Ken & Merry 為食男女，遊走世界!!!

31 August 2011, Wednesday

久仰由謝寧開設的「曲奇四重奏」嘅大名, 可惜平時冇咩機會去九龍城, 所以一直冇機會品嚐...

今日約咗識途老馬黃毛仔去九龍城附近探B, KeKe... 仲唔捉住佢帶路咩?!!

黃毛仔話曲奇四重奏搬咗鋪位, 新鋪位隔舊鋪位2條街... 呵呵... 真係冇搵錯人... 如果我自己搵, 可能又"中"咗去舊鋪位撲個空...

店內陳設簡潔而優雅, 寬敞而舒適...

一步入店內, 店員好熱情咁叫我地試食蝴蝶酥, 唔係剪到碎晒咁試, 而係比半塊你試!!! 嘩!!! 好大方呀!!! 攪到我鬼咁唔好意思, 話唔使咁大塊... 但係店員依然熱情地叫你試食半塊...

試食完蝴蝶酥, 我就叫黃毛仔介紹吓有咩曲奇好食, 另一個店員即時熱情地叫我地試食曲奇...

呢個就係試味CORNER, 有十款曲奇以上可以試食... 每一種味道係比半塊你試, 試多幾隻味真係晚飯都唔使食, 飽晒... 我食咗2-3隻味已經覺得好尷尬, 好似好貪心咁, 但係熱情嘅店員依然好落力咁叫你試試試試... 最後好似試咗6隻味以上...

店員建議首先試口感... 曲奇供應多款口感, 由最鬆化開始試, 逐層逐層上, 最後試到最脆口, 緊有一款啱你口味... 我以前冇為意自己鐘意咩口感, 今日一試, 先知自己原來唔鐘意太脆口(硬咗D), 又唔鐘意太鬆化(淋咗D)...

試完口感, 然後就試味道... 咖啡味好香濃... 開心果味好特別... 藍梅味有點... 果仁味都唔錯... 牛油味好香濃... 好似仲有試其他味, 不過試咗太多, 已經記唔到咁多...

最後我買咗蝴蝶酥, 咖啡味曲奇, 同開心果曲奇!!! 呵呵呵呵... (黃毛仔買咗十包以上, 我地勁似自由行落o黎香港搶奶粉)

今次又冇睇清楚價錢就亂買o野... 以為全部都係$48... 而家寫BLOG睇番張單... 嘩... 原來開心果曲奇要$70, 咖啡曲奇要$62... 好貴呀!!! 不過真係好好好味呀!!! 個包裝仲好吸引!!!

29 August 2011, Monday

早幾日同朋友食飯, 大家提到中秋月餅, 佢就勁推介東海堂十勝紅豆月餅好正... 我聽完即時雙眼發光... 紅豆呀... 十勝呀...

時不宜遲, LUNCH HOUR即買!!!

原先只係一心想買"1"個月餅咁大把... 唔想肥, 又想應節?!!! 只可以得1個月餅擺係屋企搞吓氣氛囉, 唔通玩層層疊咩... (以前細個成日數下有幾多個月餅罐疊起咗)

DEK米唔知價嘅我, 一問之下, 嘩!!!!!! 50蚊1個月餅?!! O咀-ing期間, 職員即力SELL東X咭優惠1盒4個就155蚊... 我同同事都冇喎, 正想轉身走人之際, 職員又力SELL任何CREDIT CARD都只係158蚊... 貴3蚊咋嘛... 早響啦...

腦海不斷催眠自己... "嘩... 即係唔使40蚊1個啦, 抵好多喎"... 最後...

又迷迷糊糊咁拎咗張信用卡出o黎找數啦!!! 我明明只係想要1個月餅啫, 點會攪成咁o架?!!

為咗慳10蚊, 結果使多咗110蚊!!! 呢條數真係用微積分都計唔掂啦!!!

以免自己失控食晒, 結果唔使2日已經送咗3個比人... 我一定要寫低呢篇BLOG, 得閒要拎出o黎警惕吓自己先得啦!!!

