
頭盤 : 煎鵝肝配蘋果片伴蜜糖黑醋汁
主菜 : 煎牛扒配露筍新薯伴黑椒汁
甜品 : 8星伴月

活咗幾十年, 今日係我人生第一次係中秋節親自下廚!!! 之前幾十年都係有人煮好晒等我返去食, 今年居然破天荒提早做節... 正日出街食, 肯定又多人又貴又趕又唔好味, 所以決定買餸返屋企自己煮...

呢鑵鵝肝係舊年去東歐旅行時買嘅, 再唔食就會過期, 一直擇唔到吉日開封, 今日終於有籍口開啦...

~ 呢HEA制作實錄 ~

先煎香蘋果片至金黃色... 然後煎鵝肝至金黃色... 再煮埋個黑醋汁加蜜糖...

28 July 2011, Thursday

自從開咗學之後, 都冇時間再入廚, 今日決定繼續我嘅學廚之路!!!

之前係蘇施黃個Blog (soszewongrecipe.blogspot.com) 見到炒玉米粒嘅食譜, 所以試下... 不過我將豬肉變咗豆乾, 同埋加咗XO醬, 第一次試煮都OK吖, 只係材料太多, 令到XO醬嘅味唔多出, 不過起碼食得落唔使倒呀, 哈哈...

再加埋已經煮到好熟手嘅豉汁蒸排骨, 咁又一餐喇, 下一次一定可以煮得更好嘅~

3 July 2011, Sunday

尋日去開尖沙咀, 走咗去永安行咗陣, 忍唔住手買咗樽「新東陽黑豬肉鬆」...

今日即刻身痕煲D白粥o黎撈豬肉鬆食... 跟住又膽粗粗買D豆角炒o黎送粥... 之後先發現網上D食譜係冇"齋"炒豆角... 頭痛咗一陣, 醒起有2條人地比嘅臘腸係冰櫃, 決定試吓用臘腸代替免治豬肉...

個食譜冇列明調味料嘅分量, 結果係我亂咁落嘅情況下, 味道竟然OK過之前跟足食譜調味料分量嘅作品, 不過D味太濃, 下次再整時要輕手D先得啦~

D臘腸比我起晒D肥膏先切粒, 雖然明知都仲好肥, 但係食果時真係食得興奮好多, 懶係冇咁肥咁... 自己呃自己, 哈哈...

23 June 2011, Thursday

已經2個月冇試新o野... 今日一試... 又出事!!!!!!

南乳雞翼--煎緊果陣, 見個鑊底迅速燶晒, 好驚個新鑊就咁就報銷, 落完一次油又一次油, 總共落咗3次... 之後D油好似走番晒出o黎咁, 唯有夾起D雞翼, 倒咗D油, 摌走D鑊燶, 落調味汁烚熟D雞翼... 不過最後都仲未熟晒, 要拎去叮1分鐘先食得...
係就係煮得'呢Hea'咗D, 不過味道都OK喎, 起碼都食到南乳味, 哈哈~

涼瓜煎蛋--點解... 我D蛋... 咁碎嘅??? 係咪因為我落得太小油呀??? D蛋黐晒鑊底呀!!! 同埋, 落蛋汁時係咪要放係中間唔好推佢o架??? 我真係唔知點先可以煎到一個蛋餅嘅型狀呀!!! SOS...

切苦瓜時, 見到入面血淋淋嘅顏色, 嚇到傻!!! 即時狂Call大姊, 電話一通我就叫"救命呀!!!"... 哈哈, 唔知有冇嚇死佢呢... 哦... 原來D苦瓜太熟D籽就會變紅色... (果然係大鄉里入廚, 少見多怪)

大熱天時煮飯真係勁過焗桑拿, D汗BaBa聲咁標出o黎, 又冇冷氣, 又冇風扇, 仲要唔行得開, 真係辛苦過做Gym!!!

19 June 2011, Sunday

頭先洗菜發現咗一團黑色嘅泥, 好似平時咁搵水沖走佢, 佢會郁o架!!!!!! 之後就係個碗盆度現身... 卷吓卷吓... 吸血蟲(水蛭)呀!!!!!!

勁驚!!!!!! 全身都覺得好痕!!!!!!

開行水喉沖佢走, 佢吸實個碗盆, 沖咗好耐先沖得走!!!

之後即刻帶番對洗碗手套, 繼續洗菜, 今次開到D水行一行... 隱隱約約好似都仲有一團差唔多嘅o野出現, 不過D水力太勁, 瞬間已經沖走咗...

請問各位高廚, 究竟...... D唐生菜... 有吸血蟲(水蛭)... 係咪好平常呢?????? 如果係, 我以後都唔敢買菜啦!!!

我而家仲驚緊呀!!!!!! 唔該幫幫手, 解答吓我呢個入廚新手...

18 June 2011, Saturday

之前做足資料搜集, 仲去吉豬島巡視過幾次, 已經扑槌決定一等到感謝日就即刻買特福32cm不鏽鋼3層平底炒鑊... 其實當時32cm都已經嫌大, 之但係果隻最啱心水之餘, 價錢又最平...

