Ken & Merry 為食男女，遊走世界!!!

30 April 2011, Saturday

下星期日就係母親節, 我兩個英明嘅家姐一早就話提早D食飯慶祝, 唔使"迫餐死 + 勞餐死 + 趕餐死 + 貴餐死", 真係幾十年都唔覺佢地咁有頭腦, 哈哈...

乳豬(半隻)--雖然點睇都冇半隻, 不過主角"媽大人"大讚D皮好脆", 咁... 都值得嘅!!! 仲要隻豬又唔肥, 兼且有D肉食下, 仲幾好味添... 唔嫌呢十一片乳豬要二佰幾蚊嘅, 絕對可以一試~

沙薑雞(半隻)--都係果句, 點睇都冇半隻, 不過今晚個個心情大靚, 竟然冇人生事, 嘿... 真神奇!!! 隻雞味道都OK嘅~

炭燒片皮鴨--第一次見片皮鴨上埋對鴨脾, 抵讚!!! D鴨皮一D都唔肥, GOOD!!!

涼瓜炆片皮鴨(兩食)--都幾得喎, 炆得好入味, 仲要一D都唔肥喎, 抵讚~

上湯波士頓龍蝦伊麵--雖然隻龍蝦就細咗D, 不過今晚氣氛出奇地好, 大家都冇咩COMPLAINT... 伊麵真係冇咩機會掂到, 皆因2個姪女荷葉飯都唔食, 堅持要等食呢個伊麵, 仲點敢同佢地爭~

17 April 2011, Sunday

今日仲病病地, 加上會落雨, 所以冇得去行山, 唯有早D去大戶屋食個SET LUNCH, 然後早D返HOME休息~

今次個MENU轉咗, 多咗好多新野, 我就試下香草雞扒沙律... 嗯... 好味呀!!!  香草汁好香呀~ 雞扒又唔肥~ 夏天食呢個啱晒, 唔使食咁飽~

HONEY的白菜豬肉豆腐鍋... 都OK喎, 菜同肉同豆腐的比例相約, 清淡之選, 夏天食都幾適合~

食飽又到SHOPPING時間, 哈哈!!!

是次每人消費約$80元
味道： 4 環境： 4 服務： 4 衛生： 4 抵食： 5
###
地址 : 鰂魚涌康山道2號吉之島百貨L009地下
電話 : 2560 1991

31 March 2011, Thursday

今天的拉力早敍餐, 選址上一次食過番尋味嘅和光!!!

今次食8:15-10:15PM時段, 價錢貴了, 食物差了, 座位迫了, SERVICE少了... 難為我們為咗食佢, 挨咗一個鐘頭餓!!!

跟人頭送的刺身... 冇咩特別...

跟人頭送的肉眼扒... 不錯...

係現場都分唔清邊碟打邊碟, 總之通通都是牛...

牛胸腹仲未解凍好, 夾起成舊冰咁...

4 March 2011, Friday

同事L較早前提及有間新開嘅「乳酪雪糕」店, 好多人排隊, 叫我一齊去試食... 今日回暖咗小小, 食完LUNCH就走去昅昅, 真係企到出馬路呀!!!

如果要2種Toppings, 要成32蚊1杯, 都幾貴, 已經可以夠買個Lunch Box食飽飽...

左邊果杯係同事L嘅芒果 Mango, 綠茶糯米糍 Green Tea Mochi, 免費香脆碎 Free House Crumbs...
右邊果杯係我嘅荔枝 Lychee, 綠茶糯米糍 Green Tea Mochi, 免費香脆碎 Free House Crumbs...

綠茶糯米糍係Catalogue個樣係勁吸引嘅, 真身就一D綠茶粉都冇, 亦冇綠茶味...
芒果酸的...
荔枝好甜好Juicy, 同事L話肯定係浸糖水...
香脆碎冇咩味...

不過, 個「乳酪雪糕」本身真係好滑!!! 味道微酸, 都幾正!!!