好搞笑地, 買完即刻響東海堂隔2個鋪位, 撞到勁推介呢隻十勝紅豆月餅果位朋友... 有冇咁橋呀?!!

是次每人消費約$160元
味道： 2 環境： 2 服務： 3 衛生： 3 抵食： 2
###

21 August 2011, Sunday

今日為家人慶牛一, 因為下午要觀賞芭蕾舞表演嘅關係, 所以選址就近嘅新元朗中心... 呢間「彩晶軒」新開張冇耐o架咋...

餐廳嘅入口極之金碧輝煌, 富麗堂皇...

未齊人, 睇一睇餐牌先... 嘩!!!!!! 「九大簋」?!!! 聽落好豪咁喎!!! 部長, 全部同我拎晒出o黎!!! 嘩咔咔咔...

餐牌話... 九大簋係廣東一帶嘅傳統盛宴, 寓意「長長久久」喎... 至於呢個新界圍村九大簋就有茄汁大明蝦, 農家筍炆肉, 紅蔥頭南薑走地雞, 砂盆陳皮扣大鴨, 盆滿缽滿, 脆皮門鱔球, 圍村燒肉, 鹽燒烏頭魚, 蜆蚧鯪魚球...

後尾部長話, 鹽燒烏頭魚同脆皮門鱔球賣晒啦... 我唔制呀... 自從祖母金盤洗手退出廚房之後, 我都冇食過門鱔啦... 我估呢2樣應該係最抵食同埋最好食, 如果唔係, 點會7點幾就話賣晒吖...

圍村燒肉--嗯... 韌咗D啫... 同埋硬咗少少, 又鹹咗少少...

農家筍炆肉--嘩!!!!!! 好好味呀!!!!!! 好重南乳味呀!!! 同埋D豬肉炆得好淋... 同細個時祖母煮嘅味道一模一樣呀!!!!!! 一D都冇誇張, 唔係剩係我一個咁講o架, 幾個「客家食神」都一致認同o架!!! 仲要用蠟燭台暖住食, 唔怕凍咗D汁痴埋一PAT, GOOD!!!

茄汁大明蝦--嘩... 咁大隻嘅??? 比人夾2夾已經冇晒...

21 August 2011, Sunday

今日要去睇芭蕾舞表演, 一早起身, 太古之友CALL食飯, 好, 食埋先去睇表演... 有得食, 明明唔夠時間食都唔理得咁多啦, 哈哈哈哈...

龍皇之前已經食過一次, 不過果次太多人, 根本冇機會比我影到相, D o野食就已經比人食晒...

全間龍皇都見到維港景o架... 咁好View, 食都食得心曠神怡D啦...

叉燒包--都幾好味吖...

蘿蔔糕--正呀, 好足料, 唔會一口都係粉...

菠蘿叉燒包--好味!!! 哈哈... 又係叉燒包... 我地真係好鍾意食叉燒o架, 之後仲叫埋叉燒腸添呀...

18 August 2011, Thursday

今晚係8月之星慶生飯局嘅大日子!!!

真係好好笑, 何超連續問DD同龍媽今晚點, 2個人都答佢唔係今日食飯, 係下星期四... 如果唔係問一問, 呢2位人兄今晚都唔知會去咗邊... 何超, 你係得嘅...

浦和日本料理嘅「刺身和食火鍋放題」唔會限時限刻, 可以由6:30PM坐到10:30PM, 簡直係為我地嘅八卦飯局度身訂造!!! 最怕果D入座起2小時就要埋單嘅放題, 因為次次都會有人大遲到, 攪到好似唔夠時間食咁, 仲要攪到大家驚食唔切唔敢講o野, 趕頭趕命咁食...

沙律/小食Japanese Salad & Snack--蟹籽沙律叫咗幾轉, 每一轉都要催幾次攪好耐先到... 蘆薈野菜沙律都唔錯, 枝豆都OK, 好似話鮮蕃茄沙律都OK...

