Ken & Merry 為食男女，遊走世界!!!

22 September 2010, Wednesday

中秋佳節, 好多公司有得收早, 朋友們都準備好放工返屋企做節, 我都唔例外...

就係呢個時候, Marriott的Confirm Booking電話殺到...

事緣我9月初Book咗The Lounge (香港萬豪酒店大堂酒廊) 嘅Tea Buffet, Book9月25號, 8個大人, Book時都再三Confirm佢係由1:00PM食到6:00PM, 接線生都話係...

過幾日我再打去加2個BB座位, 又再重新Confirm我係Book咗1:00PM...

今次打黎Confirm Booking嘅陳小姐, 一打黎就話我Book咗3:30PM...

我即刻好大反應, 我話我Book 1:00PM...

陳小姐 : 當日有Group Lunch, Tea Buffet要3:30PM先開始...

拉姑 : 有冇搞錯, 我有D朋友4:00PM要去Playgroup, 如果係3:30PM開始, 叫佢點食呀???

陳小姐 : (好冷淡) 總之Tea Buffet係3:30PM開始, Book位時同事有講...

拉姑 : 冇可能, 如果Book嘅時候係話3:30PM開始, 我點會Book...

陳小姐 : 人地Group Lunch 5月Book, 你9月7號先Book, Book位時同事會講...

拉姑 : 你同事冇講過, 如果佢有講, 我點會Book, 你而家咁"蚊"先打黎通知我, 你搞到我地好"呢HEA"...

陳小姐 : 總之Book位時同事一定會講, 人地Group Lunch早過你Book...

拉姑 : 咁你既然睇到我Booking係9月7號先Book, 咁你睇到我嘅Booking係幾點吖??? (高16度)

17 September 2010, Friday

今日LUNCH HOUR見悶悶地, 唔叫外賣, 落街買野食順便行下... 行行下見到呢間開咗1年嘅墨西哥快餐勁多人, 鋪仔細細坐咗接近20人... 講真, 佢開張時我見佢放得2張企枱, 冇諗過可以坐到咁多人, 諗住佢都係主力做外賣生意嘅啫... 大熱天氣D人都肯坐係街度, 唔通真係咁好食???

我買咗1個"墨西哥手卷套餐" (Burrito Combo)... 包一款墨西哥手卷(自選肉類或素), 粟米脆片配莎莎醬 (Tortilla Chips with Salsa), 細汽水... 嘩... 大拿拿59蚊都咁多人食??? 唔通真係好好食???

自選肉類有燒汁雞脾肉, 燒牛肉粒, 烤豬肉, 香汁豬柳... 我揀咗烤豬肉...

汽水有可口可樂, 健怡可樂, 雪碧, 梳打水... 我揀咗梳打水...

墨西哥手卷係用麵粉薄餅包住墨西哥飯, 班豆蓉, 芫茜, 洋蔥粒, 莎莎醬... 坦白講, 我見到佢竟然叮個墨西哥手卷個一刻, 個心已經涼一涼, 咁貴嘅食物, 竟然係叮出黎嘅??? 再者, 墨西哥飯原來係茄汁飯, 可惜冇茄汁味, 仲要淋BEAR BEAR...
食唔出有班豆蓉, 幾蚊1大包嘅雪藏青豆就見到幾粒...
更唔覺有莎莎醬係入面...
個烤豬肉好似乾柴咁, 冇味嘅...

粟米脆片油淋淋, 雖然個莎莎醬幾治味, 但食咗3份1都唔想再食...

9 September 2010, Thursday

今晚的拉力早叙餐相當緊急... 何解??? 因為大家要交換去旅行時買的手信!!!

買土產做手信通常最受歡迎, 但又有小小麻煩, 煩就煩在有Expiry Date!!! 因為有時唔係咁輕易就約到朋友出黎飯叙, 有時真係擺到D野過期都未約到對方出黎, 所以今次行動一定要快!!!

好可愛嘅餐具架呀!!!

因為大家都唔餓, 所以我地叫一個SET, 再加一個意粉...

niji Coffee Smoked Kurobuta Pork Linguine in Ginger Soy Sauce & Chili
日式炒香辣niji咖啡煙黑豚肉扁意粉
-- 香口冶味, 很不錯...

niji Dinner Set

niji Assorted Appetizer
niji什錦頭盤

6 September 2010, Monday

雖然各餅店一早已經開始咗鋪天蓋地嘅月餅戰, 但係我一直無動於衷...

人越大, 對過節嘅感覺越淡...

