Ken & Merry 為食男女，遊走世界!!!

29 December 2009, Tuesday

今年聖誕節嘅壓軸重頭戲, 就係同幾個傻妹食Buffet...

我呢個做大嘅, 同佢地講"去旺角Langham Hotel"食Buffet, 點知自己Book錯尖沙咀Langham Hotel, 老人痴呆症嚴重發作... 好彩佢地發現得早, 過咗2個星期再打去旺角Langham Hotel都仲有位Book啫, 唔係嘅話, 都唔知點算...

門口呢2個薑餅人Rock味十足, 好搞o野...

仲有聖誕火車, WoW...

我地有1個梳化位坐, 都算唔錯... 仲o係正Buffet枱側邊, 拎o野食都快人一步啦...

開放式廚房, 個廚師成日响入面唔知整咩, D火燒到上天花, 可惜捕捉唔到果一剎那...

26 December 2009, Saturday

近年8B人數直線上升, 聖誕Party越攪越迫, 基本上, 如果全體出席的話, 已經冇一間屋可以容納到咁多人...

所以有不少聲音相繼出現, 提議出街食... 可能因為一家幾口出街食, 消費比較高, 所以只係得提議, 冇實行... 今年同貓兄舊事重提, 結果一拍即合, 終於成事, 不過... 得我地兩丁友, 哈哈...

呢間餐廳其實之前想試好耐, 因為可以食足4個半鐘, 啱晒我地呢D講極都唔完嘅人...

今次坐位好正, 卡位好舒適, 仲要係正Buffet枱側邊, 拎食物極之方便... 趁貓兄未到, 玩下自拍先...

因為係Christmas Buffet嘅關係, 所以餐廳準備咗D飾物比客人... 當然我地冇用到啦, 哈哈...

有我至愛嘅蕃茄羊奶芝士, 正!!! 仲有烤四色蔬菜, 健康又美味, 正!!! 柚子蜜柑沙律, 又一Encore之作, 正!!!

10 December 2009, Thursday

是日放假一天!!! 原本想去米芝蓮三星嘅龍景軒試下, 可惜... 竟然Full Booking... 退而求其次, 打去米芝蓮一星嘅夏宮... 都Full... 唉... 家下又唔係派米, 點解會咁多人食架?!!

結果走咗去無雷公咁遠嘅廸士尼酒店嘅晶荷軒!!! 呵呵, 佢吸引我嘅地方唔係食物, 而係佢門口嘅水晶荷花!!! 原本N年前Honey送過一個比我架, 不過比清潔阿蟬"粉碎"咗, 真係Hurt到而家...

入口仲有個荷花池嘅投射影像, 好得意...

裡面嘅裝修都好靚, 而且座位仲好寬敞...

原本呢個餐最小係要Order 4人份o架, 不過問D侍應又話2人份都可以...

巧手燒鵝拼蜜汁叉燒--美心水準...

1 November 2009, Sunday

Honey今朝晨咁早, 7點左右就要出門前往數碼港, 參加「健康萬步數碼港2009 (CyberRun for Rehab – Healthy Steps in Cyberport 2009)」, 不過佢唔係參加賽跑, 而係參加步行, 全程4公里...

http://www.cyberrun.hk/

佢同Mr. 太古之友行完, 就o黎灣仔Join番我同Mrs. 太古之友, 去福臨門嘆一盎兩件...

嘆茶時, 「宮心計」嘅蔡尚宮(程可為)竟然坐咗係我地隔離枱, 帶住副超, 好有星味... 「畢打自己人」嘅殷賞(毛舜筠)就坐咗係蔡尚宮隔離枱, 即係我地斜對面, 真人同上鏡都差不多... 唔知係邊樹傳黎一下好強勁嘅閃光燈, 嚇到我都忍唔住週圍望...

食飽後隨即去西九「香港美酒佳餚巡禮」(10月30日至11月1日)逛逛... 係入面又見到名廚Ricky Cheung, 今日都真係見到多名人...

http://www.discoverhongkong.com/hkfoodandwineyear/celebrations/tc/overview.jsp

前往時近距離路過西隧口...

今日超熱, 好似比太陽乾煎咁, 煙霞又勁, 短短路程, 已經感覺想死... 終於可以行到去入口啦...

16 October 2009, Friday

十月都仲有得食霸王餐? 有咩咁出奇!!! 因為王者永遠都鐘意改期N次, 最高峰果次, 好似改咗14次... 幾日前可能會落雨又唔出, 幾日前天氣可能會凍小小又唔出, 有電視劇睇又唔出, 星期六日又唔出, 冇心情又唔出... 如果佢有一次唔改期, 咁就真係唔正常...

今次呢間食府並唔係我揀嘅, 而係王者之前同朋友食過, 話覺得幾好食, 所以帶我去試下... 因為約咗之前係觀塘返工嘅王者係地鐵站等, 而我近日又忙於耕種, 所以我冇上網check點行去... 結果... 佢竟然帶我遊花園!!!

總共行咗2條天橋, 仲要穿過鬼咁多人嘅巴士站ssssss... 我真係覺得行得好辛苦, 對皮鞋又整到對腳好痛, 空氣又污濁, 仲要唔知佢仲要遊幾耐花園... 問多佢2句, 仲話我"吉頭吉世", 真係激死我!!!

