Ken & Merry 為食男女，遊走世界!!!

21 September 2009, Monday

較早前收到DD通知, L’Eclipse推出「生日之星」優惠, 顧客於生日月份內與親友到L’Eclipse用膳, 每一天都可享免費大餐!!! 咁抵??? 我地一眾9月之星緊係要拿拿聲Book位啦!!!

誰不知... 先遣部隊DD食完之後, 叫我地都係轉第二間啦... 嘩... 唔係咁大鑊呀嘛??? 係唔想煩(再搵第二間)同埋驚DD嘴刁嘅情況驅使下, 我都係決定要同Honey去了解下...

一坐低諗都唔使諗, 就隊龍蝦先!!! 澳洲龍蝦、龍蝦蚶、迷你龍蝦仔、波士頓龍蝦... 嗯... 最好食都係波士頓龍蝦, 配紅酒汁好夾(全晚最好, 食多幾隻就值回票價)... 再o黎多一Round先!!! 青口肉好細粒, 食之無癮, 棄之有理!!!

每名顧客可從原隻鮑魚、燕窩薑汁蛋白布甸、煎和牛及比目魚四款主菜中選兩款美食... 網民大比數話燕窩薑汁蛋白布甸最好, 但係食落冇咩特別啫, 至於鮑魚, 真係又細又冇味... 和牛就好軟腍, 味道都唔錯, 但係好細舊囉...

刺身得4款, 三文魚好多筋, No Good!!! 壽司賣相麻麻, 唔想浪費個胃嘅空間... 沙律都OK新鮮...

16 September 2009, Wednesday

又到一年一度標月餅會嘅時候... 第一餐... 全新女子組合... 成員主要來至「四塵俠」Mix「台山四寶」... 嗯... 重未命名, 哈哈哈哈!!!

原先係約咗14號食, 果朝1號風球, 鑽媽已經打電話問我"需唔需要"改期... 嗯... 我想講話, 佢搵錯人囉, 我呢D神瘋敢死隊, 八號照出都冇有怕, 哈哈哈哈!!!

返到公司又到龍媽MSN我, 佢就醒得好多啦, 佢斬釘截鐵咁話, 佢想改期!!! 咁咪改囉, 哈哈哈哈!!!

「巨爵」不負佢地嘅厚望, 真係打得成... 香港天文台係2009年09月14日17時55分發出八號東北烈風或暴風信號, 不仼我地改咗期...

當日鑽媽一坐低就不停叫肚餓, 叫個沙律比佢頂住先...

西柚牛油果沙律--西柚肉肥肥短短, 好可愛...  牛油果同燻豬肉(bacon)好似唔多Match...

仲以為佢食完個沙律會叫飽, 估唔到佢一陣又叫餓, 廋人嘅身體儲備果然真係小過人...

12 September 2009, Saturday

因為Honey要去澳門工作一天, 咁啱佢有朋友原來早一個星期六去咗澳門睇煙花, 同佢講話幾正, 又唔迫人... 咁我地就係毫無Planning嘅情況下, 臨急臨忙決定等Honey工作完, 我地就Join埋一齊去睇煙花, 所以當晚嘅回程船飛已經冇晒, 只係剩得23:59嘅豪華位...

Honey一早9點就出發, 我就2點半先施施然咁係碼頭食埋味千拉麵出發... 去到澳門第一時間去"不勞而獲手信街"狂食試食, 當然都會買D返香港慢慢嘆啦... 跟住就去上次貓兄帶路嘅甜品鋪食糖水, 然後先去瑪嘉烈蛋撻會合Honey(我又再隊多2個葡撻), 最後先去澳門塔...

我地Book咗BBQ Buffet, 因為未夠鐘入場, 所以週圍逛影下相...

我地呢張枱係最近海邊果行, 又係最近評判席嘅, 仲唔使同人搭枱, 真係萬幸...

現場仲有Live Performance...

6 September 2009, Sunday

難得有一個星期日係冇o野做, 好想Hea下... Honey提議去赤柱食, 有得食, 我實贊成o架, 嘻嘻...

12點入到赤柱, 週圍都冇咩人, 正!!! 行到去美利樓, 又唔想再食德國Buffet, 睇o黎睇去, 都係呢間越南o野吸引D...

我估太早, 所以餐廳內得幾枱客, 我地可以揀露台位或者室內(有冷氣)... 我見都有D風, 坐露台好似Relax D喎...

環境好正, 天花板上面仲有D葵扇, 不過似裝飾品多D...

Mango Tango--呢杯好似係菠蘿+芒果+蘋果冰冰... 冇記錯嘅話... 好好味, 透心涼...

Saigon Brew GLS--估唔到杯越南生啤咁大, 晨早流流, 點飲得晒...

Pomelo Salad 柚子乾蝦沙律--材料都幾新鮮, 魚露好似重手咗D, 都幾鹹...