今日下午有人狂按門鐘, 仲心諗邊個咁趕住投胎, 原來係送月餅劵來的... 頓時醒起"係喎, 好快中秋啦喎"...

誰不知... 夜晚HONEY又收到月餅... 嘩... 福臨門呀... 我地即刻切o黎試下... 嗯... 都係名氣勝於一切囉... 哈哈... 你地明o架啦...

17 August 2010, Tuesday

放工後行到太古坊時, 突然勁大雨, 倒水咁, 有2把遮都攪唔掂... 原定去王家沙嘅計劃要取消, 轉移去最近而又唔使淋雨嘅餐廳...

自從翡翠拉麵小籠包執咗之後, 新開呢間上海菜只食過一次, 原因係價錢貴咗+坐位迫咗+味道差咗...

今日太早入去, 6點鬆D, 所以仲有卡位, 原先被安排坐果D迫過快餐店嘅枱, 係我堅持要坐卡位嘅情況下, 竟然真係比我成功咗...

而家仲推出咗$148二人餐, 有頭盆(6選1), 有靚湯(2選1), 有點心(6選1), 有小菜(16選1)...

雞絲粉皮--味道OK!!!

雲吞雞湯--味道OK!!!

鮮肉鍋貼--又得喎...

糖醋雞球--都得啫...

26 July 2010, Monday

見到有條魚, 係咪以為去錯BLOG呢...

放心, 冇去錯!!! 只係太多人同我地講, 人大咗之後, 就只係可以食魚同菜, 食唔到咁多肉o架啦喎... 道理我地明, 只係哽唔落... 唯有頂硬上, 練習下...

清蒸咩斑--上枱即食都OK新鮮嘅, 可以食得落... 食到尾聲, D豉油開始腥, 一路食一路想嘔... Honey當場肚痛, 我就返到屋企先開始痛, 都唔知係心理影響定食物質數問題...

梅菜蒸芥蘭--次次去都會叫呢一味, 因為係菜, 仲要冇咩油, 同埋我鐘意用梅菜撈飯... 值得一讚嘅係, 佢每條菜都批咗頭頂最硬嘅皮, 食得冇咁辛苦...

上湯龍蝦--人均點菜滿$100即送每人半隻, 可選上湯或芝士... 唔明點解上湯會變咗打獻, 至憎, 成碟嘢好似漿糊咁... 不過D肉都算OK新鮮, 小小彈牙, 免費送嘅, 算有水準囉...

敬送糖水...

去呢間嘢, 千祈唔好對佢哋啲服務有要求, 有D茶餐廳都會好過佢...

N年前去過一次, Black List咗佢幾年, 近期太古之友話耐唔耐會去下, 我都覺得好難相信(因為佢地要求好高), 有次試下同佢地去食, 當街坊餐都OK嘅...

25 July 2010, Sunday

去完U HALL就返番數碼港醫肚...

一行入去就有位, 現場好寧靜, 環境都唔錯, 水晶燈唔小得, 張櫈仲超舒服, 讚...

酥皮蛋撻仔--一坐低都未有點心紙睇就比阿嬸硬銷咗... 嘩, 一睇點心紙, 原來係特點o黎o架, 成36蚊, 仲要唔係特別好味, 嘔血... 即時勁掛住又平又好味嘅泰昌蛋撻...

菜乾豬骨粥--好一般...

蜜汁叉燒包--又係好一般...

梅酒冰鎮涼瓜--又一嘔血之作... 苦到不得了, 仲要一D梅味都冇, 問個Waiter Dee Dee拎梅粉, 佢完全唔知呢個世界有梅粉呢樣o野, 解釋極都唔明... 最後佢問都冇問其他職員, 就答我地"冇"...

22 July 2010, Thursday

今日又要去尖沙咀...

搞掂晒, 準備離開返屋企時, 竟然傾盆大雨, 大雨到連踏出一步都唔想...

見到座大廈原來有茶樓, 都唔理得咁多, 入咗去先...

當時只有5點半, 未有得食, 但可以開壺茶飲住先... 坐咗一陣, 就見到電視出咗"黑雨"公仔...

頭抽煎銀倉魚--都幾好味呀, 煎得好脆, 一D都唔腥, 連Honey都食到...

中式焗牛柳--甜甜地, 味道啱啱好, 又唔韌, 唔錯唔錯...

南茸蛋白蒸斑球(免費)--飯晚送呢個或蠔, 我地唔食蠔, 冇得揀... 味道清清地, 蛋白蒸到好似豆腐咁滑, 斑球仲要唔腥, 所以感覺有D意外, 因為通常送得嘅o野都好難食...