入到間餐廳仲谷氣... 全間鋪得幾枱人, 全部都係2個人坐4人枱, 職員偏偏帶我地去最角落頭嘅2人枱, 又暗又迫, 感覺好Dirty!!! 同職員講要換枱, 佢話冇得換, 但係當時有超過40-50張枱係未有人坐嘅!!! 仲要之後個職員經常企咗係隔離枱, 連緊有嘅光線都比佢遮埋, 天狗食日咁... 上多2碟o野都冇晒位, D職員都唔理得你咁多, 連本應可以放低碗筷嘅位都比佢地擺埋食物...

什錦刺身(松)(6款)--三文魚感覺好奇怪, 同平時食開嘅唔一樣... 吞拿魚除咗冰凍之前, 就食唔到有咩味... 唔知咩貝類海產, 食咗一啖都唔敢再食... 白色嘅唔知咩魚, 口感極劣... 魷魚切絲, 幾爽脆... 甜蝦都唔知點比Comment...

炸軟殼蟹卷(4件)--我鐘意食元氣嘅軟殼蟹手卷多D...
燒銀雪魚(2件)--嘩!!! 大開眼界!!! 片魚竟然可以切到咁薄, 煎完之後, 2面脆, 中間冇晒肉...

6 October 2009, Tuesday

轉眼又到十月之星叙餐!!! 龍爸問龍媽"又食???"... 哈哈哈... 唔止佢有咁嘅疑問, 其他成員同我都有同感...

跟住地圖行到o黎, 先發現係"九州市場"以前的位置... 十年前我地都係坐房, 仲係呢度宣佈人生大事... 估唔到全部人都記得...

席間無敵話我冇交功課(9月之星日式放題 銀座藏人), 其實係佢冇上堂至真呀, 人地一早趕起咗份稿啦...

何超Book咗房, 一閂埋度門, 出面真係咩都聽唔到, 私穩度極高... 房內仲有空氣清新機, 抵讚!!!

每人一碟牛肉汁, 蔥花, 伴肉吃感覺冇咁油膩... 麥茶仲可以要凍嘅, 服務一流...

前菜碟碟都唔錯, 右下角果碟仲從未食過, 估計係牛蒡... 我地9個人比咗18碟, 份量都算足...

5 October 2009, Monday

剛食完冇耐嘅金不換又食?!! 皆因見佢幾好味, 環境舒適價錢又唔貴, 就同力仔o黎呢度慶生啦!!! 仲可以邊食邊睇"幻彩FING啷啷", 哈哈...

西柚沙律--今次嘅西柚肉好似乾咗小小...

燒鱔--上次走漏眼, 原來超好食, 肥大肉厚, 味道又好...

咖哩羊--呢個甜甜地嘅咖哩配蒜蓉包一流, 可惜羊肉得好小好小, 仲肥糕多多, 早知叫第2樣肉...

南瓜布甸(凍)--口感唔似布甸, 味道似椰汁糕, 有D失望...
芒果糯米飯(凍)--一人份已經有齊紫米同糯米, Good!!!

3 October 2009, Saturday

上星期六要做節, 所以都冇咩節目可言, 唯一嘅節目係返到屋企樓下影下月光...

4 October 2009, Sunday

第二日約咗Honey嘅朋友遊船河追月!!! 5點係銅鑼灣避風塘碼頭上船, 太陽落山, 清風送爽, 好舒服呀...

哈哈... 一上船第一時間"曬冷"!!!

途經早2年鬧得熱烘烘嘅西環泳棚... 坦白講, 我覺得好危險, 水流咁急, 又多船駛過!!!

27 September 2009, Sunday

期待已久嘅一餐, 上網做足資料搜集, 未睇menu已經有晒心水... 叉燒包, 蝦餃, 雞札, 百花脆皮腸, 鮑汁荷葉飯... 但係合我地二人之力, 又點可能食到咁多樣吖... 唯有放棄雞札...

叉燒包--都好好味, 但係就冇"頂尖級"嘅感覺...

百花脆皮腸--呢個腸粉真係一流, 用腸粉包住腐皮再包住蝦膠, 3重口感!!! 最驚喜係條菜, 竟然又甜又冇渣又軟硬適中, 果然一絲不苟!!!

鮑汁荷葉飯--侍應好好人, 問係咪要影相, 仲建議我地未開荷葉前影一張, 開咗又影一張, 仲自動波幫我地擺好晒靚位影相...

23 September 2009, Wednesday

今晚標咗8B月餅會... 呵呵呵呵... 多謝大家!!!

一坐低見到筷子套係百人一朱的, 即時回憶起N年前好鐘意同Honey去新開嘅Hollywood Plaza間百人一朱撐枱腳, 不過已經係好多年前嘅事...

我到達時, 貓兄同DD已經鑽研緊餐牌(寫Number落單), 由於係放題, 所以我地3個先Order 1 Round...

經典位 #1
我地9個人, 佢竟然比張8人枱, 背住牆嘅一邊放5張椅, 椅貼椅, 完全冇隙縫, 都長過張枱半個身位, 試問叫人點坐???

經典位 #2
我地3個坐係最左手邊, D侍應將所有菜上係最右手邊, 試問叫人點夾o黎食??? 就算, 我比D侍應諗住唔想係貓兄同DD中間上菜, 佢都可以係DD身邊上菜吖!!! DD身邊當時都未有人坐!!!
最後要勞動到貓兄逐次叫D侍應將D菜拎過o黎我地呢邊擺... 我懷疑... 因而種下禍根...

~~~ Round 1 ~~~

刺身沙律唔錯, D沙律菜都幾新鮮... 壽司唔係話特別好食, 所以冇Re-Order, 以免浪費個胃嘅空間...