真係成世人第一次住這麼漂亮的『商務』酒店！住過關島的Hyatt同九州豪斯登堡(Huis Ten Bosch)的丹哈格大飯店(Hotel Den Haag)，也是很漂亮的，但仍不及Sukhothai！
由酒店入口、大堂、餐廳、花園、房間，所有地方都很漂亮、很細緻，難怪會攞咁多獎喇！
一落Taxi已有專人替你取行李，check-in時每人送一束花(手繩)，check-in後有專人帶你上房、入房、介紹全房設備，專人送行李上房，每日換welcome-fruit(第1日3個柑，第2日1個木瓜，第3日2個蘋果)，每晚換枱頭floating-flower，每晚換床頭welcome-flower，每次返房都滿室芳香，夜晚搭taxi返去酒店入口有『食蕉』check車尾箱，可2點late check-out，只在餐廳碰過另一對香港人，可說是很少香港人，很寧靜、、、優點真係數唔晒！
酒店內
(水中花園真是浪漫極了，連續兩晚都有wedding banquet，好羨慕呵！)
kenmerry 拉姑 發表在 痞客邦 留言(2) 人氣()
第一天(2006年12月15日)，9:05am起飛，所以晨早6點起身，7點出門口，8點到機場check-in，時間全部較得啱啱好，跟住慢慢行去買吓八卦雜誌，過海關，過X-Ray，逛一逛機場內的店鋪，再慢慢行去Gate#2(超近)，剩番5分鐘，唸住時間較得啱啱好，點知原來班機delay咗15分鐘，唯有去埋厠所，仲有時間剩，咁咪週圍望下囉，見到登機指示牌亂晒龍，一時係CX Bangkok，一時係AA Singapore，一時係AABangkok，究竟班機係去邊o架？
上到機都仲好擔心自己上錯機，之後先知班機原來係去完Bangkok再去Singapore，嚇死人！
好彩我地早上機喳，如果唔係，d行李肯定冇晒位放呀！
黑仔事件簿：
1) 坐在隔籬的阿拉成日將隻腳週圍踏，仲踏係我地坐位前，好冇禮貌好擾人！
2) 坐在前面的老外成日整到成張凳郁晒，好似成張凳會冧落呢咁，好嚇人！到入境時更打我占，哼！
3) 個Hello Kitty行李喼到咗機鐵(香港站)就爆咗碌，攪到呢3日只可以用手抽，好鬼重呀！
4) 回程改坐位竟被改到廁所門口，同工作人員講明唔要廁所門口，唔知係佢英文差定有心，總之嗰3粒鐘就難挨喺喇，唉！
kenmerry 拉姑 發表在 痞客邦 留言(0) 人氣()
上星期五(2006年12月15日)唸住去曼谷玩幾日梳乎下，义下電，點知搞到日日瞓得6粒鐘都冇，辛苦過返工，嘔晒電。
短短數天，做了很多從未做過或未遇過的事，到了很多從未到過的地方，吃了很多從未吃過的東西。
由於大多嘢要寫喇，真係寫一個月都寫唔完呀！我會儘快向大家一一報告，請大家耐心等候！
(嘻嘻，其實係因為今個星期同下個星期大多party，所以冇乜餘暇寫blog咁囉！)
打後關於『曼谷 三日兩夜 濃縮之旅』的報導，有些可能會令你覺得un-believable，心想『拉姑，想係個blog度攪氣氛都不要寫得那麼誇張吧！』，對不起，打後的報導全是真的，信不信由你！
走著瞧吧！小心笑爆肚呀！
kenmerry 拉姑 發表在 痞客邦 留言(0) 人氣()
今日(2006年12月9日)原本打算下午回家後唔再出街，但回家後收到信用卡禮品換領信，忍唔住打咗去禮品換領中心check吓有冇貨，聽到電話錄音話冇貨，再同接線生check吓幾時有貨，點知接線生話今日返咗貨，叫我隨時可以去換領禮品。