刺身Sashimi
白玉豚刺身(Mackerel)--口感好奇怪, 淋PAT PAT一團o野咁, 一D都唔似魚, 冇人肯再食第2塊...
北寄貝刺身(Hokigai)--都幾新鮮爽口... 不過D冰好似未溶晒, 食到"索索"聲...
三文魚刺身(Salmon)--都幾新鮮, 而且厚切, 大大舊, 好膩, 食一舊已經唔想再食...
玻璃蝦刺身(Glass Shrimp)--冇味嘅... D肉都好似唔係太新鮮...

唔知點解我地一人齊, 服務員就奉上刺身, 唔係我地自己根據自己嘅喜好而Order, 咁點算放題呀... 我地唔想浪費D白玉豚, 係服務員夾硬放低...

同埋佢話刺身會自動出, 叫我地唔好再Order, 咁係咪只可以食一轉?!!

仲有... 放題餐牌話有吞拿魚刺身(Tuna), 八爪魚刺身(Octopus) , "魚立"魚刺身(Sea Bbream), 希靈魚刺身(Herring Fish)... 但係服務員又叫我地唔好再Order, 咁究竟呢幾種刺身係有定冇???

13 August 2011, Saturday

今日約咗貓兄再去香港歷史博物館睇展覽, 去之前緊係要醫下個肚先啦~

貓兄搵咗呢間「Al Bistro」, 地中海菜, 唔知係食D咩嘅呢...

餐廳唔算好大, 佈置簡約而優雅... 燈光就昏暗咗D, 比較適合D情侶用膳...

Set Lunch有3大類, Salad Lunch, Light Lunch 同埋 Executive Lunch!!!

Salad Lunch就有餐前飲品, 自助沙律吧, 餐湯, 甜品, 餐茶...
Light Lunch就係Salad Lunch再加個輕量嘅主菜, 有得揀奄列呀, 三文治呀, 漢堡包呀, 或者薄餅呀咁...
Executive Lunch就係Salad Lunch再加個有份量嘅主菜, 有得揀天使麵呀, 龍脷呀, 鴨胸呀, 牛扒呀, 大蝦呀咁...

我地最後Order咗2個Light Lunch...

餐包--D包都幾鬆軟, 牛油都幾香... 全部幹掉...

精選餐湯--豆蓉湯... 感覺好特別, 唔係好習慣, 但唔難飲...

12 August 2011, Friday

食完「鼎泰豐」同「The Chocolate Library」, 真係飽到上心口, 不過... 咁高興, 又點可以比佢停呢... 就算幾飽都好, 都一定要繼續踩落去... 仲要走埋蛋糕班嘅堂, 嘩咔咔咔...

金蒜粉絲蒸龍蝦--1斤左右, 好多肉, D肉仲好紮實, 配金蒜同豉油一流, D粉絲吸咗金蒜同豉油之後仲好惹味... "金蒜粉絲蒸"好過"芝士焗"好多, "芝士焗"焗完之後會蓋過晒D龍蝦味...

上湯雞絲生菜--因為太飽, 已經食唔落其他o野, 唯有清清地, 食D蔬菜清下腸胃啦...

佢有D龍蝦晚飯孖寶同三寶仲抵呀, 大大啖肉o架, 不過我地真係食唔落, 所以冇ORDER到, 下次要再o黎試下先得啦...

之前見好多人話佢晚飯出菜慢, 我地自己試過2次晚飯都覺得冇咩餸菜揀之餘速度又慢, 不過今晚膽粗粗再去食第3次, 終於對佢改觀... 速度同選擇都已經回復正常, 絕對食得過!!!

是次每人消費約$150元
味道： 4 環境： 4 服務： 4 衛生： 4 抵食： 4
###
地址 : 太古太古城道18號太古城中心三期1樓
電話 : 3691 9818

12 August 2011, Friday

話明係飲飲食食嘅吉日, 又點會剩係食「鼎泰豐」吖...

