Ken & Merry 為食男女，遊走世界!!!

6 September 2009, Sunday

難得有一個星期日係冇o野做, 好想Hea下... Honey提議去赤柱食, 有得食, 我實贊成o架, 嘻嘻...

12點入到赤柱, 週圍都冇咩人, 正!!! 行到去美利樓, 又唔想再食德國Buffet, 睇o黎睇去, 都係呢間越南o野吸引D...

我估太早, 所以餐廳內得幾枱客, 我地可以揀露台位或者室內(有冷氣)... 我見都有D風, 坐露台好似Relax D喎...

環境好正, 天花板上面仲有D葵扇, 不過似裝飾品多D...

Mango Tango--呢杯好似係菠蘿+芒果+蘋果冰冰... 冇記錯嘅話... 好好味, 透心涼...

Saigon Brew GLS--估唔到杯越南生啤咁大, 晨早流流, 點飲得晒...

Pomelo Salad 柚子乾蝦沙律--材料都幾新鮮, 魚露好似重手咗D, 都幾鹹...

1 September 2009, Tuesday

比間金田整到Down晒, 緊要搵D美味嘅甜品補番數...

力仔提議去食雪花冰, 我第一個舉腳贊成, 因為好耐之前睇咗飲食男女嘅介紹, 一直都未有機會試...

我地Order咗2個Share食...

季節限定 (巨蜂提子+水蜜桃) -- 超超超正!!! 不過我地錯咗次序, 應該要食咗清香嘅水蜜桃先, 然後先食濃郁嘅巨蜂提子...

伯爵奶茶--仲仲仲正!!! 連平時唔飲奶茶嘅我, 都覺得好香茶味, 仲好滑... 咖啡凍好濃咖啡味, 正!!!

D雪花冰溶得好快, 下次都係食完一個, 先好Order第二個, 唔使食到趕頭趕命...

後尾返屋企溫下本飲食男女, 原來元朗嘅綿綿冰都係香港雪花冰甜品店嘅先驅... 諗下諗下... 咦... 好似舊年生日龍媽已經帶咗我去食... 我竟然仲以為自己未食過雪花冰, 好老人痴呆呀, 哈哈...

是次每人消費約$25元
味道： 4 環境： 2 服務：2 衛生： 2 抵食： 3
###

1 September 2009, Tuesday

旅行完之後食完一餐又一餐... 今次到咗拉力早敍餐... 目的係派手信...

之前食過呢間幾好, 價錢又OK, 所以就提議o黎呢度, 諗住話開懷大食一番... 點知... 之前食過都OK嘅食物, 今次變得好唔OK...

蒸蛋--唔得, 冇味...
蒜片牛柳粒&薄燒牛肉--全餐叫做OK小小...
芝士年糕--好膩...
凍豆腐--冇味...

魚生&壽司--全部都唔新鮮, 最得人驚... D吞拿魚會留D紅色水出o黎, 好驚佢係染色o架囉... 松葉蟹腳棒壽司D蟹腳棒又係出水, 好似食塑膠咁, 好恐怖...

秋刀魚&鯖魚--尚算OK...

23 August 2009, Monday

嘩, 呢篇Blog都算擺得耐囉... 皆因之前去歐洲旅行嘅相同Blog都攪足一個月, 真係超辛苦!!!

旅行完返o黎, 要食老豆餐生日飯, 都唔知我二姊點搵到呢間o野... 二姊強調呢間係蔡生推介, 雖然係大牌檔，但係有冷氣嘅... 佢仲要講錯個名, 等我去OpenRice點Search都Search唔到, 又話唔知地址, 又話冇得Book位... 好彩我死唔信佢, 上網左搵右搵, 終於比個電話佢, 叫佢打去Book定位, 唔係咁大棚人, 去到冇位都幾係...

行完黃金再去, 行錯咗反方向, 再行返轉頭, 行都行死我, 成身出晒汗, 下次唔好再預我, 唔該...

椒鹽瀨尿蝦--好正, 細細隻都好多膏, 讚!!!

蒜蓉蒸勝瓜--出奇地好味, 值得一試!

小食拼盤--佢地大家話幾好味喎...

砵仔焗魚腸--見大家食到舔舔脷, 平時唔掂嘅我都係好奇下食咗一啖, 都OK喎...