18 July 2010, Sunday

今朝8點幾已經醒咗瞓唔番, 一於早D出街街食早餐...

我地首先坐小巴入數碼港醫肚, 之後先去HKU影相... 入到去數碼港都未夠10點, 所以商場9成9嘅店舖都未開, 唯有入呢間餐廳...

餐廳的裝修古色古香, 由於時間尚早, 所以有大把卡位, 仲對正個電視, 可以一面睇藍龍一面食早餐... 讚...

Honey的西式早餐味道不俗...

我的中式早餐好唔掂, 鹹雞粥好稀, 炒麵等咗好耐先到, 仲要配料同麵分開晒, D麵唔似有炒過... 完全唔想幫個炒麵影相... 劣...

食飽飽就週圍影下相... Kuro貓BB就充當地產經紀, 帶大家睇下超級豪宅貝沙灣...

15 July 2010, Thursday

今日放假去咗尖沙咀iSquare, 懶得行, 所以係iSquare搵地方食下午茶... 嘩... 全部都勁貴+個樣唔吸引... 得呢一間越南河價錢相宜D... 但不代表便宜...

雜菜紙米卷--冇咩味...

牛"月展"雞絲河--又一冇味之作...

雞扒煎蛋飯--唔知點解我會聯想到食神叉燒飯, 呵呵... 見Honey食唔晒, 估計到好味程度...

越式雞翼--等咗廿幾分鐘先到, 咩都食完... 但呢個係今餐最好味的...

是次每人消費約$47元

2 July 2010, Friday

好耐冇係大戶屋影相啦... 因為每個星期都會去食, 感覺就似.. 變咗飯堂咁...

但係今次竟然安排咗我地入房坐... 嘩... 第一次咋... 係弧形落地玻璃房...

仲要係得2個人, 比張4人枱我地... 問阿侍應弟弟"係咪要坐埋一邊?", 佢無奈地答"我地呢度冇搭枱架"...

我地可能係太古坊食得太多Lunch, 習慣咗2個人坐4人枱要坐埋一邊... 攪到今次好似大鄉里出城咁... 哈哈哈哈...

房內小擺設...

Honey至愛嘅黑醋雞野菜定食... 酸酸甜甜, 好惹味o架...

我夏天偶然會食嘅醬燒雞扒飯配盒子蕎麥冷麵... 蕎麥冷麵透心涼... 醬燒雞扒都好好味...

15 June 2010, Tuesday

呢餐拉力早敍餐都食咗接近一個月囉, 終於可以曝光...

今次做咗大鄉里... 早咗到達尖沙咀, 去搵最近呢間餐廳嘅地鐵出口時, 路過K11嘅地鐵出口, 因為未去過, 所以就入咗去逛下...

逛完係地面想搵路行去餐廳, 係K11嘅3個出口左滕右滕, 都搵唔到路離開, 有D惶惶然, 後來竟然揀咗條最遠嘅路... 去到赫德道仲恐怖, 條街好似蜘蛛網咁, 分咗幾條橫巷出o黎全部都係叫赫德道, 理論上D橫巷應該叫咩里咩里咁先係o架... 搵咗好耐, 逐條橫巷行, 行勻晒都搵唔到, 到最後放棄狀態, 亂行埋D冇咩可能性嘅, 竟然又中喎...

註: 我有影埋中原地圖去o架...

入面黑漆漆咩都睇唔到呀... 我地有梳化位坐, Good!!!

我地揀咗2個Set Dinner, 因為已經包括晒我地想食嘅o野...

焗雲吞伴蕃茄汁 Baked Raviotis (Set Starter) -- 一如網民所言, 好好味呀個蕃茄汁, 好濃郁...

香煎法國鵝肝伴焦糖蘋果配砵酒汁 Pan-fried French Foie Gras with Caramelized Apple in Port Wine Sauce (Set Starter) -- 鵝肝唔夠濃, 但都算合格, 個汁都好清新...

香草白酒忌廉煮青口 -- 好味!!! 又足料, 食極都食唔完...

11 June 2010, Friday

話說公司早前有大量"打柴"電腦出現, 一直無人處理, 叠到就到天花... 直到有一日, 有人上門問有冇舊電腦, 好壞都收... 嘩, 有呀!!!

Recycle錢箱有500蚊進帳, 發達啦!!! 有錢係手, La La 聲搵好o野食啦喂...