「The Chocolate Library」只係開咗幾個月, 名堂就已經響噹噹, 人人爭相擁至試食...

「The Chocolate Library Afternoon Tea」雖然2:00PM開始, 但係想食嘅話, 就要1:00PM到達9樓大堂登記... 1:00PM去到, 真係好多人排緊隊呀... 不過攪清楚之後, 原來佢地係排緊The Lounge & Bar, 服務員係著住紅色套裝嘅... 而「The Chocolate Library」嘅服務員係著住啡色套裝o架...

順利登記完之後, 就去戲院換戲票, 然後再返轉頭係Lobby坐一陣等上樓...

103樓係縮入咗半層, 可以望到102樓嘅餐廳... 咦... 好似係樓下食High Class好多喎, 個樓底高咁多...

D Sofa好舒服o架...

我地坐係餐廳嘅盡頭, 盡覽180度維港景色...

8 August 2011,  Monday

今日唔知戚起邊條根, 竟然會走去食潮州菜...

呢間「潮庭」之前係「潮江春」, 仍然係美心集團嘅酒樓, 希望唔係換湯不換藥...

餐廳內嘅裝修的確係靚過之前好多, 連張枱布都靚過人...

功夫茶+前菜--飲咗呢幾杯功夫茶, 全晚瞓唔著... 前菜辣辣地, 有齊我最鐘意嘅鹹酸菜, 豆腐, 花生, 好味, 清晒~

甘苦涼瓜排骨煲--嘩!!! 咁多涼瓜嘅??? 仲咁大件??? 睇落起碼有3個涼瓜係入面... 食落口居然好淋, 而且一D都唔苦, 只有甘味, 好利害呀!!!!!! 煲入面仲有好多大大件嘅鹹酸菜, 排骨都好淋, 最犀利係個湯底一D都唔油, 可以當埋湯飲, 清熱氣一流... 冇得傾, 清晒成煲一滴水都冇淨...

潮汕豬肚蒸雞--落咗紅棗同杞子一齊蒸, 好好味呀!!! 同埋好大鍋囉, 貪心食晒, 搞到搭小巴CHOK到差D嘔出o黎...

31 July 2011, Sunday

今日嘅戰鬥力真係好強勁!!! 10:30am 開始行科學館, 行埋歷史博物館, 竟然可以玩到 4:30pm!!!

想係尖東搵食, 週圍都過咗下午茶時間又未到晚飯時間, 激死... 唯有轉戰北角...

之前見幾個朋友都讚「榮式燒雞扒」好食, 所以轉程o黎試一試... o黎到先5:30pm, 仲未開門, 要係北角遊蕩一陣...

到咗6:00pm 終於有得食... 時間尚早, 餐廳內冇咩客人...

o黎得呢度, 緊係要試吓佢嘅招牌菜「榮式燒雞扒」!!!

榮式燒雞扒 拼 腸仔 配 咖哩薯仔汁 -- 招牌菜即係招牌菜, 皮脆肉嫩多汁, 調味適中, 上枱時仲熱辣辣... 腸仔好鹹呀... 咖哩都算幾好味啦...

榮式燒雞扒 拼 鱆魚蓮藕餅 -- 香脆非常的藕餅, 外脆內軟, 好Juicy, 食咗一半都仲好熱辣辣, 味道啱啱好... 意粉同D豉油汁好夾...

31 July 2011, Sunday

睇完香港科學館嘅專題展覽「愛因斯坦在香江 (Einstein in Hong Kong)」, 就過隔離嘅香港歷史博物館入面間「飲冰室 (Museum Coffee Corner)」, 食番個簡單快捷嘅午餐...

餐茶--凍檸茶冇檸檬味...

什扒餐--唔難食, 一般廉價快餐質數, 可惜一D都唔廉價... 而且... 冇咩肉, 叫「什骨餐」就差唔多...

香草芥末羊扒餐--等咗15分鐘先有, 太肚餓, 食咗一大半先記得影相... 個汁都係什扒餐個汁, 冇香草味, 芥末係辣嘅黃芥末, 冇芥末香味, 意粉好硬, 似未煮透...