佢張傳單大字標題: -
* <飲食男女>專業評價: CRUMBS的乳酪雪糕軟滑得全無冰粒, 奶味清楚利落, 最出名是香脆碎, 而且同樣是$28, 起碼比別店多三分一, 分量十足!
* 連續40個星期榮登 <最多好評榜>三甲!
* 榮獲<新假期>頒發<2010全港必吃食店>大獎!

14 February 2011, Sunday (年十二)

今日係情人節呀!!! 祝大家情人節快樂!!! 我今晚一個人食牛肉肉丸粥+生菜咋... HONEY要返工呀...

回家途中, 睇怕佢都冇時間買禮物架啦, 自己幫佢預備埋啦, 最緊要記得找數比我就得啦, 呵呵呵呵~

Leonidas 心型朱古力, 4種味道! 慶祝情人節之餘, 同時可以做埋善事, 好有意義!

~ Leonidas 朱古力專門店 小檔案 ~

Confisterie Benji Ltd 被香港政府確認為社會企業，公司旗下Leonidas比利時新鮮朱古力專門店Leonidas Chocolates & Cafe 和青衣城 La Parole法國餐廳的所有收入扣除開支後，全數撥款支持庭恩兒童中心。庭恩兒童中心致力幫助低收入家庭有語言障礙的兒童，讓他門獲得適當治療，積極融入社會。

13 February 2011, Sunday (年十一)

今日E5的團拜日子, 又凍又落雨, 千里迢迢咁入到屯門, 竟然冇得同宇宙最強＠妹妹玩, 又冇得同勁舞DANCING豬＠妹妹玩, 我唔制呀))))))

感謝貓兄幫忙等位, 辛苦晒!!! 大時大節, 中午時段, 等位飲茶絕對係超難...

燒腩仔--都幾香脆, GOOD!!!

蘿蔔絲蝦餅--外表相當嚇人, 但味道都OK喎...

蝦腸--不錯...

炸兩--好似唔記得食...

12 February 2011, Saturday (年初十)

今日要預先慶祝一下情人節, 皆因HONEY之後兩日都忙...

想去Promenade 西餐廳 Promenade Restaurant食Tea Buffet, 可惜2:00PM已開始, 唔想蝕個半鐘比佢... 想去Pizza Express San Marzano食晚飯, 去到門口竟然比人包咗場... 呢間又唔好, 果間又唔想, 去到Simplylife Bakery Cafe排隊, 又話未夠鐘, 冇DINNER... 我就黎癲啦...

最好揀咗最就腳嘅千両!!!

炸豆腐--HONEY話好好食, 咋咋聲食晒...

厚燒甜蛋--賣飛佛, YUMMY!!!

鰻魚壽司--賣飛佛, YUMMY!!!

吉列炸蝦卷--肥嘟嘟嘅蝦, YUMMY!!!

11 February 2011, Friday (年初九)

今晚約咗我第一次坐飛機時認識嘅團友食晚飯... 都好多年前囉...

想當年, 剛剛出o黎社會做事, 想試下坐飛機去旅行, 比大家姐老點咗去印尼, 話HK$999, 唔使一千蚊, 好抵玩咁話喎... 當時嘅我, 都未知印尼有幾亂(離開後一星期總統夫人死咗, 發生大暴動), 膽粗粗就報咗名, 然後就係旅途上認識咗呢幾位妙齡少女(當年, 而家係師奶)... 至今都接近17年... 幾個對對方一無所知嘅女仔(當年, 而家係師奶), 今時今日仲可以一齊出o黎食飯, 無所不談, 簡直係奇蹟...

由於LUNCH剩係食咗1個魚柳包, 放工時餓到手震腳震, 所以搭車前要食番個蛋卷, 飲番包豆奶, 先有力出發... 間餐廳嘅入口比較難搵, 係樓下走咗幾個圈先搵到... 等咗一陣先齊人, 好彩預先打咗底, 如果唔係, 暈咗係街都似...

我地ORDER咗3人餐, 貪佢咩都有, 散叫隨時仲貴...

