31 July 2012, Tuesday

足足2個月先寫好晒今年歐遊嘅Blog, 未試過咁慢... 皆因今年實在太忙, 又要寫食評, 又要玩微型粘土... 一度失去動力繼續寫旅遊Blog...

如果你問10個去過意大利嘅朋友, 有9個都會講到言之鑿鑿意大利d賊有幾狼, 係強搶, 唔係偷... 聽得多都心慌慌...

做足準備, 買定個斜孭袋同肚腩袋...

身處意大利時, 發覺唔係真係咁恐怖, 起碼冇出現電單車友扯背包場面... 係有d貌似小手嘅人出現, 但冇比機會佢埋身... 加上我地又著得寒酸呢, 一睇就知週身冇蚊(Money)啦, 仲窮過d賊咁, 嘩哈哈哈~

安全離開意大利, Yeah!!!

去到瑞士, 安心指數提高, 連導遊都膽大包天, 居然帶團友出去行夜街, 証明瑞士真係好安全...

去到法國, o黎料啦!!!

治安黑點 1) 塞納河船河

我地遲上船, d孖位已經比人坐晒...

相中白色衫男士將佢件外套放係椅上, 係果d自命有修養嘅外國人之中, 實屬少見... 所以我懷疑佢有份設局... 我地示意想坐, 佢望一望我地, 拎起件外套...

我當時都覺得好奇怪, 咁多人都仲搵唔到位, 冇理由咁筍比我地搵到孖位...

我右邊上唔到鏡條女, 全程反轉身, Dum低頭, 長髮披面, 扒係張椅上扮瞓...

我身後白色衫條女, 全程, 不下數十次, 用我Pat Pat幫佢抺鞋, 我覺得好嘔心之餘, 仲覺得好唔合衛生, 我條清新乾淨嘅褲唔係比你抺鞋o架!!!

我初時以為佢伸直隻腳時唔小心掂到我, 我有輕輕向後瞄, 佢即停, 隔一陣又再狂抺, 我只要個頭輕輕向後擰少少, 佢又會即停, 隔一陣又再狂抺, 重複十次以上...

我將自己個Pat Pat向前移, 理論上, 有張椅擋住, 冇理由仲可以踢到我, 結果佢都係要繼續抺鞋, 由抺我Pat Pat下方, 變成抺我Pat Pat後方... 好討厭呀!!!

我開始斷定佢地係賊, 最少4人以上嘅組織(白衫女有同坐佢右邊條女傾計), 我地之所以咁好彩有孖位, 係因為佢地揀中咗我地做獵物!!! 我地已經被重重包圍啦!!!

為咗阻嚇佢, 我扮晒舉高相機玩自拍, 影完又影, 專登影晒佢地d樣, 以防萬一要去警局認人都有張相做證嘛...

佢停咗一陣, 又再重施故技, 船上面d人開始走去唔同位置影相, 前2排有位Free出o黎, 我地即時調位!!! 終於擺脫嘔心抺鞋黨!!!

事後同導遊講返, 佢話佢都見到船上好多可疑人物, 比幾蚊坐足一日, 又唔係觀光, 仲見到佢地同船員似係有默契...

我話我條褲都冇袋, 銀包都唔係放係褲後袋, 都唔知佢"了"咩... 導遊話佢地想引開我注意力, 咁坐我右邊反轉身扮瞓條女就可以落手... 好彩, 我就算擰轉頭望, 都交叉手抱實個斜孭袋係心口, 基本上佢冇機會掂到...

大家去塞納河船河的話, 記得要提防吓啦!!!


治安黑店 2) 巴黎鐵塔

巴黎鐵塔上面個「提防小手」警告牌, 仲大過張A4紙, 使唔使咁大呀?!! 証明呢度係治安黑點!!! 都幾多一家幾口嘅組織, 坐埋一邊, 唔係觀光o架喎, 週圍打量正在專心觀光嘅遊客... 估計佢地帶住嘅細路, 係佢地嘅生財工具之一...


治安黑店 3) 百貨公司

尾2果日, 朝早去完羅浮宮, 食埋個團餐, 導遊就帶大家由餐廳步行去百貨公司... 由於落緊雨, 大家要分心分手去拎遮, d路又窄又長, 百貨公司門外嘅通道迫滿人群, 仲要睇實導遊行咗去邊, 過馬路時, 就係最佳落手時機!!!

我地成團人係老佛爺門口過馬路, 有扒手伸手入團友姨姨個斜孭袋, 全團最後生嘅小妹妹(都19年歲)見狀, 二話不說, 伸手去提住個扒手隻手, 大力Fing開佢!!!

嘩!!! 好堅呀妹妹你!!! 經此一役, 真係對妹妹刮目相看!!! 佢媽打都話估唔到阿女咁堅, 冇話受驚唔知點算好, 冇話搵父母求救, 居然咁勇敢咁果斷, 出手拯救團友姨姨!!!

你媽打真係以你為榮, 佢起碼可以d親戚朋友講故講足3-4年!!!

團友姨姨話要請阿妹飲咖啡, 阿妹都話唔要, 話係應該咁做嘅!!! 阿妹, 你真係好有修養, 比個好市民獎你!!! 比多個好媽媽獎你媽打, 教導出咁好嘅女兒!!!

團結精神

之前一晚難得係市區住, 仲要酒店係正巴黎鐵塔隔離, 團友們又點會甘心留係酒店虛渡光陰呀... 但係d人講到巴黎治安咁恐怖, 夜麻麻走出街真係幾危險, 搶錢事少, 最驚好似電影情節咁拮你一刀... 結果... 一大班心野人, 自發相約上房放好行李後, 係Lobby集合一齊行出去!!! 導遊今晚冇同我地癲喇~ 最後數齊有14個人, 大家出發前仲喊口號「1個都不能少」, 果一刻覺得好Touching, 大家只係識咗幾日就咁團結, 每過一次馬路, 或者街角轉角位, 都會停低重新點好人數先再向前行... 感謝大家, 沿途有你, 我感到無比嘅溫暖, Pound of You All!!!

總結

總之都係果句, 出門旅行, 大家都要十萬個小心自己嘅財物!!! 以免成為賊人嘅點心!!! 唔見錢事小, 唔見Passport就麻煩喇~

同埋, 今次遇到嘅賊都係妙齡白人少女, 一般人對呢個組別嘅人戒心都特別低, 增加中招機會!!! 大家要記住啦, 呢份職業, 係無分國籍、年齡、性別o架!!!
arrow
arrow
    全站熱搜

    kenmerry 拉姑 發表在 痞客邦 留言(0) 人氣()