放咗工Honey提議去Delifrance, 差不多行到去嘅時候, 我突然靈機一觸, 捉咗佢去呢間好多人都話好食嘅新餐廳... 查實都開咗半年有多, 之前試過Lunch Hour去排隊, 竟然要等五十幾張枱, 有冇攪錯, 過咗Lunch Hour都未入得到去啦咁...

入面有一半係Common Table, 我地就選擇坐梳化位...

自家製嫲嫲餃子--又真係幾好味喎... 一D都唔油, 個醬汁又好味...

日式蕃茄牛肉拉麵--點解係公仔麵??? 蕃茄湯好濃...

紅酒極上牛肋骨肉飯--呢個好好味呀, 牛肋骨肉又煮到軟淋淋, 正...

Order以上食物, 加$15可以有2個前茶+飲品...

餐南瓜沙律--南瓜汁味道有D怪, 同西芹一D都唔Match...

28 July 2009, Tuesday

拉力早Long Time No Eat, 一心諗住去金田(日式放題)食餐飽, 點知我一時唔記得訂位, 開餐前一日打電話去, 已經Full晒, 仲要之後7日都Full, 唉...

唯有轉去一向食開都唔錯嘅California Pizza Kitchen... 點知... Pepperoni Supremo Pizza硬過餅乾兼冇味... Avocado Club Egg Rolls又硬又油, 滴到成碟油... Classic Caesar Salad平平穩穩... 咁就兩舊幾水, 蝕比佢!!! 食到嘴都歪埋, 都唔敢再幫襯佢D甜品...

轉戰糖朝!!!

早兄呢個熱粉圓百合豆花個樣都幾吸引...

力仔呢個熱杏仁露又幾白晢喎...

我呢個熱合桃露都幾好味o架...

17 July 2009, Friday

Weekend去開Times Sqaure買相機, 順便食埋飯, 事前冇做資料搜集, 結果...

唯一冇大排長龍嘅餐廳... 2餸1湯自選套餐$188, 好似唔太貴...

我地Order咗家常老火湯, 沙薑雞半隻, 涼瓜黃豆排骨煲... 期待-ing...

坐咗都一段時間, 職員先話我地知冇雞(係所有雞類菜式都冇), 咁我地問其他o野(老火湯 & 排骨煲)會唔會都冇, 部長強調"唔會, 有o架, 冇嘅我會話你知o架嘛"...
咁我地左諗右諗... 唯有轉鹵水鵝肉拼盤... 但係點解變左鵝掌??? 咁Honey都食豬耳仔, 就算數啦...

點知...
食咗一片豬耳仔...
職員先話我地知冇老火湯同涼瓜(係所有涼瓜類菜式都冇)!!! 咁咪即係我地Order嘅o野全部都冇!!! 好卑鄙呀!!! 等我地食咗一啖先講!!! 我地真係想即時拍枱走人呀!!!
係冇咩選擇淨諗爆頭嘅情況下, 被迫轉咗瑤柱海皇冬茸羹... 好難飲呀, 冇冬瓜茸嘅, D海鮮又腥, 更加唔會搵到瑤柱嘅踪影...

14 July 2009, Tuesday

食先High Tea, 即刻轉戰任食韓燒!!!

老表呢餐生日飯一拖再拖, 拖足7個半月, 簡直經典!!!

限食1.5小時, 又要夾, 又要燒, 時間好似唔多夠, 攪到要不停手咁燒不停手咁食, 都唔敢傾計...

前菜味道好一般, 魚仔又濕又冇味, 其他都... 食1 Round已經唔想再拎...

牛仔骨同肥牛肉第1 Round幾好味, 但第2 Round超超超鹹... 雞翼冇味... 金菇牛肉卷D牛肉太肥...

豬扒係咁多樣之中最好味嘅... 羊肉勁羶, 味道尚可...

蝦又反而OK喎, 唔會乾爭爭咁... 多春魚一燒即散, 完全燒唔到...

14 July 2009, Tuesday

早２個月搞錯咗AsiaMiles嘅Expiry Date，又未夠積分換Disneyland門票，咁見可以換到Langham Hotel嘅High Tea For Two，都好啦，換咗先啦... 點知之後先發現Ｄ分仲有１年先Expire，烏龍到暈...

張Coupon今個星期就Expire喇，Honey又唔得閒去，咁見外甥放暑假，就叫咗佢地兩母女o黎幫手食...