前菜8小碟--碟碟都咁好味, SALAD係出奇地好味囉...

烤雞肉--好好味呀, 又大大片, I LIKE IT!!!

烤牛肋骨肉--仲好味呀, 都係大大片, 讚讚讚!!!

5 February 2011, Saturday (年初三)

大年初三, 我姐姐有張'百老會'派嘅6折COUPON, 所以一行19人就去咗富豪九龍酒店嘅雅廊咖啡室食下午茶BUFFET...

由於我小病初癒, 所以都唔敢食咁多野...

芝士款式唔多, 味道... 可以啦...

蛋糕選擇不多... 味道... 可以啦...

熱盤都係冇咩選擇, 根據我妹妹嘅忠告, 只有以下幾款先好拎...

妹妹話D米線咬唔斷... 中午同北京回來過年嘅朋友飲茶, 佢啱啱講開國內有D用RECYCLE PLASTIC整嘅米粉係咬唔斷嘅... 嘩, 呢碗唔會就係傳聞中嘅米粉呀嘛...

1 February 2011, Tuesday

停BLOG一週, 皆因病咗成個禮拜... 所有同過年有關嘅準備功夫, 一切仍然維持係零...

到咗年廿九, 請咗半日假大掃除... 開工前, 當然要餵飽自己先啦...

呢間八月芳, 開業至今, 一直FULL BOOKING, 我地呢D玩即興嘅人, 次次都掃興而回... 今日都唔例外... 不過佢話12:30PM前還到枱比佢嘅話, 就比我地入去... 入座後... 越坐越後悔入咗去...

全間餐廳得一張2人枱, 係TOILET門口條通道加開嘅... D侍應不停拖D櫈出黎, 叠高十幾張, 每次都響我地'後腦怎'CHOK到搖搖晃晃, 因為係地鎛地拉上地毯中間有條鋼條, 前前後後搬咗幾次, 每次都睇到驚心動魄, 好驚比佢'擇'死...

全間餐廳得2枱客, 十幾廿個侍應, 揮晒手都冇人幫你落單, 幾經辛苦攔住一個服務員, 問佢有冇商務套餐嘅MENU, 佢把金口好矜貴, 開都唔開, 指住張6人/12人賀年餐牌就走咗去, 我地得2個人咋, 點食呀???

餐具睇落好正, 可惜筷子D金屬好'界'手, NO GOOD...

條氣已經CHOK到咩咁, 點知D食物嘅味道先最令人失望...

鳥籠點心, 個賣相都過得去, D味道真係...

三菇六耳餃--個樣個噁心, 加上係菇, 隊比HONEY食...
蝦餃--一個字, 鹹!!! 完全食唔出有蝦餃味!!!

26 January 2011, Wednesday

今晚又囍宴, 終於放棄食套餐, 散叫餸...

秘製鎮江骨(細)--味道OK, 可惜太多肥肉, 每一舊骨D肥肉有成2CMX2CM咁大, 仲要唔係五花腩果種一層肥一層廋, 實在難以吞落肚... 唯有咬走D肥肉先食...

欖菜肉鬆四季豆--第一啖, 好鹹呀... 第二啖, 好腥呀... HONEY食完仲胃痛, 我估D四季豆冇煮透, 所以有咁嘅情況出現...

大肚婆炒飯--炒得好乾身, 可惜冇咗之前食嘅香味...

早前嘅驚喜, 已經盡失!!! 如無意外, 我地暫時都唔會再黎... 估唔到, 今日終於帶咗隻SONY相機黎影靚相, 但係可能會係我地最後一次幫襯...

是次每人消費約$105元
味道： 2 環境： 4 服務：3 衛生： 3 抵食： 2
###

24 January 2011, Monday

和光燒肉放題... 已經想試超過2年... 只可惜, 黃埔分店交通實在太唔方便!!! 仲要只得2個時段選擇, 6-8PM 或 8-10PM... 6點, 未免太早啩... 8點, 食完又太夜... 所以一直都冇機會去到...