1 September 2009, Tuesday

比間金田整到Down晒, 緊要搵D美味嘅甜品補番數...

力仔提議去食雪花冰, 我第一個舉腳贊成, 因為好耐之前睇咗飲食男女嘅介紹, 一直都未有機會試...

我地Order咗2個Share食...

季節限定 (巨蜂提子+水蜜桃) -- 超超超正!!! 不過我地錯咗次序, 應該要食咗清香嘅水蜜桃先, 然後先食濃郁嘅巨蜂提子...

伯爵奶茶--仲仲仲正!!! 連平時唔飲奶茶嘅我, 都覺得好香茶味, 仲好滑... 咖啡凍好濃咖啡味, 正!!!

D雪花冰溶得好快, 下次都係食完一個, 先好Order第二個, 唔使食到趕頭趕命...

後尾返屋企溫下本飲食男女, 原來元朗嘅綿綿冰都係香港雪花冰甜品店嘅先驅... 諗下諗下... 咦... 好似舊年生日龍媽已經帶咗我去食... 我竟然仲以為自己未食過雪花冰, 好老人痴呆呀, 哈哈...

是次每人消費約$25元

1 September 2009, Tuesday

旅行完之後食完一餐又一餐... 今次到咗拉力早敍餐... 目的係派手信...

之前食過呢間幾好, 價錢又OK, 所以就提議o黎呢度, 諗住話開懷大食一番... 點知... 之前食過都OK嘅食物, 今次變得好唔OK...

蒸蛋--唔得, 冇味...
蒜片牛柳粒&薄燒牛肉--全餐叫做OK小小...
芝士年糕--好膩...
凍豆腐--冇味...

魚生&壽司--全部都唔新鮮, 最得人驚... D吞拿魚會留D紅色水出o黎, 好驚佢係染色o架囉... 松葉蟹腳棒壽司D蟹腳棒又係出水, 好似食塑膠咁, 好恐怖...

秋刀魚&鯖魚--尚算OK...

24 August 2009, Monday

追完一篇Blog又一篇Blog, 氣都咳... 完成歐洲之旅, 食埋老豆餐生日飯, 隨即又到長頸鹿嘅生日飯... 今次暈妮高度重視, 竟然要請假出席, 實在嚇大家一跳...

醉鴿--一隻鴿可以切開咁多片, 果真鬼斧神工, 嘆為觀止... 味道方面... 當然Yummy啦...

招牌小籠包--都OK, 唔使比人拆招牌, 哈哈...

松子魚(半條)--賣飛佛... 又一神奇之作... 點解半條魚都可以整到咁大碟嘅呢...

脆皮蔥油雞(半隻)--我覺得似例牌多D, 食咗1舊已經冇晒... 味道OK...

鐵版牛柳--呢味最奇, 聞到隔離上枱時勁香, 所以Order... 但係入口冇咩味...

23 August 2009, Monday

嘩, 呢篇Blog都算擺得耐囉... 皆因之前去歐洲旅行嘅相同Blog都攪足一個月, 真係超辛苦!!!

旅行完返o黎, 要食老豆餐生日飯, 都唔知我二姊點搵到呢間o野... 二姊強調呢間係蔡生推介, 雖然係大牌檔，但係有冷氣嘅... 佢仲要講錯個名, 等我去OpenRice點Search都Search唔到, 又話唔知地址, 又話冇得Book位... 好彩我死唔信佢, 上網左搵右搵, 終於比個電話佢, 叫佢打去Book定位, 唔係咁大棚人, 去到冇位都幾係...

行完黃金再去, 行錯咗反方向, 再行返轉頭, 行都行死我, 成身出晒汗, 下次唔好再預我, 唔該...

椒鹽瀨尿蝦--好正, 細細隻都好多膏, 讚!!!

蒜蓉蒸勝瓜--出奇地好味, 值得一試!

小食拼盤--佢地大家話幾好味喎...

砵仔焗魚腸--見大家食到舔舔脷, 平時唔掂嘅我都係好奇下食咗一啖, 都OK喎...

Fussen, Germany

新天鵝堡Photo Spot位...

攝影小組女隊員又再大合照...

有飛機劃破長空, 影低佢先...

Fussen, Germany

Treff Hotel Luitpoldpark Fuessen--食早餐啦!!! 早餐選擇都幾多, 不過到咗最後一日行程, 冇咩心機食, 食到'拉姑托腮'咁款...

今日主要行程係參觀位於浪漫之路(Romantic Road), 由巴伐利亞王路易二世所建嘅新天鵝堡!!!

我地首先坐巴士上山頂, 係瑪麗橋觀賞新天鵝堡, 然後行落山中間嘅新天鵝堡, 入內參觀, 再行落山睇埋舊天鵝堡...

嘩!!! 原來Marienbrucke下面係萬丈深淵呀!!! 好驚呀))))))