Ken & Merry 為食男女，遊走世界!!!

15 July 2011, Friday

今晚係第三堂去工聯會學整蛋糕... 今晚係整「薑味芝士蛋糕」...

我嘅制成品... 依然... 好...... 醜樣呀!!!!!!

返到屋企又再睇番同學期唔同地區嘅BLOG友整嘅蛋糕, 人地係整得好靚好正常o架囉!!!

我地阿Sir 6組人加埋佢自己先整3組忌廉芝士, 根本連鋪餅面都唔夠, 竟然完全冇預忌廉芝士比大家鋪餅邊, 仲叫大家用埋焗餅底張紙, 又濕又梅咁包走個Cake返屋企... 好核突呀...

個制成品真係一次衰過一次呀... 上完堂好唔開心呀...

制作花絮...

嚴重貨不對辦嘅「甜薯餡切餅」... (阿Sir示範, 我地冇得實習)

你地睇下... 根本就係一個鬆餅!!! 阿Sir示範時, 好多同學都有疑問, 大家不約而同認為餡餅應該係有塊餅皮包住D甜薯餡, 究竟阿Sir識唔識整餡餅o架???

14 July 2011, Thursday

終於...

最後一集Harry Potter...

上畫啦...

睇咗一集又一集, 冇理由唔睇埋最後一集...

就睇佢第一日上畫嘅第一場...

哈哈... 唔係因為我為「哈利波特」而瘋狂, 而係因為咁啱放假, 13號晚路過戲院, 見到14號早場唔係3D, 有得諗... 而家好唔鐘意睇3D, 個眼鏡又唔啱Size, D戲嘅3D特效又唔係多, 搞到我睇住副3D眼鏡睇到頭都暈... 而且仲有位揀吓... 同埋只係$35, 係超超超超抵囉~ 好耐冇試過睇咁平嘅戲啦~

睇完真係一身鬆晒, 我終於都得到解脫啦, 唔使再追落去啦~ 太好啦~

前幾集都比人笑嘅奈威·隆巴頓(Neville Longbottom)今集終於發威啦~ 好英呀~

臨尾幾分鐘嘅「佬」造型同「師奶」造型先襯返D演員嘅實際外表, 要佢地繼續扮細路真係好難頂~ 好懷念第一集嘅哈利波特(Harry Potter)同妙麗·格蘭傑(Hermione Granger), 果時佢地仲係好得意, 而家就...

11 July 2011, Monday

幾個月前知道筲箕灣出咗一間米芝蓮餐廳, 都想去試吓好耐, 不過有一次星期日下午去到門口, 見到大排長龍, 所以冇機會試...

今日去開西灣河, 就試吓佢間分店啦... 由於佢地中場休息幾粒鐘, 所以打電話o黎Book位冇人聽, 唯有試吓Walk-in, 諗住如果冇位先走去第二度食...

我地6點半去到, 所以冇訂位都有得食, 之不過要坐係門口個魚缸隔離, 全程好唔自在, 好驚D條條都幾呎長嘅魚一擺尾我地就成身水, 又驚D魚缸水彈咗出o黎會污染D食物... 一心諗住快D食完快D走... 呢個諗法竟然會出現係拎到米芝蓮一星嘅餐廳身上??? 唔係吖嘛...

胡椒薄脆(配香草辣醬&甜酸醬)--一坐低就會奉上... 我地落單後, 阿老闆話我地應該落單前食... 我問點解, 佢答話我地食完開咗個胃, 落單時就會ORDER多D野... 嘿... 好爛嘅GAG, 唔識笑... 一咬落去, 好薄好脆, 帶少少燶味, 唔太辣, 配香草辣醬好正...

個個網民都話D食物要等成個鐘, 點解... 唔使10分鐘就o黎晒??? 攪到我失晒預算, 之後要係西灣河魂遊太空幾個圈...

蒜蓉薄餅--嘩!!! 好熱熱熱呀!!! 辣死我隻手啦!!! 好好味呀, 好鬆化呀, 又唔油, 好香好酥呀!!!

11 July 2011, Monday

近期係UFood寫食評抽中咗「稻香20周年小克紀念碗碗一套」, 嘩... 好開心呀!!! 皆因我一向都好鐘意呢隻熊貓, 貪佢對黑眼圈同我一樣咁大, 咔咔咔咔...

一套四款配精美禮盒... 仲連埋同款環保袋...

我最鐘意點心造型...

跟住就係打邊爐造型...

呢個雞仔都OK啦...

10 July 2011, Sunday

睇完「甚麼是明天 三十乘三十創意展」What's Next 30x30 Creative Exhibition, 就去醫五臟廟... 名家... 不二之選...

前菜6小碟--好o野!!! 有黑豆... 仲有蝦... 仲有豆角... 正呀...

D蝦仔醃到好入味, 甜甜地, 脆脆地, 一D都唔腥, 好好味呀...

鹽燒黃花魚--大突破!!! 係我努力游說之下, Honey終於肯試下... 條黃花魚燒完之後, 服務員第一時間捧出o黎, 條魚仲好熱, 一D都唔腥, 皮脆肉嫩, 用鹽燒一D都唔油仲帶出魚嘅鮮味, 好正呀!!! 我地好少會食魚, 因為怕腥, 以後我地可以有魚食啦~

紅炆牛肋骨--介紹過好多次... 一樣咁好味, 不過今次D骨好似大咗好多...

餐後果--終於等到西瓜出場!!! 西瓜一般甜啦, 但係每次食完韓國o野, 食一啖西瓜, 感覺就好似喉嚨比楊枝金露滋潤完咁... 好正...