舊年發現佢係銅鑼灣開咗分店, 但冇緣份即係冇緣份, 一直都食唔到... 2011年, 緣份到!!!

我遲咗小小到, DD同無敵已經ORDER定成枱餸, 等我一到就有得食... 嘩... 場面未免太誇張啦... 未算!!! 呢度只係我地當晚所食嘅一小部分...

菠蘿青檬汁好正... 和光沙律都好新鮮, 仲係配我最愛嘅黑醋汁...

什錦刺身係贈送嘅...

燒日本南瓜幾OK, 燒京蔥好正...

20 January 2011, Thursday

Honey嘅朋友今日送咗盒榛子朱古力曲奇比佢, 原本冇咩期望, 因為想當年去北海道旅行, 導遊極力推介我地買呢隻牌子嘅朱古力薯片, 嘩, 一食落去, 又鹹又甜, 真係呻笨...

未打開之前, 我地係度打賭入面有幾多塊曲奇, 我估8塊, 因為試過買D大大盒嘅日本手信, 一打開, 得果幾片, 用個大大嘅膠模一片片分開晒...

嘩!!! 估唔到有咁多塊... 好抵食呀...

味道真係Ichiban!!! 唔係一味喪甜, 而係淡淡嘅榛子味, 香濃嘅可可豆味, 塊曲奇仲好鬆脆, 好得呀!!! 真係食到唔停得口!!!

Royce Baton Cookies (Hazelnuts & Cacaonibs)... 拉姑極力推介!!!

17 January 2011, Monday

今晚少林食神帶我地去「稻菊」食日本菜... 坐低時象徵式睇下餐牌, 之後佢相熟嘅2位廚師就由廚房走出黎同佢打招呼, 跟手佢就比咗個BUDGET比師傅, 叫師傅幫佢安排一下, 所以我地一路食一路都唔知仲會有咩食... 咁大個女都係第一次咁食法...

天婦羅汁, 檸檬, 綠茶鹽, 幼海鹽--點小小綠茶鹽都夠味...

稻菊嘅天婦羅 (Tempura) 係必吃招牌菜, 選用優質芝麻油和棉花籽油, 用料新鮮, 即點即炸, 炸起嘅天婦羅又薄又脆 。師傅手藝更是一絕, 吸油紙上面, 一滴油都冇!!!

天婦羅目光魚(左) -- 鱭魚科, 又名"鳳尾魚", 俗稱"烤籽魚", 炸得外脆內Juicy, 完全冇骨, 好好味, 我二話不說吞晒落肚...
天婦羅竹蝦(右) -- 師傅將蝦頭炸到好似朵花咁, 好靚呀~ 蝦身又係粉薄又脆, 蝦肉一D都唔乾身, 一隻真係唔多夠喉...

天婦羅鰻魚 -- Ichiban!!! Oishii... 好好味嘅鰻魚, 皮脆肉嫩, 咬落啖啖肉, 仲滲出淡淡嘅鰻魚香, 好好食呀~ 我想1個人食晒成碟呀...

13 January 2011, Thursday

又又又又囍宴??? 係呀, 繼續報導埋個套餐邊樣好食, 邊樣唔好食呀嘛...

餐湯、口水雞、白飯... 通通唔影... 因為近排寫得太多...

仁稔酸薑糖芯皮蛋--唔係好得, 皮蛋有輕微我怕怕嘅怪味... 酸薑有根同埋小辣... 仁稔最可怕, 我咬咗4分1已經想吐, 以為自己有問題, 再咬多4分1, 真係頂唔順... HONEY仲利害, 咬咗4分1已經唔肯再食...

煲仔梅菜扣肉--好失望!!! 梅菜好多沙, 又唔夠梅菜味, 仲幾硬下... 扣肉唔夠淋唔夠入味... 成煲野仲唔係好熱, 正常煲仔菜會辣嘴o架嘛...

今晚個餐湯更加完全無可能係燉湯...