呢間日本餐廳, 之前TVB原裝入口有介紹過, 標題係「堅持傳統的日本料理 -- 日式家庭料理 -- 地道日本廚師為食客帶來媽媽的味道」, 大家有興趣的話, 可以去TVB嘅網頁瀏覽下...  http://mytv.tvb.com/foodandtravel/atasteofhome/3377/99#page-1

蒲燒饅魚飯配刺身定食 -- 饅魚好好味, 又大舊... 三文魚又大舊又新鮮, 好正呀!!!

銀鱈魚定食 -- 同事C比咗小小我試... 嘩... 好好好好好味呀!!! 又厚又大大件, 出面而家食唔到o架啦, 連Ichikawa都變得又細又薄, 攪到我對至愛嘅銀鱈魚心都淡晒, 但係, 估唔到佢呢度嘅銀鱈魚竟然仲咁正, 我一定要帶Honey o黎試下先得...

燒玉子 -- 見D網民話必吃, Order咗一客, 點知原來定食都有跟, 早知就Order其他小吃啦... 味道不錯...

同事L Order的天婦羅蝦烏冬定食原來跟埋軟殼蟹手卷o架...

午餐o黎計, 一D都唔平, 但真係物有所值!!! 服務亦唔係傳聞中咁差, 繁忙時間仍然保持到笑容, 算係咁o架啦...

大家想去嘅, 記得訂位呀, 好FULL o架!!! 同埋經常都唔開門做生意o架, 好利害!!!

8 June 2010, Tuesday

對上一次寫飲食BLOG已經接近2個月啦, 終於有時間補番去完東歐旅行之後嘅飯局BLOG...

呢餐飯係KaKaMa生日宴, 佢主人家一句話要食韓燒, 就連我呢個由東歐咳到返香港咳到半死咳足3星期嘅人熱烈反對都冇人理, 照去可也... 突然覺得自己好可憐, 人地鑽媽咳2聲話唔想食熱氣炸子雞, 就即刻冇得ORDER... 而我咳到半死, 食韓燒必定死上加死, 大家竟然理得我死, 繼續照去韓燒, 可悲也!!!

個夜景確係唔錯... 不過我今日冇帶相機, 手機影得麻麻...

前菜部份係第一次食, 好似黑豆咁...

其實呢餐飯係咁耐之前食, 加上當日受藥力影響, D味道我已經冇咩印象... 唯一記得嘅係, 去一次已經足夠, 純粹係感受環境同情調, 如果要食韓の味, 佢唔係首選...

Beef Short Rib -- 嗯... 都幾好味...

Chuck tail flap -- 唔點汁完全冇味, 勝在肉質好, 夠新鮮...

4 May 2010, Tuesday

KaKaMa復活節去完旅行有手信派, 攪到下星期五飛但仲未執行李嘅我都要撲倒出o黎...

貓頭買咗新相機, 所以就揀咗去1881, 食飯之餘仲可以試下機... 我雖然都有新機, 但係... 咁鬼重, 點拎呀... 都係拎番部舊傻瓜算啦...

食飯前試咗幾張...

我今日仲帶埋腳架仔, 好認真...

後面個男人神情驚愕, 迫我加工整矇佢...

D腸痛咗幾日, 仲有幾日就飛, 仲飲凍o野, 呢杯Mango Delight仲要係芒果+菠蘿+奶... 簡直挑戰自己極限... KaKaMa竟然飲熱花茶, 世界變... 貓兄就飲Ginger Ale...

DG Special Salad--好大呀個碟!!! 好小呀D沙律!!! 但味道不俗...

1 May 2010, Saturday

今日有近來難得一見嘅藍天白雲, 所以我同Honey決定去數碼港試下相機... 試機前要填飽個肚先...

小食係腰果, 好好味, 又唔油, I Like It!!! 不過2個茶位+呢個小食已經要$54, 簡直係未見官先打80大板...

XO肉崧炒腸粉--好香口, 配埋肉崧, 好好味... 拉姑誠意推介!!!

鮑汁鳳爪--略嫌唔夠入味, 又唔夠淋, 可以不試...

金絲茶湯百花球--嘩, 好油呀!!! 頂唔順, 第2舊我要了走晒D金絲, 齋食百花球... 茶湯流乾晒都唔係好知係咩味...

日式木魚燒賣--OK啦... 睇住D木魚亂下亂下好得意...

22 April 2010, Thursday

探完B, 我地就要趕去開餐... 5月之星壽宴!!!

