Ken & Merry 為食男女，遊走世界!!!

12 June 2011, Sunday

開業超過6年嘅「哈魯邦韓國料理 Harubang Korean Restaurant」, 今年初裝修後改咗名... 「名家韓國餐廳 Myung Ga Korean Restaurant」!!!

舊年去完東歐咳到半死爬去食KaKaMa生日宴, 正正就係「名家」(iSquare), 又會咁橋嘅, 居然開到o黎太古城!!!

餐廳只係裝修咗外牆, 餐廳內並冇大變動... D韓國侍應大部分都冇變, 都係熟口熟面, 唯一變嘅係, 佢地由唔識講中文變到而家好流利...

就算得2個人, 都有前菜6小碟!!!

黑豆--好香好甜, 好濃郁嘅豆味, 正到痺!!! 黑豆營養豐富, 高蛋白、維生素同多種礦物質, 食多D都冇有怕!!!
黃芽白--居然用麵豉醬醃, 好好味呀, 我一向唔鐘意食黃芽白, 今日大開眼界!!!
鵪鶉蛋--鹵水好入味, 正!!!

改咗名之後, 以前只有Weekday先供應嘅牛肋骨Set Lunch, 而家連星期日都供應, 太太太好啦!!!

紅炆牛肋骨--必吃Set Lunch之一!!! 牛肋骨炆得好軟綿綿, 入口即溶, 而且啖啖肉, 好足料, 超值!!! 紅蘿蔔同白蘿蔔炆到淋晒入晒味, 超甜!!! 呢個餐配珍珠白飯, 超讚!!!

石頭鍋飯--都係必吃Set Lunch之一!!! 辣醬可以因應自己嘅能力落多落少, 侍應會幫你撈勻, 鐘意食飯蕉嘅朋友, 可以放一陣先撈勻... 我就覺得落2個Spoon最香最好味, 唔落會少咗D靈魂咁...
個石頭鍋標榜係用JangSu出產嘅石頭同土壤制成, 快速均勻傳熱!!!

餐後果--好橙!!!

白蘿蔔餐湯都係好足料, 味道清清淡淡, 配濃味嘅飯餸一流!!!

睇番以前嘅Blog, 原來佢D Set Lunch由2007年到而家, 1蚊都冇加過價, 唔係啩, 簡直係超超超超超值呀!!!

唔信嘅朋友, 可以去睇睇...
哈魯邦韓國料理 Harubang Korean Restaurant
http://hk.myblog.yahoo.com/ken-merry/article?mid=892

今時今日D茶餐廳, 就咁一個牛腩河, 水都冇杯, 零服務零環境, 都加到接近30蚊, 仲要係豬肉扮牛腩, 真係當D食客係傻o架!!!

呢度真材實料, 味道Keep住咁好味, 仲要係太古城, 5年都冇加價, 簡直同社會脫節, 比較之下, 即時變到超超超超超值!!!

鐘意食韓國菜嘅朋友, 萬勿錯過!!!

(哈哈哈, 好Hard Sell, 唔熟我嘅朋友一定會以為呢篇係廣告!!!)

是次每人消費約$88元
味道： 4 環境： 4 服務： 3 衛生： 3 抵食： 4
###
地址 : 太古城太古城道20號元宮閣G402-03舖
電話 : 2539-6398