今晚個口水雞叫咗小辣, 結果係勁辣...

今晚食物真係跌晒WATT... 都要等一排睇定D先好再去...

是次每人消費約$125元
味道： 2 環境： 4 服務：3 衛生： 3 抵食： 2
###

3 January 2011, Monday

又囍宴??? 係呀, 因為個套餐太抵食, 所以又去試埋其他配搭...

餐湯--越來越唔似燉湯, 誠意分銳減...

前菜--情人果--泰國青芒果, 酸咪咪, 好開胃...

主菜--口水雞--因為只有4款魚+4款雞選擇, 係唔想加錢, 又唔想食白切雞嘅情況底下, 唯有繼續口水雞... 絕對濃味...

煲仔菜--蛋黃肉--雖然係煲仔菜套餐, 不過都好多味唔係煲仔菜, 味道偏甜, 不妨一試...

白飯要另外ORDER... 不收茶芥... 都算抵食啦... 開張時覺得佢好貴, 又食唔飽, 不過而家週圍都狂加價, 得佢減價, 所以我地個飯堂唔可以唔加埋佢... 

5 January 2011, Wednesday

又輪到一月之星壽宴啦喂!!!

我地討論緊鹿鳴春有咩好食, 大家都冇咩印象, 咁我呀走去我D舊BLOG (鹿鳴春飯店 Spring Deer)度朗讀出黎, 結果比貓兄話"呢D先係BLOG架嘛, 你而家果D, 咁短, 叫我點比回應"... 哈哈哈... 懶咗呀嘛, 個人又冇記性咗, 產量又多咗, D質數緊係要偷薄D架啦... 

流沙餃(湯餃)--蕃茄薯仔餡, 好特別, 值得一試...

梅菜餃(煎餃)--好好味呀, I Like It!!!

香煎芋蓉餅--嘩!!! 好KAWAII呀!!! 成個日式鯛魚燒咁呀!!!

咕嚕竹--好得呀!!! 酸酸甜甜, D腐竹又整到好實, 咬落去好實在, 讚!!!

11 December 2010, Saturday

Honey有時會去理工大學CANTEEN食飯, 佢話有間南北小廚好抵食, 成日叫我去試下...

餐湯--OK...

松子魚--坦白講, 冇咩肉, 同埋... 唔好味囉... 不過, 以咁嘅價錢可以食魚, 的確係抵到冇人有...

蜜糖豆炒牛柳絲--味道都OK喎, 份量都唔算細...

茄子煲--味道都OK嘅...

味道唔講得上好好味, 但係一人都唔使70蚊, 有餸有湯有飯有菜有糖水, 仲想點呀...

23 December 2010, Thursday

自從上次試過個八折套餐好得之後, 而家成日心郁郁想去囍宴食飯... 今晚繼續幫襯八折套餐, 不過試下唔同餸菜...

腐皮大豆芽--都OK...

話梅花鵰雞--好得!!! 如果酒味更濃會更好...

鹹魚炒芥蘭--味道偏淡... 同埋D菜都幾硬, 如果可以批咗D皮先炒, 更就Very Good喇...

白飯--冇咩特別, 係想影下個幾粒白芝麻啫, 呀哈哈哈~

今次又係玩即興, 冇帶相機, 希望下次會記得帶啦...

2 January 2010, Sunday

今日原本想行山, 不過臨出門口都係覺得太凍, 即時改軚去飲茶同睇戲...

週圍都勁多人等位, 鍾菜算係小D人, 但都要等成粒鐘...

安蝦咸水角--中規中矩...

排骨陳村粉--好味呀!!! 仲唔油, GOOD!!!

棗茸糕拼馬拉糕--棗茸糕一向係我至愛, 竟然可以叫一個點心就食晒2樣野, 抵讚!!!

XO醬炒年糕--個樣成個肉絲炒年糕咁, 個WAITER堅持係XO醬炒年糕... 唯有食落口試下... 咦... 又真係有XO味架喎... 都幾特別呀, 唔錯...