坐位係自由席形式, 繁忙時間都唔算太爆, 唔想出去外面曝曬嘅話, 呢度係唯一嘅選擇...

是次每人消費約$45元
味道： 2 環境： 2 服務： 2 衛生： 2 抵食： 2
###

27 July 2011, Wednesday

今日Honey想去我之前食過讚不絕口嘅「菖蒲亭 Sho Bu Japanese Restaurant」食Lunch... 行到去菖蒲亭門口, 拉晒閘嘅??? 個招牌都拆埋??? 唔係執咗笠呀嘛??? 佢D午餐平均都要150蚊, 仲要日日爆滿o架喎, 咁都要執??? 唔係呀嘛?!!! 裝修吓咋嘛?!!

咁就麻煩喇, 一時間諗唔到去邊樹食, 個太陽又鬼咁猛, Honey話試吓呢間開咗1年嘅秋山書店, 我就千萬個唔願意, 因為我覺得書店+CAFE, D食物一定唔會好食得去邊, 同埋呢間CAFE嘅午餐都唔平, 要成50-70蚊...

行到門口, 發現12:45PM前埋單有7折, 咁都好D...

餐廳內有一排梳化位, 都幾舒服...

是日餐湯--忌廉湯入面已經落咗黑椒, 仲有D細細粒薯仔蓉, 都幾好味...

西柚青蘋果配吞拿魚長通粉沙律--所有材料都極之新鮮, 味道亦都恰到好處, 外面條街度有成三十幾度, 食呢味沙律真係好涼快又清新...

26 July 2011, Tuesday

今日又晨早醒咗瞓唔著, 有咗上次晨運嘅經驗(落到街週圍D食肆一間都未開), 今次起身Hea吓先, 跟住上網搵吓邊樹有早茶飲... 搵到呢間東匯開7:30AM, 唯有係屋企繼續上吓網, Hea到夠鐘先出門口...

未夠7:30AM去到東匯門口, 見到入面已經坐滿老人家, 好辛苦先見到最入嘅柱後面有1張枱未有人坐, 但係個服務員竟然叫我地搭枱, 我地唔肯, 佢又話等陣有人o黎都係要搭枱...

坐低咗, 入埋點心紙, 先留意到... 咦... 點解全部人都係齋坐冇o野食嘅... 同埋... 點解好似冇冷氣嘅...

等等等等等... 等到7:29AM, D食物終於一次過湧出o黎啦... D冷氣都開始湧出o黎啦... 咦... 好多人都係食盅頭飯喎, 8蚊咋... 其次就係大包... 好少人叫一籠籠嘅點心...

豉油皇銀芽炒油麵--好油呀!!! 同埋D麵淋PAT PAT, 仲冇咩味...

香煎蝦米腸--D腸粉唔使放入口都知道唔好食, 爛蓉蓉咁...

眉豆花生豬骨粥--D粥都煲得好棉, 不過冇咩味...

我地以極速食完走人, 避免有人搭枱...

21 July 2011,  Thursday

今日會去書展, 入場前係灣仔搵食... Honey極力推介近近地嘅「蘇浙滙」!!!

行到門口, 見到個名好勁... 「海派美食任品嘗」!!! 即刻唸起海派甜心, 哈哈~ 任點任食嘅午餐, 類似Buffet, 坐係自己個位畫紙仔等食, 唔使自己出去Buffet枱搶食物, 讚~

「海派美食任品嘗」包括10款精選冷菜, 12款精選熱菜, 5款精選湯羹, 12款精選點心... 一定可以搵到啱你心水嘅食物...