等咗咁耐，緊係“那那聲”搭車去換領中心喇！落到銅鑼灣先5:45pm，換領中心收8:00pm，唸下唸下不如食埋晚飯先去換領中心，唔使抽住隻DVD錄影機去食飯咁麻煩。
咁啱路經銅鑼灣廣場，咪不如去睇吓嗰間成日排晒長龍、冇可能入倒去食嘅嗰間小籠包有冇位囉！去到小籠包門口原來未開門，已有人排隊等候，我地唔執輸排埋一份，6:00pm，開始進場喇！第一次嚟，人生路不熟，見個二人餐幾抵食咁，就二人餐喇！
鮮肉小籠包：好味，拍得住翡翠小籠包
脆鱔：超好味，連唔食魚嘅honey都不停口咁食
炒麵：好味，正合我胃口
桂花拉糕：好味，好正，好清香
其他：不過不失
kenmerry 拉姑 發表在 痞客邦 留言(1) 人氣()
今晚(2006年11月30日)一早約好力高同KaKaMa到尖沙咀海港城的Crabtree掃貨，因為今日開始一連四天Christmas Preview -- VIP有七折，人山人海，還有3-4個食蕉進行人流管制，排咗一陣隊先入到去，超誇張的！入到去首先執咗好友們(龍媽、無敵、同事丙等等)的order，然後才慢慢選購自己的心水貨品，今次終於比我買倒Home Fragrance Diffuser喇，等咗成年幾先至再有貨，真係太好喇，昨天及今早的不幸衰運終於遠離我了！心情輕鬆好多！今次主力買之前未買過嘅產品，包括Fragranced Botanicals，Bath & Shower Gel (Rose，Lavender，Nantucket BRIAR)，Body Scrub (La Source)，還有2個Christmas Gift Set！呵呵！攞到番屋企，手指變咗『羅玆威以』咁款！不過力高同KaKaMa都唔弱o架！
喪買1小時後，即閃到La Taverna 吃意大利菜為力高賀牛一，貓頭夫人還未到！手電隨即響起，貓頭夫人問我地去咗邊，我仲賴醒即答：『到咗喇！』。原來佢頭先係Crabtree門口見到我地掃貨，但係因為門口有食蕉，同埋佢要去買d嘢，所以冇叫我地。結果、、、唯有自己一個人行過嚟喇！
齊人點菜，但好多菜名睇唔明，唯有等店員推介。我地Order咗：
1) 蒜蓉包
2) 凱撒沙律 (Caesar Salad)
3) 軟水牛芝士蕃茄香草沙律 (Buffalo mozzarella, tomato slices, & basil)
4) 燒小羊排 (Lamb Chop)
5) 三文魚義大利雲吞
6) 蜆肉意粉 cream source
7) 拿破崙 ice cream
kenmerry 拉姑 發表在 痞客邦 留言(0) 人氣()
早排與KAKAMA同埋貓頭夫人計畫的Spa Relax之旅，我脫腳了！真的對不起！
最後大家都係去曼谷，只是分成了兩小隊，KAKAMA同貓頭夫人11月先去4天打頭陣，我同honey隨後12月會去3天！(11月真的忙，至今仍未完成所有工作，好彩我冇被貪玩的心蒙敝了理智，不顧一切的跟她們倆在11月去曼谷，否則Die Hard！)
自從04年7月中去過北海道旅行後，便沒有再去真正的旅行了。05年6月頭去台北，主要是去看Computex的，只玩了2天。難得下個月可以去旅行散心，本來很開心，但行程一經曝光後，竟被要求順道公幹一下。什麼？去3天，第一天要公幹，咪只剩2天？Oh no....