有Eastern & Western兩款揀，我地Eastern人，多數都會揀Western Set囉，哈哈...
（在場嘅Western人都係揀Eastern Set）
（其實外甥想揀１個平Ｄ嘅甜品Set，因為有Macaron，不過服務員話只可以揀Eastern & Western其中一款喎，咁我唯有話＂下次買１粒比你啦＂）

分量大得驚人，兩個人又點食得晒呀?!!!

外甥話吞拿魚同三文魚三文治好好味喎... 鬆餅同咖哩酥餅又好好味喎...

外甥二話不說就隊咗兩粒士多啤梨，跟住咖啡朱古力蛋糕，合桃蛋糕，白朱古力，果撻... 食力驚人... 樣樣都話好好味... 唯獨唔肯食手指餅...
我反而覺得手指餅幾鬆軟，咖啡朱古力蛋糕幾好味，黑朱古力都唔錯...

尋晚(2009年7月3日)係Friday, 放工時Holiday Mood 濃厚, 搵食日是也...

近日Jacky Yu主理的囍宴系列殺入港島東, 晚晚都人山人海, 我地都要去八下先...

佢打通咗地鋪同1樓, 變成2層高, 樓上坐得舒服D, 樓下D位比較迫, 同埋好似o係金魚缸入面食o野咁...

四囍拼盤 :
泰香情人果--泰國青芒果是也, 鹹酸, 我就食到咪晒眼, honey就好鐘意, 不停話好好味...
蝦兵蟹醬凍豆腐--有我最鐘意嘅豆腐同豬肉鬆, 不俗嘅前菜...
芥末胡麻醬拌日本溫室蕃茄--嗯... 汁太稀, 味道唔夠出, 蕃茄唔夠凍, 阿詩瑪整得好味D...
桂花薰蛋--第一啖冇味... 一路食都冇味... 食到尾有好濃嘅"薰"味...

早幾日(2009年6月22日), 放工回家途中, 路經呢間開咗冇耐, 主打吐司同喇沙嘅餐廳...

餐廳環境幾骨子, 第一次幫襯, 試下廚師推介先...

星洲叻沙套餐(配熱薏米水)--嘩... 辣到呢... 食一啖都頂唔順... 比一向幾食得辣嘅Honey食下啦... 嘩... 連佢都頂唔順... 最慘係, 除咗辣之外, 係"完全"冇味, 同清水冇分別, 但係我唔明囉, 佢D湯係有顏色o架喎, 唔同係純色素?!!!
我初時話不如試下嗶起D辣油繼續食啦, 點知Honey話"唔好食啦, 除咗辣都完全冇味"... 就係咁... 成碗o野只係食咗4分1... 大拿拿41蚊架個餐...

小魚椰漿飯(配熱薏米水)--味道尚可... 大拿拿43蚊, 唔值... 我地兩公婆就係靠呢舊飯, 挨過咗呢一晚... (瞓教果陣個肚狂打鼓)

短期內唔會再幫襯!!!

星期二(2009年6月16日)晚拉力早終於有得要開餐啦, 查實應該上個月早兄生日時食嘅, 不過要等佢考完試先有時間, 所以等到家下囉...
雖然係今晚任食, 不過大家都好攰(佢地做到得番半條人命), 冇咩胃口, 食唔到幾多...

呢間韓燒d裝修好新淨, 大部份都係卡位, 又唔太嘈, 坐得好舒服...

熱葷都有好多款, 咖哩蟹好有咖哩味!!! (wahaha... 蔡生上身)
唔明佢地點解次次都要食薑醋...
其他前菜都唔錯... 我至愛係薯仔... 仲有好耐冇食嘅鹹菜(童年回憶Her Her聲湧現)...

個人覺得最正係... 汽水(可樂/雪碧/橙汁)任飲!!! 仲係支裝!!! Good!!! 仲有豆漿, 參蜜, 菜蜜, 同其他飲品選擇...
牛仔骨同雞翼幾好味, 羊肉碎咗d但好Juicy!!! 金菇牛肉卷係我炮制之下, 簡直Ichiban!!! 咖哩魷魚都好味!!!

繼續隊熟食... 油菜同蓮藕出奇地好食... 豬頸肉都唔錯...

