close
19 April 2012, Thursday

一個月前出席咗人生第一次嘅「星級試食會」, 都仲未興奮完, 估唔到咁快又有得食, 好開心呀!!!

今晚嘅主題係「 沙嗲軒 – 星馬滋味遊」!!! 係呢度先多謝U Food嘅誠意邀請, 同埋皇家太平洋酒店嘅細意款待~ Thank you so much~


雖然全日都落勁大雨, 但係無阻我對食嘅熱誠~ (哈哈哈, 扮咩呀, 為食就為食啦)

餐廳分開2個區域, 1個係室內, 1個係室外, 如果同Honey o黎, 我會揀室外, 可以一邊吹吓海風, 一邊欣賞維港美景, 好浪漫呀~ 服務員嘅制服都好星馬Feel, 望住佢地覺得自己好似去咗Resort渡緊假咁呀, Relax到暈...

早咗15分鐘到, 未人齊, 叫杯飲品飲吓先... 見到其他星級食家飲緊椰青, 我都好想飲呀)))))) 可惜就快要飛, 都係飲熱o野安全d...

熱薏米水--好好飲呀, Unexpected, 煲得好溶, 唔太甜, 好有薏米味, Good Good!!! 薏米仲勁多, 煲得又腍, 我狂食囉, 估唔到Refill壺仔入面都係勁多薏米, 如果唔係要留肚食美食, 我一定會再Encore多一杯囉, 最起碼... (我見有星級食家飲咗最少4杯呀) 


開飯前, 皇家太平洋酒店行政總廚袁錦坤師傅同埋負責沙嗲軒嘅大廚先同大家打個招呼先, 之後大廚就講解吓今晚嘅Tasting Highlights... 跟住大廚就同一眾星級食家影番張大合照... 嘻嘻... 又有得同大廚影相, 最愛環節~

開餐啦!!! 好o野!!!

酒店真係好細心囉, 食物上枱時已經分好晒一份份, 方便大家進食... 但又顧及到大家想影張靚相, 所以Set咗一張枱, 擺咗一份Sample比大家狂影...

肉骨茶 Bak Kut Teh [廚師推介] -- 嘩!!! 上枱已經聞到好勁當歸味, 見到配料有當歸、南棗、杞子、唐排, 足料到呢... 個湯真係好得, 材料有中藥同香料, 用秘方煮o架!!! 顏色雖然好深, 但係一D都唔混濁, 一入口, 好似將成條當歸放入口咁, 好甘香, 但係又唔苦澀, 正呀!!! (我見有星級食家連個Sample都飲埋呀)


肉骨茶嘅配菜--油炸"檜"!!! 鐘意香口嘅朋友可以將佢撈埋肉骨茶一齊食, 都幾好味o架~


牛、豬、雞沙嗲 [廚師推介] -- 呢份係Double Portion, 串燒燒得啱啱好!!! 香口, 肉嫩, 少少焦, 好味!!! 比起舊年10月係間米豬連印尼餐廳食過嘅串燒焦炭, 呢度真係好食多多聲!!! 要選出全碟最好味嘅一樣嘅話, 我會揀... 菠蘿!!! 見到其他星級食家勁夾d菠蘿o黎食, 我都唔執輸, 夾一舊o黎食吓, 嘩嘩嘩... 超超超超超香甜呀!!! 大廚, 請問... 可唔可以上一碟淨菠蘿呀, Arhahaha...

家鄉福建薄餅 Hokkien Pohpia -- 吓?!! 薄餅?!! 我覺得似春捲多d囉... 薄薄嘅外皮, 包住香葉、蝦、豬肉、花生、瓜、粉絲、蛋花, 好香口, 口感豐富, 好味!!! 食完濃味嘅串燒再食呢個, 可以清一清味蕾, 讚!!! 加上今日又熱又濕, 食完呢度菜感覺好清新, 可以驅走悶氣...

星洲蘿蔔糕 Fried Carrot Cake [廚師推介] -- 又一超讚菜式!!! 蝦炒得好香, 個醬好惹味, 蘿蔔糕比較腍身, 可能有人會嫌太腍冇口感, 但係我偏偏最鐘意, 因為最憎出面d蘿蔔糕一食落口硬骨骨, 成口粉一d蘿蔔味都冇...

福建蝦湯麵 Hokkien Prawn Mee -- 越南虎蝦好大隻好結實呀!!! 蛋麵我都好鐘意, 有d似車仔麵嘅油麵, 都幾彈牙!!! 蝦湯超得, 我成碗飲晒!!! 湯底好清一d都唔深色, 出奇地蝦味好香濃, 聽大廚講, 湯底係用越南虎蝦殼、上骨、燒骨熬2小時以上, 唔怪得咁好飲啦!!! 以前試過2次蝦湯都有Bad Memories, 第1次餐廳A, 碗蝦湯超深色, 入口無味, 清水咁, 我成碗o野都冇食就鬆人, 唔想食到成肚色素... 第2次餐廳B, 嘩, d蝦湯苦嘅, 又係全碗唔食就鬆人...

焗胡椒蟹 Pepper Crab -- 嘩, 好大隻呀!!! 隻蟹個樣好似"查"完黑椒太陽油再帶頂草帽嘅大隻佬咁, 好搞o野~ 食落好重黑椒味, 香而不辣, Very Nice!!! 隻蟹又多肉又結實又夠晒新鮮, I Love It!!!