呢張相所見到嘅, 只係我地當晚所食嘅1半, 汽水都飲咗17支, 食力非同小可, 加上全間餐廳得我地一枱食到企晒起身, 嚇到隔離左右D食客Keep住眼望望, 哈哈哈... 因為忙於不停食不停食, 同埋張枱根本一次過放唔晒所有食物, 所以冇可能樣樣食物都上鏡...

$10碟安格斯牛肉相當唔錯... 冇上鏡嘅花雕牛肉亦係一絕...

招牌菜--蝦滑用雪糕杯上, 賣相一流, 入口都好爽, I Like It... 瑞士芝士牛丸唔係我杯茶, 好怕入面D淋Pat Pat芝士... 炸腐皮浸一浸就食得, 都幾得意...

鵝肝--鵝肝味唔係太濃, 入口都幾滑...

青島石蠔--佢地話淥完變晒蠔屎, 好搞笑...

16 April 2010, Friday

今日要去太古城郵局拎掛號信, 拎完買埋o野就順便食埋Lunch...

由於時間尚早, 一入到間餐廳, 得2枱客, 一眼就認出其中一枱係郭晉安同歐倩怡同埋佢地嘅BB, 我唔敢影佢地呀, 好似阻住人地享受天倫之樂咁... 唯有影下Honey啦, 哈哈...

我地Order咗2個Set Lunch...

蘋果綠茶--幾好味呀...

紅菜頭沙律+麵包--好新鮮, 同埋D沙律汁撈得好均勻, Yummy!!! 麵包外脆內軟, 唔錯!!!
蘑菇cream湯+麵包

上完頭盆, 要等多25分鐘個飯先到, 個沙律更加要等足30分鐘, 有冇搞錯!!! 得個2-3枱客, 都要等咁耐??? 廚房入面有超過十個人不停係度郁, 究竟佢地係度搞咩??? 大家如果趕時間嘅, 千祈咪試呢間...

甜酸雞燴糙米飯--食一啖飯, 好勁五香粉味, 嘩, D飯吸晒D五香粉湯, 頂唔順, 不過Honey食得好滋味... 再食一啖雞, 五香粉味冇咁勁, 又OK喎... 再食一啖雅支竹(Artichoke), 淡淡地淋淋地冇咩味...

蕃茄水牛芝士焗茄子及火箭菜沙律--D菜好新鮮, 都幾苦... 蕃茄, 水牛芝士, 同焗茄子都好好味... 不過食完好似冇咩落過肚咁...

9 April 2010, Friday

上星期五, 我罕有地出席咗一個商會嘅Networking...

25人可包VIP Room, 由6:00-8:30pm, 每位HK$100, 包2杯Drink, 仲有Snack Bar...

Drink有紅酒, 白酒, Cocktail, Beer, Soft Drink... 咩都有, 好正!!! 任何人都可以揀到啱自己心水嘅飲品!!!

間房都唔細, 我分3個Area影比大家睇...

Area A--粉紅色虛線係私家Toilet o黎o架!!! 正到痺呀!!! 5星級酒店嘅級數!!! 入咗去唔捨得返出o黎呀, 哈哈哈哈...

Area B--張枱細細地, 適合圍埋講八卦消息, 哈哈哈哈... 如果要播放相片或者Video, 後面部Laptop已經接駁好Area A同Area C嘅大電視, 冇得頂呀!!!

Area C--近Snack Bar, 最多人聚集, 哈哈哈哈...

Snack Bar--前後會有6碟食物, 第2 Round可選其他食物, 香草煎雞翼係超超超超超級好味, 好味到我狂食咗好多Round, 結果連晚飯都食唔落... 炸魷魚圈都好正, 魷魚好彈牙... 其他o野都咁好味, 薯格當然唔會失手啦...

4 April 2010, Sunday

復活節假期第3日... 繼續冇節目...

幫襯咗超過10年嘅飯堂, 原來從未係Blog亮相, 真係自己都覺得奇怪...

而家呢個係新店, 大部份都係卡位同梳化位, 亦有吧位... 有電視睇, 長期播TVB... (舊店係隔離鋪位, 裝修係日本居酒屋式, 鋪仔細細, 好有人情味果種, 長期播日本節目... 我... 還是喜歡舊的那一間...)

自選午餐, 好多o野揀, 反轉個餐牌都仲有十幾款...

餐飲可以揀招牌菜自製水蜜桃茶, 超級好飲!!!

我次次都係Order超人氣什錦天婦羅+油揚手打湯烏冬... 天婦羅D炸粉好薄, 又唔油, 即叫即炸, 熱辣辣, 好好味架... 油揚好甜, 烏冬好煙韌, Ichiban!!!