Ken & Merry 為食男女，遊走世界!!!

上星期六(2008年1月5日)一眾姊妹剎去荃灣如心同龍媽賀壽... (去之前仲同貓頭去一轉karaoke先)

酒店裡面個環境係唔錯嘅, 好似d hip hotel咁... 食物就... 之前一日睇網評好似幾麻麻咁, 所以去到唔敢食魚生同刺身同阿拉斯加蟹腳...

. 沙律 : 一般;
. 燒吞拿魚都唔錯, 煙三文魚都ok, 龍蝦仔一隻夠晒, 蕃茄芝士d芝士真係麻麻地;
. 白汁焗魚柳算比較好, 羊扒都合格, 隻炸蠔食完都唔知食咗d乜, 最好味係條蒸魚(食咗先醒起要影相, 哈哈)
. 鐵板燒大蝦 : 一開始切, d肉已經散, 一放入口, 想即刻吐番出o黎, 當然最後都吞咗落肚... 個汁仲騎呢, 唔落好過...

. 甜品選擇都算小...
. 個焗蛋白算比較好食, 但得幾粒, 鑽媽再出去拎已經冇晒; 朱古力蛋糕同法式燉蛋都ok, 都係一陣就冇; 個coffee杯反而幾香濃
. 豆腐花ok; jelly杯都ok(冇可能唔ok); 雪糕係papagallo(唯一驚喜), 有4-5隻味, of course yummy啦!

飲品自助bar度有橙汁, 咖啡茶, 檸水, 等供應!

仲有燒珍寶蠔同翡翠螺, 你睇, 幾大隻!!! (我冇食呀, 隻蠔由鑽媽提供)

點知, 話口未完, 暈妮個隻(左)仲大, 大過隻碟, 勁!!! 不過長頸鹿個隻(右)都唔弱!!!

臨走前去一轉toilet, 嘔... 好臭呀, 估計有2人同時大緊(total得4格), 貓頭頂唔順閃咗, 我長途車唯有死頂... 同網評所講一樣(食完魚生即刻開2轉)!!!

是次每人消費約$305元
味道： 2 環境： 4 服務： 3 衛生： 3 抵食： 1
戰鬥指數

###
地址 : 荃灣楊屋道8號香港如心海景酒店9樓
電話 : 2280 2898