星洲辣椒蝦 Chili Prawns -- 仲以為係辣, 點知一D都唔辣, 睇落似蕃茄炒蛋, 味道都幾好, 我仲覺得有D甜甜地, 好特別... 隻蝦好大隻好結實~

沙嗲軒海南雞飯 Hainanese Chicken Rice [廚師推介] -- 大廚話佢地嘅海南雞飯係選用三黃雞, 肉嫩皮薄, 厚豉油就響星加坡訂番o黎... 果d食雞食慣血淋淋嘅朋友可能會覺得佢唔夠滑嫩, 但係我就覺得佢火喉掌握得恰到好處, d雞肉唔見血得o黎又唔鞋, 啱晒我口味!!! 點厚豉油食真係幾夾, 我就最鐘意點酸甜醬, 之但係佢個薑蓉都好OK喎... 仲有食海南雞飯一定唔少得嘅雞油飯, 大廚話除咗用雞油爆香d蒜蓉再落米之外, 仲會落班蘭葉同香茅... 嘩, 落咁多香料, 唔怪得碗雞油飯咁香啦~

蒜蓉咸魚炒芥蘭 Fried Kale w/ salty fish and garlic -- 呢個菜係大家KO晒Tasting Hightlights之後, 餐廳方面問大家仲有d咩想試, 有食家提議想要d菜... 食落有好強勁嘅香蒜味, 咸魚都好香, 好味!!! 之但係... 點解d芥蘭得d梗, 冇葉嘅呢?!! 唔通星馬果邊興咁食法?!!

我見到Tasting Menu印住紅豆冰, 就好大鄉里咁唸住係平時大快樂下午茶餐果d紅豆冰, 所以要求走冰... 點知... 經理話係刨冰, 成座冰山咁, 冇得走冰嘅呢~

星洲紅豆冰 Ice Kachang [廚師推介] -- 最後一款Tasting Hightlights... 外型好吸引, 夏天食一定透心涼!!! 配料有紅豆、珍多、亞答子, 第一次食亞答子, 口感似椰果, 味道甜d, 好好味~ 大廚... 可唔可以o黎1碗淨亞答子呀?!!

真係食完啦嘛?!! 仲未... 大家真係好食得嘅啫, 食完一個甜品, 居然仲想食多一個... 餐廳方面好好人, 全面配合...

嚤嚤喳喳 Buboh Cha Cha -- 再次大鄉里出城!!! 我以為係好多雜豆嘅喳喳, 原來材料係芋頭、蕃薯、椰奶... 個外表唔吸引, 但係入口好好味, 芋頭超粉超腍, 讚!!!

椰香黑糯米 Buboh Hitam -- 張相係借其他星級食家個甜品影嘅... 呢個甜品好受歡迎, 起碼有8成人都係叫佢...

涼粉雪糕 Chin Chow w/ Ice Cream -- 3度大鄉里出城!!! 我心目中嘅涼粉, 就只有立方體形狀嘅, 呢度嘅涼粉竟然係條狀嘅?!!  呢張相都係借其他星級食家個甜品影嘅... 佢試完之後話原來涼粉碎上撈埋雲尼拿雪糕食, 仲好味過平時食開果d立方體形狀嘅涼粉... 今日真係大開眼界喇~
 
食飽飽之後, 大廚請各位星級食家比d意見, 咁大家都好讚賞今晚嘅食物, 如果要係雞蛋裡面挑骨頭的話, 就只可以話海南雞雞肉唔夠滑同埋蘿蔔糕比軟腍身唔夠咬口...

大廚解釋話因為係酒店嘅關係, 任何人客都有, 食物一定要做到最安全... 呢樣我最Buy呀!!! 呢2個月回南天, 細菌好容易滋生!!! 加上我就o黎要飛, 食物嘅安全性好重要, 我唔可以出事o架!!!

今晚有10個星級食家出席, 有6個係上一次「星級試食會」已經初步認識咗, 感覺上冇咁緊張... 加上上一次張枱好長好長, 就算企係枱頭大叫, 枱尾都未必聽得清楚, 而今次張枱短d, 大家可以一齊傾計, 氣氛輕鬆好多... 咁成班星級食家坐埋一齊, 走唔甩一定要交流吓搵食心得啦, 另外又傾吓旅遊呀, 男士們又傾吓波經, 又要影相又要試食, 時間過得勁快...

我仲遇到好投緣嘅星級食家, 2個成晚咬晒耳仔, 人地唔知仲以為我地識咗好耐添呀!!! 查實... 我地都係第2次見o架咋!!! 

U Food嘅職員全部都好Nice, 成餐飯都傾得好開心, 真係好多謝佢地嘅安排!!! 今晚好開心呀, 希望下次再有機會參加就好lu~

成晚唯一最敗筆嘅... 就係我部傻瓜機!!! 可能餐廳嘅情調實在太好(光線比較陰暗), 又或者氣氛太過Relax, 我部傻瓜機個對焦居然想罷工!!! 成晚d相都對唔到焦, 搞到要舉高對手影咁滯, 所以今晚d相嘅角度同色澤影得麻麻地... 唔制呀!!! 我要Olympus OM-D E-M5呀!!! 呀... 買比我啦... 買比我啦...

是次每人消費約 N/A 元 (價值$310/位)
味道： 4 環境： 4 服務： 5 衛生： 5 抵食： 4
###
地址 : 尖沙咀廣東道33號中港城皇家太平洋酒店平台1座3號舖
電話 : 2738 2368
arrow
arrow
    全站熱搜

    kenmerry 拉姑 發表在 痞客邦 留言(4) 人氣()

    E-mail轉寄