間餐廳嘅環境都幾好, 高樓底加水晶吊燈, 仲有卡位... 我地坐嘅櫈都好寬敞舒適... 坐滿客之後都唔會太嘈, 讚~

(前) 四喜烤麩--不錯~
(中) 上素鮑魚-- 好有鮑汁味, 仲好彈牙添呀, 聽講人多時係原隻鮑魚上o架, 好豪呀~
(後) 花雕醉雞--好好好入味呀!!! 雖然雞肉好實, 但好夠味, 依然讚~

(前) 本幫燻魚--皮脆肉稔, 都幾入味, I like it~

18 July 2011,  Monday

前文提要, 2星期前專程去「合時小廚」, 試食朋友極力推介嘅「生炒骨」, 可惜「生炒骨」要預訂, 撲空一場...

死心不息, 決定再去... 早一晚致電預訂... 結果...

拉姑 : 唔該... 訂位o架... 聽晚X點兩位, 要預訂埋「生炒骨」o架...
男侍 : 嘩!!! 你兩個人學咩人食「生炒骨」呀???
拉姑 : (愕然) (忍住度火) 我D朋友話好食嘛...
男侍 : 唉... 我比老細同你講...
老細 : 我地呢度冇「生炒骨」...
拉姑 : (更愕然) (堅持+忍住) 上次你話要Book位時訂埋嘅...
老細最後幫我留位兼留埋「生炒骨」...

查實收咗線之後, 越諗越把幾火, 佢地居然咁樣同客人講o野... 不過Honey話唔怪得人, 人地餐牌真係冇「生炒骨」... 好, 我就忍你, 食埋你個「生炒骨」先, 睇吓有幾巴閉...

到咗第2晚...

我地被安排係角樓最盡頭張枱度座... 角樓同樓面差不多大, 都係2排枱, 每排4張枱左右...

落單時表明預訂咗「生炒骨」, 但男侍應講極都話「千層咕嚕肉」, 佢見我咁堅持話唔係咕嚕肉, 係生炒骨, 佢就話去問吓先...

跟手, 老闆娘走上o黎So So, 佢解釋生炒骨係要去街市買新鮮豬肉整, 75蚊一D都唔貴... 我心諗"個生炒骨整得好食嘅話, 75蚊就緊係唔貴"... 之後老闆娘了解咗我係熟客介紹o黎, 就閃咗...

10 July 2011, Sunday

睇完「甚麼是明天 三十乘三十創意展」What's Next 30x30 Creative Exhibition, 就去醫五臟廟... 名家... 不二之選...

前菜6小碟--好o野!!! 有黑豆... 仲有蝦... 仲有豆角... 正呀...

D蝦仔醃到好入味, 甜甜地, 脆脆地, 一D都唔腥, 好好味呀...

鹽燒黃花魚--大突破!!! 係我努力游說之下, Honey終於肯試下... 條黃花魚燒完之後, 服務員第一時間捧出o黎, 條魚仲好熱, 一D都唔腥, 皮脆肉嫩, 用鹽燒一D都唔油仲帶出魚嘅鮮味, 好正呀!!! 我地好少會食魚, 因為怕腥, 以後我地可以有魚食啦~

紅炆牛肋骨--介紹過好多次... 一樣咁好味, 不過今次D骨好似大咗好多...

餐後果--終於等到西瓜出場!!! 西瓜一般甜啦, 但係每次食完韓國o野, 食一啖西瓜, 感覺就好似喉嚨比楊枝金露滋潤完咁... 好正...

4 July 2011,  Monday

幾個月前有個Friend極力推介一間位於西灣河嘅小店嘅「生炒骨」, 不過又講唔出店名, 所以我都無從入手...

上個月再見到佢, 佢繼續激讚, 仲拎咗幾張小店嘅卡片大派, 哦... 合時小廚... 個Friend仲教埋我邊幾個菜必點...