尋晚(2009年6月12日)大家替KaKaMa賀壽... 壽星婆揀咗去鳳城... 查實之前有一次壽星婆都有帶我同貓頭去尖東分店食, 唔知佢係真係好鐘意食呢間呢? 定係已經唔記得咗我地之前食過呢? 仲全家總動員出席, 認真比面...

原本有個驚喜送比大家, 不過後來都泡湯, 哈哈... 我到而家都完全冇同任何人講過呀, 龍媽, 我係咪好守得秘密呢...

尋日因為好多原因, 我遲到咗半個鐘, 去到大家已經點好晒餸, 埋單果陣叫個職員比單又唔比, 所以d餸名我都唔係好清楚, 唯有去OpenRice抄, 唔正確嘅話唔好怪我...

坐低時, 貓頭話鑽媽有咳, 唔食得炸子雞(熱氣), OK啦, 冇所謂啦, 都唔係一定要食嘅, 見D食評多數都有叫啫... 但係而家一路寫Blog一路發覺唔對路... D蝦多士同炸粉果咪仲熱氣, 咁又叫?!!!

乳豬生腸 -- 乳豬放耐咗都仲好脆, 味道都唔錯... 貓頭話全餐生腸最好食, 我冇食到, 都好有興趣想知係咪真係咁好食...

蝦多士 -- 一句講晒, 油淋淋!!! 咬咗一啖, 想吐番出o黎... 貓頭叫我唔好食塊麵包, 剩係食舊蝦, 太好啦, 救咗我!!!

炸粉果 -- 味道都OK, 浸咗湯感覺會冇咁油膩... 但係晚餐食粉果, 好似有d格格不入咁, 平時多數飲茶時食一盅三件, 同埋... 點解要叫1打咁多???

炸蟹拑 -- 咁大隻碟, 得2件(貓頭同鑽媽唔食), 感覺好奇怪... 味道更加怪, 難以形容, 得個大字...

上星期日Apita的Sunday Morning Market好抵呀... 北海道特選3.6牛乳 HK$22.9 喳... Milk Top 牛奶布甸 3樽 HK$45 喳... 仲有其他好多特價o野...

同我老友嘅... 都會有呢個疑問 -- "拉姑唔飲奶o架喎"... 哈哈哈哈... 你地都冇錯... 不過實在太抵, 所以忍唔住想買下, 過下鋪Shopping癮, 呢d人間極品就益下Honey啦!!! (佢都好抵得唸, 去咗翰騰閣拎定位, 等我一Shopping完就有茶飲)

今日游完水, 見到吉之島做緊台灣美食節... 又去昅下先... 嘩嘩嘩... 有雪之戀Counter呀, 上次係美食博覽一試難忘, 緊要買o黎比Honey試下味啦... (Shopping癮又起)

* 雪莓娘 * (糯米皮包入芒果味/草莓味忌廉、新鮮芒果/草莓以及海綿蛋糕 HK$15/each)

仲買咗外表勁Kawaii嘅明月冰卷之紅豆... 嘩... 個名都靚過人... HK$6/each... 好好味呀, 軟軟嘅皮, 香濃嘅紅豆餡, 食完唔想飲水, 因為成口紅豆味, 正正!!!
後面嘅係綠茶卷... HK$4/each... 好清香, 另一番滋味!!!

切開咗嘅雪莓娘...

昨天(2009年5月23日)出席了honey朋友的生日派對, 佢地包咗個樓上cafe嘅場, 7-11pm, 有廿幾個坐位...

內部裝修麻麻, 但有比心機係裝飾方面... 門口貼咗好多明星幫襯嘅相, 多到你唔信...

仲有一個露台, 方便吞雲吐霧一族透一透氣...

露台外的風景...

供應大量益智玩具, 大人細路都玩得好開心... 食物方面, Party Food質數囉, 唔好抱太大期望, 好彩o黎之前比奶奶迫我地食完Lunch再食咗隻裹蒸稯啫...
供應食物有調製果茶, 雞翼, 薯角, 泰式蝦多士球, 西蘭花薯蓉, 忌廉蛋糕, pizza, 茄汁意粉, ...

最好味可算係自携嘅生日蛋糕, 同埋大量紅酒白酒, 不停咁開酒, 飲到11點都飲唔晒...

