Ken & Merry 為食男女，遊走世界!!!

2 September 2010, Thursday (續)

通常每次出門, 導遊都會恐嚇你當地海關點嚴點麻煩... 但最後真係到過海關時, 都係輕輕鬆鬆...

自從各國嘅機場限制離境旅客係手提行李攜帶液體、凝膠及噴霧類物品之後, 我都係帶住相中左邊個Crabtree & Evelyn透明塑膠袋上飛機, 裝住D Hand Cream呀眼藥水呀咁, 從無甩拖...

東歐呀, 西歐呀, 大板呀, 東京呀, 泰國呀, 都係用佢...

點知...

今次係沖繩離境竟然話唔得, 唔係呀嘛???

個後生仔驗屍咁驗粉紅色嘅部分, 之後話唔得, 我同佢理論, 佢就問個中年男人, 最後都話唔得, 迫我買咗相中右邊個密實袋, 大拿拿30YEN呀呀呀...

乜日本經濟真係咁差咩??? 連我30YEN都掠??? 定係嫌我係日本洗得太小YEN呀???

香港機場D離境海關唔單止唔CARE我個膠袋有粉紅色, 仲試過叫我放番個膠袋入手袋, 唔使放出黎...

德國機場D離境海關仲寬鬆, 有個鬼妹成個化妝箱咁過X光機, 完全冇用透明塑膠袋入好D液體/凝膠/噴霧, 而且佢個箱放咗勁多野, D容器亦唔止100毫升, D關員都冇迫佢買密實袋, 仲逐件化妝品幫佢再過X光機...