3 July 2011, Sunday
HONEY近期開始學人玩3奶(茗茶), 今日佢帶埋2奶(單鏡反光相機)同埋大婆, 樂也融融咁一齊去金鐘香港公園嘅羅桂祥茶藝館茗茶...
餐廳內裝潢古色古香...一整櫃茶葉俱客人選購...
仲有茶具出售, 同埋呢度仲有茶藝導賞課程, 服務好全面...
二個人就一定要搭枱, 不過中間有屏風隔住, 搭枱都搭得舒服D... 好彩今日間餐廳得幾枱客, 所以最後都唔需要搭枱...
每張枱都設有爐具, 方便客人茗茶, 肯定水滾茶靚...
每位客人都要先點一客茶葉... 有幾十種茶葉任君選擇, 簡直花多眼亂... 我最後揀咗「古早味傳統烏龍(阿里山)」, 屬於青茶(半發酵茶)嘅一種... HONEY就揀咗「精選雲南普洱」, 屬於黑茶(後發酵茶)嘅一種...
嘆茶係一門好複雜嘅學問...
以下資料轉載自香港電台茗茶樂網站 http://rthk.hk/chiculture/tea/
茶含有豐富嘅黃酮類抗氧化物, 有效阻止游離基破壞身體細胞, 減低慢性疾病發生嘅機會率, 抗氧化物含量較一般飲品高...
茶含有胺基酸--「茶胺酸」, 對警覺性、專注力和集中力有正面作用, 綠茶、烏龍及黑/紅茶較易找到此功能...
茶含有植酸, 對健康人士冇咩影響, 但少女、孕婦和素食者, 應多吃高鐵食物來預防貧血, 喝過量的茶會影響鐵質的吸收... 孕婦、孩童、胃病人士、青少年、老年人、骨質疏鬆人士等，應避免喝過量的茶... (完)
服務員為我地奉上ORDER咗嘅茶葉... 嘩... 好大嘅陣容... 爐具, 紫砂壺, 公道杯, 茶杯, 茶盤, 竹具... 服務員一邊講解一邊泡茶... 三兩下手腳就完成泡茶嘅程序...
「精選雲南普洱」第二泡有D澀, 第三泡開始順滑...「古早味傳統烏龍(阿里山)」味道比較淡...
店內只供應20款「素」點心...
碧玉粉果--味道偏淡, 目的係襯托出茶味, 味道太濃的話, 就唔可以嗒真D茶味...
百合菜卷--OH... 勁多菇... 我嘅天敵, 要'了'晒出o黎... 餘下嘅卷都幾清甜爽口...
蘿蔔糕--個糕好結實, 煎得好香口, 不錯...
腰果花生糯米糍--好味呀, 好香腰果味, 我想食過幾舊呀...
紫米糕--好味呀, 甜度適中, 好多紫米...
三絲芝麻醬手切麵--見到個樣真係嚇一嚇... 近期係德國最出名嘅青瓜同芽菜一次過呈現眼前... 猶豫咗一陣, 決定食就食啦... 芝麻醬永遠都咁好味, 手切麵幾彈牙, 撈埋三絲係夏天食真係一流, 食完個人涼陣陣...
今餐價錢拍得住福臨門 Fook Lam Moon, 食物質數同味道相差十萬九千里... 服務更是熱誠中欠經驗...
如果大家想渡過一個閒情逸緻嘅下午, 呢度係一個不錯嘅選擇!!!
如果大家想滿足味覺上嘅神經, 都係去番福臨門 Fook Lam Moon呀... 西苑酒家 West Villa呀... 果D會啱你多D啦~
是次每人消費約$135元
味道： 3 環境： 4 服務： 3 衛生： 4 抵食： 2
###
地址 : 金鐘香港公園羅桂祥茶藝館地下
電話 : 2801 7177
留言列表
台灣分區飲食 (35)