但係都好過冇喇！honey說得對，只要有得去玩，我就乜都得(唔理會去邊，唔理有乜玩！但要坐國泰、住五星+)！當然喇！機械人間中也要關掉來維修一下喇！
第二天我們計劃(我們的第一次)落Green打18洞，第三天做Spa享受一下！
kenmerry 拉姑 發表在 痞客邦 留言(3) 人氣()
昨晚(2006年11月16日)由於KaKa媽要為貓頭夫人及力哥賀壽，所以大家約咗出嚟食飯，地點由力哥揀，由於力哥好想食鵝肝，所以佢揀咗食法國菜。
力哥 -- 上次你第二次話要食鵝肝但又放咗飛機，我已千叮萬囑不要再吃鵝肝了，結果、、、
鵝肝其實唔吉利我倆！已經係第三次喇！係第三次力哥你好想食鵝肝，跟住又放咗飛機！
我不是怪你，只係希望你信下邪！
返翻正題！
晚餐有三道菜($188)及四道菜($208)選擇，包tea/coffee，法包(跟牛油)任吃。我地三個都揀咗3 courses，唔要湯！我的選擇係：-
頭盤: 凱撒沙律 伴 香煎大蝦 (OK，d蝦煎幾好食)
主菜: 香煎海鰽魚 伴 什菌意大利燴飯 (OK，不過不失)
甜品: 朱古力心太軟 (失望，朱古力唔香，又焗得唔夠，唔合格)
真係SOHO區都唔一定好吃(註：不難吃唔等於好吃)！但氣氛同裝修都OK，同另一半唸唔到食乜時都可以一試！
同場加映：隔離枱兩男三女，男左女右；三女悉心打扮，放晒電；兩男落力表現電話搶火，又表現魔術，笑吟吟；正所謂姣婆遇着脂粉客，好嘔心，Waiter，『那那聲』埋單呀唔該！
地址: 中環蘇豪伊利近街45號地下
kenmerry 拉姑 發表在 痞客邦 留言(2) 人氣()
今晚(2006年11月9日)係【十一月之星聚餐】嘅大日子，大家去咗尖沙咀『南山谷韓國居食屋』賀一賀佢。哈哈、、、但係我唔打算係度向大家報導！點解？事原係、、、
七點半左右齊人，由於大家都勁餓，所以“拿拿聲”order食物，而d食物一到，就好似跌咗落充滿食人魚嘅河入面咁，“渣一聲”冇晒！食咗三、四輪之後，到我醒起要影相寫blog時，都冇乜好影喇！所以、、、算吧喇、、、
原本一早食完可以鬆人，大家都笑住話『唔慣咁早食完返屋企』，但係尋日有三個墟咁多，傾吓傾吓，已經十點，大家喺充滿歡樂嘅氣氛下離開！
行到樓下，路過上樓前發現嘅甜品店，大家行個注目禮，其中五人(無敵、貓頭夫人、高瘦平、龍媽、同埋我)被一股“神秘力量”吸咗入去！呀呀呀呀、、、
坐定後睇睇個menu，嘩嘩嘩，個menu入面樣都咁吸引，好難決擇呀！
最後我order咗“草莓白肉霜蜜豆沙”(左圖)，龍媽同無敵就order咗“芒果聖代”(右下圖)，貓頭夫人同高瘦平就order咗“枺茶杏仁豆腐芭菲”(右上圖)。
人地幾個人share一個，我地就一人order一個，呵呵呵呵、、、食物一到，大家瘋狂影相一輪，影到d軟雪糕都溶到滴落地，“拿拿聲”食喇！一路食一路逐樣材料研究，話題不絕，食得好開心，最後結論係我order嘅“草莓白肉霜蜜豆沙”最抵，因為材料同分量都係最多！正正正正正！
回家途中，充滿愉快的感覺，所有唔開心嘅事都忘記晒，太棒了！
kenmerry 拉姑 發表在 痞客邦 留言(1) 人氣()
