Ken & Merry 為食男女，遊走世界!!!

11 June 2010, Friday

話說公司早前有大量"打柴"電腦出現, 一直無人處理, 叠到就到天花... 直到有一日, 有人上門問有冇舊電腦, 好壞都收... 嘩, 有呀!!!

Recycle錢箱有500蚊進帳, 發達啦!!! 有錢係手, La La 聲搵好o野食啦喂...

呢間日本餐廳, 之前TVB原裝入口有介紹過, 標題係「堅持傳統的日本料理 -- 日式家庭料理 -- 地道日本廚師為食客帶來媽媽的味道」, 大家有興趣的話, 可以去TVB嘅網頁瀏覽下...  http://mytv.tvb.com/foodandtravel/atasteofhome/3377/99#page-1

蒲燒饅魚飯配刺身定食 -- 饅魚好好味, 又大舊... 三文魚又大舊又新鮮, 好正呀!!!

銀鱈魚定食 -- 同事C比咗小小我試... 嘩... 好好好好好味呀!!! 又厚又大大件, 出面而家食唔到o架啦, 連Ichikawa都變得又細又薄, 攪到我對至愛嘅銀鱈魚心都淡晒, 但係, 估唔到佢呢度嘅銀鱈魚竟然仲咁正, 我一定要帶Honey o黎試下先得...

燒玉子 -- 見D網民話必吃, Order咗一客, 點知原來定食都有跟, 早知就Order其他小吃啦... 味道不錯...

同事L Order的天婦羅蝦烏冬定食原來跟埋軟殼蟹手卷o架...

午餐o黎計, 一D都唔平, 但真係物有所值!!! 服務亦唔係傳聞中咁差, 繁忙時間仍然保持到笑容, 算係咁o架啦...

大家想去嘅, 記得訂位呀, 好FULL o架!!! 同埋經常都唔開門做生意o架, 好利害!!!

好滿足的一天!!!

點知, 路過開咗只有幾日嘅貢茶, 佢地竟然仲飲得落, 利害!!! 我第一次飲, 聽同事C講珍珠奶茶好好飲, 咁我就揀咗珍珠奶茶... 我信佢就"真豬"!!! 坦白講, 茶味同奶味都唔夠, 雖然我從來唔飲奶茶, 但係我都識分好唔好味嘅...

上次有幸食到糖仁街嘅伯爵奶茶雪花冰, 果D就叫做有茶味啦!!!
http://hk.myblog.yahoo.com/ken-merry/article?mid=3517

是次每人消費約$140元 (未計貢茶)
味道： 5 環境： 3 服務： 3 衛生： 3 抵食： 3
###
地址 : 鰂魚涌涌芬尼街26-28號海暉大廈G&H舖
電話 : 2562 9600