Ken & Merry 為食男女，遊走世界!!!

尋晚(2009年5月2日)佛誕由太古之友引路, 去到大坑食私房越南菜... 地下是正常的餐廳, 側邊有條樓梯, 向帶位示意, 佢會用鎖匙開閘, 比我地上1樓, 1樓有2度門, 掛住"Private"門牌, 按鐘等職員開門, 守衛好深嚴...

入面有4-5張枱, 裝修都唔錯...

好特別嘅越南特飲"清補涼冰", 味道似龍眼冰多d... 越南啤酒要用碗飲, 好豪氣咁, 哈哈...

蜜桃大蝦米紙卷--冇乜味道, 靠個花生醬吊味, 大蝦果條黑麻麻嘅腸仲係度, 有d嘔心...
炸軟殼蟹米紙卷--都係冇味, 又係靠個醬...
牛油雞翼--OK...

香煎龍脷柳--好Juicy, 香香脆脆, 配埋個醬, 酸酸地, 正...

咖哩牛腩煲--個汁好稀, 味道就ok, 牛腩真係好淋, good...

清湯通菜--尚可, 又係冇味...

蕃茄牛腩湯河--個汁又係好稀, 牛腩好淋... 到第二碗個汁就好"傑", 好味好多, perfect...

蒜茸包同法包都好好味, 點咖哩汁一流...

原本食得好舒服, 後來隔離枱坐咗5條假洋鬼子, 明明識講中文又講英文, 嘈到不得了, 個度又唔通風, 搞到我頭痛兼頭暈...

大家都食到好飽, 但係都仲要行去晶晶糖水食甜品, 晶晶魅力沒法擋...

是次每人消費約$175元
味道： 4 環境： 4 服務：3 衛生： 3 抵食： 3