星期二晚(2006年10月24日)要同貓頭夫人、KaKa媽開旅遊大會，順道開大餐。貓頭夫人中午時比咗幾間餐廳比我地揀，最後大家揀咗壽司廣，雖然貴d，但KaKa媽出得嚟食飯，咪揀間好d囉，試吓新嘢嘛！
一坐低，侍應生就幫我哋斟酒--桃酒梳打！(當我見佢斟d清澈透明的液體時，我好緊張咁問佢：『呢d咩嘢呢o架？』『吓！桃酒！我唔飲得酒個噃！』個侍應生冇理我，繼續斟)
原來貓頭夫人同我都因為皮膚敏感，所以唔飲得酒，最後KaKa媽一陣就乾晒成杯，貓頭夫人飲飲下都飲晒，而我只咶了一下，都幾好味！
跟住就放低兩碟前菜！
我哋經一輪商議後，order咗兩個$450套餐，再加菊花蟹肉，同埋三文魚沙律手卷(1.5份，係侍應生建議的)！
當每樣食物一上枱， 三位Blogger即瘋狂用手機拍照(我第一次用Nokia N80影相，所以全部OutFocus)，瘋狂程度令到隔籬枱一男一女也為之側目！拍完照才慢慢開始品嚐！
蟹肉充滿海水味，好鮮！醋味水雲好開胃！握壽司好味！三文魚沙律手卷乾咗d！煮物好味！麵豉湯好濃，好味！天婦羅好好味！桃味雪芭好味，略甜！
食食下，侍應生話d嘢嚟晒，叫我哋加單，咁我哋咪叫佢比個餐牌睇睇囉！睇完餐牌，先發現好多食物都未嚟，個侍應生check完後話我哋order咗兩個$320套餐，d嘢嚟晒啦！唉！原來係個侍應生落錯單！
kenmerry 拉姑 發表在 痞客邦 留言(1) 人氣()
今日(2006年10月15日，午)得一條冷，唔知食乜好，醒起鄰居乜生之前說過UNY的八爪魚丸特別好食，唔知真定假！但係又醒起早幾日睇OpenRice見到全港最好味、最似日本嗰d八爪魚丸間店鋪叫『築地』！
嗶嗶嗶嗶、、、咦？UNY嗰間八爪魚丸店咪好似叫『築地』囉？唔得，要去睇睇！
因為得一條冷，所以可以無拘無束咁走去UNY八吓！早上做咗M6+Facial+大量重型家務(包括去超市及洗衣店)，更加想食八爪魚丸，因為好耐冇食過！行咗15-20分鐘，終於到達，嘩，原來今日UNY會員有95折，咪好多人，死得！
行多幾部去到UNY超市入口，呀呀呀呀、、、真係『築地』呀！點解我咁遲先留意到o架！(註：都開咗幾個月o架喇！)
即刻跑去排隊，貼著玻璃見師傅將啲八爪魚丸碌嚟碌去，好肚餓呀！排到我時，唔知點解好緊張，可能因為唔知點order喇！最後照抄排前面嗰位太太嘅order，要咗「小舟套餐」，成為$28蚊(6粒$25，加$3飲抺茶) 。 有2隻醬汁選擇，再加鰹魚片、紫菜碎同蛋黃漿上去。
(嘻嘻！事隔一天，帶同事C嚟試下時，用手電拍下照片，圖為「小舟套餐」，成為$39蚊(10粒$34，加$5飲2杯抺茶) 。
跟住鼠咗去Food Square到食，一咬落去，wow！熱辣辣，d皮好脆，八爪魚肉大大舊又彈牙， d醬好好味，話咁快就食哂6粒八爪魚丸。再飲啖冰凍抺茶，Yummy！真係想即刻買多一盒再剎過吖！好，聽晚同honey再嚟過！Yeah！
味道： 5 環境：N/A 服務： 4 衛生： 5 抵食： 4
kenmerry 拉姑 發表在 痞客邦 留言(1) 人氣()
台灣分區飲食 (35)