自從壽司亭受金融海潚影響而全線結業之後, 該鋪位一直懸空, 直至早前圍起木板, 貼住和民貼紙, 我簡直覺得超開心, 急不及待要通知honey... 以前想食嘅話, 最近都要去到銅鑼灣...

直至上個月正式開業, 我地嘅一貫作風係... 新開唔夠一個月嘅餐廳... 唔食...

上個星期日母親節, 唔想同人迫茶樓, 路過和民見唔多人, 就排一陣... 竟然有轉角sofa位坐, 勁寬敞, 3-4個人坐都得...

和民沙律--必吃...

牛油帶子--我的至愛... 好香牛油味...

韓式石頭鍋雜炊(粥)--好味... 但好辣呀...

紅豆卷伴綠茶雪糕--紅豆卷唔太甜, 唔錯...

尋日(2009年5月6日)係Wednesday, 一行9人去咗Ruby Tuesday, 好似有d唔Match...
開頭以為此行只係同無敵慶祝生日, 點知原來仲幫佢攪埋Farewell Party, 我地又唔係佢同事, 點解會由我地攪埋嘅呢... 唏, 是但啦, 有得攪事就開心o架啦, 哈哈...
祝佢今日份新Job(湊仔婆)順順利利, 大展鴻圖(生多一打半打)... WaKaKaKa...

Potato Skins -- 好味...

Bacon Cheddar Fries -- o係我落Order期間, 已經比佢地掃晒咁滯, 結果叫多一碟都清碟, 勁...

R Buffalo Chicken Wings -- 第一口都幾辣, 之後就係酸甜... 不可錯過的Starter...

尋晚(2009年5月2日)佛誕由太古之友引路, 去到大坑食私房越南菜... 地下是正常的餐廳, 側邊有條樓梯, 向帶位示意, 佢會用鎖匙開閘, 比我地上1樓, 1樓有2度門, 掛住"Private"門牌, 按鐘等職員開門, 守衛好深嚴...

入面有4-5張枱, 裝修都唔錯...

好特別嘅越南特飲"清補涼冰", 味道似龍眼冰多d... 越南啤酒要用碗飲, 好豪氣咁, 哈哈...

蜜桃大蝦米紙卷--冇乜味道, 靠個花生醬吊味, 大蝦果條黑麻麻嘅腸仲係度, 有d嘔心...
炸軟殼蟹米紙卷--都係冇味, 又係靠個醬...
牛油雞翼--OK...

香煎龍脷柳--好Juicy, 香香脆脆, 配埋個醬, 酸酸地, 正...

尋晚(2009年4月30日)跟honey去試下上次佢d朋友帶佢去食嘅炳記, 間鋪頭絕對其貌不揚, 但係honey極力推薦, 太古之友又點可以唔去呢...

杏汁豬肺湯--好似溝咗水咁, 好稀, 亦食到一粒粒粉末, 都係西苑好味d...
糯米雞--極大碟(如圖), 成隻雞裡面裝滿糯米再炸, 味道都ok, 不過糯米好似太淋...
燒汁鱔球--呢味就真係好食啦, 去晒骨切晒花, 啖啖肉, 脆脆地, 個汁都好味...
蝦醬通菜鮮魷--除咗冇蝦醬味, 都ok嘅...
炳記咕嚕肉--我覺得幾正, 因為唔係肥肉同骨, 個汁都惹味...

基本上, 我地5個人, 都已經食唔晒以上order咗嘅食物, 但係個老闆娘三番四次叫我地加餸(狂Sell招牌菜--三杯雞 & 300幾蚊一碟嘅黃金蝦), 真係煩到爆... 唔係錢嘅問題, 而家食唔晒的話, 會超浪費囉...

服務就更加冇得頂, 我地未飲完d湯, 個男仔就收走晒我地d碗, 咁又點飲埋d湯呢...

總括來說, 並不難吃, 但係咁嘅價錢, 我會去西苑囉, 因為service同環境都好得多...

是次每人消費約$150元
味道： 3 環境： 1 服務：1 衛生： 1 抵食： 2

尋日(2009年4月29日)貓兄同KaKaMa即興Call食晚飯, 有得食... 我緊出嘅...

(用印花換, 免費) 和風冷豆腐--都唔錯呀, 清清地...

(用印花換, 免費) 壽司拼盤八款--不過不失...

(用印花換, 免費) 刺身拼盤七款--都幾新鮮...