10 July 2011, Sunday

近日路過太古坊, 見到新嘅展覽--「甚麼是明天 三十乘三十創意展」!!! 今日專程走去睇下...

展覽由香港設計師/藝術家又一山人, 與海外及中港台30位來自不同界別、年代的大師、創作人、新一代展出「創作的明天」60件創作作品...

展品好多元化... 不過... 有部分展品唔係好Get到佢嘅Meaning... 可能係我嘅藝術修為未夠啦...

同埋全個展覽會場都係用原木o黎做展覽櫃, 所以有陣裝修嘅木碎味... 我著咗7分牛仔褲去, 只係露出半隻小腿, 一入場就比o野咬, 我估係木虱, 仲要睇咁耐咬咁耐...

又睇唔明, 又有o野咬, 所以都冇心機就留咁耐, 嗱嗱聲走人... 離開咗要用濕紙巾消毒小腿先好番D咋... 大家如果想去睇呢個展覽, 記得著長褲呀!!!

10 July 2011, Sunday

咁大個人第一次去學整Miniature (1:12袖珍藝術手工藝創作), 原來整Miniature要買好多工具同材料o架, 仲吓吓都要日本貨, 好鬼貴呀!!! 真係買都買到怕...

上咗3堂, 就已經完成咗朱古力店鋪!!! 8款朱古力, 每款要做成50粒, 做到腰骨痛+五十肩... 原來玩Miniature係好好好辛苦o架!!!

仲有7堂... 個糖果店舖有成十幾款糖果, 仲要每款要做成100粒... 真係唔知點死...

最辛苦嘅過程係界膠片... 我為咗環保D, 拎咗D舊CD盒o黎界... 一o黎CD盒厚D, 要界耐D... 二o黎CD盒有4個邊要界走咗先, 而且Size有限, 變相比界膠片要界多幾倍嘅功夫... 真係自討苦吃...

9 July 2011, Friday

今晚係第二堂去工聯會學整蛋糕... 今晚係整「皇家差洛蛋糕 (Royal Charlotte Cake)」... 坦白講... 個蛋糕名真係聽到未聽過...

上堂時已經有疑問... 整2個餅底點拼埋一齊??? 同學仔向我解釋完我都係唔明, 照咁睇... 我嘅「變蠢指數」又再度升咗呢... 嘩咔咔咔...

我嘅制成品... 好...... 醜樣呀!!!!!!

制作花絮...

返到屋企覺得個Cake個樣好唔對路, 邊有咁奇怪嘅Cake先得o架!!! 走去Search下有冇BLOG友整過啦, 竟然發現咗3個Blog友都有整過, 人地個個都係整3層卷蛋o架, 個Cake仲整得好靚o架!!!

點解我地阿Sir只係示範2層??? 仲要個餅面都唔連貫嘅, 個Look奇怪到痺!!! 有同學上堂時已經同我地講話阿Sir講D o野好似唔係幾可靠咁... 估唔到... 原來真係靠唔住o架... Oh No!!!!!! 今次真係「遇Sir不熟」!!!!!!

原本今日心態已經調節咗先去上堂, 已經冇上一堂咁上得咁唔開心咁辛苦... 加上同學們開始打下招呼同埋互相幫助, 我覺得今堂上得輕鬆咗同埋開心咗D... 點知... 而家... 整咗件咁嘅K胎出o黎... 呀)))))) 我唔制呀!!!!!!

4 July 2011,  Monday

幾個月前有個Friend極力推介一間位於西灣河嘅小店嘅「生炒骨」, 不過又講唔出店名, 所以我都無從入手...

上個月再見到佢, 佢繼續激讚, 仲拎咗幾張小店嘅卡片大派, 哦... 合時小廚... 個Friend仲教埋我邊幾個菜必點...

今日去開西灣河, 一心諗住試下呢個令佢讚不絕口嘅「生炒骨」, 點知... 原來要預訂先有得食o架... Oh No... (有其他食客o黎試食都係點生炒骨, 同我一齊撲空)

跟手Order個Friend話幾好嘅「豉油皇浸雞」, 點知又係要預訂!!! 好彩另外一個店員話有半隻, 我估有客訂咗半隻, 所以我先有得食... 好彩好彩...  (遲我小小o黎果個試食客人又係點豉油皇浸雞, 店員解釋唔預訂的話, 落單後要等45分鐘先有得食, 示意個試食客改ORDER其他食物... 今次我有得食啦, 果個試食客就2樣都撲空, 呵呵呵呵)

原來係咁嘅... 唔怪得之... 餐牌係搵唔到生炒骨同豉油皇浸雞啦~

酸菜--好好味喎, 脆脆地, 微酸, 好開胃...

冬瓜瑤柱燉花菇--嘩!!! 舊花菇好大舊呀!!! 個湯都幾清甜, 係唔多見D瑤柱啫...

啫啫唐生菜煲--嘩!!! 好香呀!!! 好夠蝦醬味呀!!! 仲好夠份量呀!!! 正呀!!! 不過... 食個時發現有好大隻蚊LAY咗係菜頭隱蔽位, 即時打個折扣...

3 July 2011, Sunday

係樂茶軒 Lock Cha Tea Shop嘆完茶, 睇埋「博土造壺:香港陶瓷茶具創作 From Clay to Teapot:Tea Ware by Hong Kong Potters」專題展覽, 順道係香港公園逛一逛...

我都係第一次咁認真咁逛, 之前都唔知道香港公園係咁靚嘅...

汽球花--好得意呀!!! 脹卜卜o架... 仲好似蒲公英+黑芝麻嘅混合體...

人工瀑布...

可以行入瀑布入面... 好清涼呀!!!