到咗18號, 吉豬島忽然感謝日, LaLa聲跑去吉豬島, 又見到Buffalo特賣場... 走咗入去... 發現咗呢個不鏽鋼5層平底炒鑊... 原價嘅3分1價錢, 吉豬島再有9折, 仲送不鏽鋼清潔劑... 只係貴特福少少, 太太太抵啦!!! 迷迷糊糊就買咗...

返到屋企先開始後悔... 36cm對我呢個新手o黎講, 實在太大... 仲要返到屋企先發現... 唔係平底... Oh No!!!!!! 我究竟當時點解會無啦啦買咗呢個鑊o架???

唉... 唔錯都錯咗... 唯有努力D用多D呢個鑊啦!!!

今次真係好大鑊!!!

17 May 2011, Tuesday

以前去開吉豬島見親D醃好晒嘅羊扒都好有衝動想買o黎整下, 可惜零入廚經驗每每令我卻步, 日本311地震震傻咗我之後, 開始學人玩煮飯仔, 今日竟然膽粗粗買咗兩塊羊扒番屋企, 仲要係未醃嘅?!! (今日冇醃好果D)

返到屋企先開始知驚... 拿拿聲上網搵食譜... 咦... D BLOG友話煎羊扒只要塊羊扒新鮮就點整都好食... 真唔真呀...

結果係... 真o架!!! 各位, 個賣相得唔得先???

我用香草+黑椒+鹽醃咗D羊扒一陣再煎, D配菜就用蒜蓉炒香, 味道都真係幾OK... 起碼好味過D大XX快餐囉, 呵呵呵呵...

5 May 2011, Thursday

繼尋日小試牛刀獲得小小嘅成功(雖然稱唔上好食, 起碼唔使掉晒落垃圾桶, 搞到要落街食)之後, 今日再接再厲...

今朝搵咗兩款家常菜食譜... 蕃茄炒蛋同埋蜜糖煎雞扒, 不過係JUSCO買唔到雞扒, 所以轉咗做雞柳...

蕃茄炒蛋--嘻嘻... 發生咗幾樣技術錯誤, 下一次再整應該會好好多...

蜜糖煎雞柳--味道都OK, 不過雞柳比較乾鞋, 用番雞扒應該會好D...

經過尋日硬飯一伇, 今日個蒸白飯已經達到"電飯煲"水平, GOOD!!!

連煮兩日, 聽日都係時候抖一抖, 出街食下好野~

4 May 2011, Wednesday

好耐之前去 「中意仿 Borgo C」食過黑醋蕃茄茄子, 好好味, 一直想試下自己整, 經過唔知幾多年之後, 忽然的起心肝上網搵食譜, 竟然都比我搵到, 好o野!!!

早2日整過一次, 今日再整就正常好多, 但係可以更更更好... 始終... 廚藝都係需要經過日子嘅磨練先可以成功嘅...

豉汁蒸排骨呢D家家戶戶都食到嫌嘅家常菜, 都我o黎講都係一個需要勇氣去跨過嘅山峰... 今日... 輕易成功, 好好味, YEAH!!!

呢個蒸白飯剩係睇樣都覺得硬, 同埋份量預錯咗, 蒸完得好小, 比人睇到唔知嘅話可能以為我地經濟方面出現問題添, 哈哈...

今日踏出咗人生重要嘅一步, 希望我D熱度唔好又維持得3分鐘咁小啦~

P.S. 極需要添置一大堆煮食用具, 一學人煮飯竟發現個廚房D用具好唔掂, 要咩冇咩!!!

4 May 2011, Wednesday

眼見HONEY越黎越廋, 令我下定決心加入「煮」婦行列... 不過... 都要先解決廚房冇位擺飯煲呢個問題先...

近日係網上發現到一D"唔用飯煲都煮到白飯"嘅食譜, 好, 等我試下先...

真係得喎!!!

不過係硬小小囉, 下次要加多D水先得~

9 November 2010, Tuesday

秋風起, 好乾燥, 要好好滋潤一下...

前排係IPAD睇咗D食譜, 呢一味「雪耳蓮子百合圓肉茶」, 無論材料同做法都係最簡單, 我家個廚房1年都係開得幾次爐, 就為佢開一開啦...

係咪睇見都想食呢...

材料：
雪耳、蓮子、百合、去核紅棗 各1兩
圓肉 半兩
冰糖 2兩

做法：
雪耳洗淨, 以清水浸發。蓮子、百合、圓肉、紅棗洗淨。
將所有材料放入沸水中, 以中慢火煲1小時, 即可享用。

8 August 2010, Sunday

上次跟Honey去數碼港食過, 今日膽粗粗試下整... 結果都有D苦, 下次會試做"煮熟版"...

材料

苦瓜1條, 梅子粉5茶匙, 白醋1茶匙

做法

苦瓜洗淨，開邊去瓤切片, 放2茶匙鹽刷下D苦瓜, 醃10分鐘...

沖洗苦瓜鹽份, 放入大盤清水內浸45分鐘...

撈起苦瓜, 瀝乾水份...

準備醃汁... 1杯水+白醋+梅子粉攪勻...

苦瓜加入醃汁, 放入雪櫃雪三小時即可!!!