今日去開西灣河, 一心諗住試下呢個令佢讚不絕口嘅「生炒骨」, 點知... 原來要預訂先有得食o架... Oh No... (有其他食客o黎試食都係點生炒骨, 同我一齊撲空)

跟手Order個Friend話幾好嘅「豉油皇浸雞」, 點知又係要預訂!!! 好彩另外一個店員話有半隻, 我估有客訂咗半隻, 所以我先有得食... 好彩好彩...  (遲我小小o黎果個試食客人又係點豉油皇浸雞, 店員解釋唔預訂的話, 落單後要等45分鐘先有得食, 示意個試食客改ORDER其他食物... 今次我有得食啦, 果個試食客就2樣都撲空, 呵呵呵呵)

原來係咁嘅... 唔怪得之... 餐牌係搵唔到生炒骨同豉油皇浸雞啦~

酸菜--好好味喎, 脆脆地, 微酸, 好開胃...

冬瓜瑤柱燉花菇--嘩!!! 舊花菇好大舊呀!!! 個湯都幾清甜, 係唔多見D瑤柱啫...

啫啫唐生菜煲--嘩!!! 好香呀!!! 好夠蝦醬味呀!!! 仲好夠份量呀!!! 正呀!!! 不過... 食個時發現有好大隻蚊LAY咗係菜頭隱蔽位, 即時打個折扣...

3 July 2011, Sunday

HONEY近期開始學人玩3奶(茗茶), 今日佢帶埋2奶(單鏡反光相機)同埋大婆, 樂也融融咁一齊去金鐘香港公園嘅羅桂祥茶藝館茗茶...

餐廳內裝潢古色古香...一整櫃茶葉俱客人選購...

仲有茶具出售, 同埋呢度仲有茶藝導賞課程, 服務好全面...

二個人就一定要搭枱, 不過中間有屏風隔住, 搭枱都搭得舒服D... 好彩今日間餐廳得幾枱客, 所以最後都唔需要搭枱...
每張枱都設有爐具, 方便客人茗茶, 肯定水滾茶靚...

27 June 2011, Monday

阿頭突然興起請我地去酒店食午飯!!! 不過同事肚仔唔多妥, 所以我地唔可以瘋狂咁ORDER食物, 免得浪費食物...

呢度冇點心紙剔, 要睇MENU落單, 好彩ORDER小, 唔係嘅話, 真係記唔得晒想ORDER D咩, 實ORDER到亂晒籠...

同事讚嘆酒店即係酒店, 落地玻璃配無敵海景之餘, 枱布同食具都唔同平時太古坊食開嘅酒樓, 不過張櫈就CHEAP咗D, 估計夜晚套上櫈套就成為高貴嘅櫈...

服務就掙小小... 因為成個廳坐滿晒人先得果2個服務員, 完全不勝負荷...

香麻叉燒酥--好好味呀!!! 真係好酥呀!!! 鬆化之餘SIZE又易放入口, GOOD!!!

翡翠帶子豆苗餃--好多豆苗呀!!! 仲要係見到一條條o架, 唔係一PAT蓉咁都分唔到係咩菜... 味道都好重豆苗味... 皮薄餡靚... 

蟹籽鮑貝燒賣--D鮑貝... 食唔到有咩味... 不過粒燒賣結結實實, 味道穩打穩紮, 而且大大粒, 可以一試...

荷葉飯--賣相精緻... 可惜唔夠乾身, 濕咗D, 同埋冇咩荷葉味... 但材料十足, 可以一試... 到目前為止, 都仲係「福臨門」嘅荷葉飯最好味!!!

25 June 2011, Saturday

父親節押後一星期食, 唔使同人迫, 價錢又正常, 服務都好D, 仲唔使分時段限時限刻, 真係樣樣都好D...

原本想叫魚翅鮑魚餐(全包免加一), 不過幾個細路仔又冇理由加錢加人頭, 唔抵嘛... 所以最後決定散叫...

特式併盤--鴨舌暖暖地, 幾好味... D燒排骨就普普通通冇咩特色...

蝴蝶夾伴藕餅--食完都唔記得食過, 可以不理...

蒜片和牛粒--D牛肉好好味喎, 仲好易咬開, 正...

生猛龍蝦(芝士焗)(另加2個伊麵底)--D龍蝦好多肉好新鮮, 芝士伊麵好好味, 叫咗2個都唔夠喉...