Ken & Merry 為食男女，遊走世界!!!

20 December 2010, Monday  

之前少林食神帶我地去完桃花源小廚 Tim's Kitchen同Olala搵食之後, 真係食過番尋味... 今次佢再邀請我地一齊去連續三年都係《米芝蓮指南》(Michelin Guide)上榜嘅富豪飯堂「福臨門」進膳...

照舊係由佢係唔使睇餐牌嘅情況下落Order, 由於佢係熟客, 所以都好好Service... 仲開咗壺私家茶--紫茶(95年嘅生普洱)--比我地品嚐, 真係幾好飲, 唔似平時D普洱咁黑蚊蚊...

酸薑皮蛋--D酸薑好好味呀!!! 唔辣又冇根, 要用5-6月份嘅子薑先可以做到咁嘅效果, 聽講剩係供應比佢、鏞記酒家、大班樓... 皮蛋好好味, 冇皮蛋果D怪味, 我平時唔鐘意食皮蛋, 今晚都食到唔停得口...

椒鹽田雞脾--好好好味呀!!! 比平時食到嘅多肉好多, D肉又嫩, D骨仲好細, 上枱熱辣辣, 好正呀!!!

老火湯--D材料好似有成10種, 好夠味, 最利害係, 煲完D豬肉依然好味, 仲要成碗湯1滴油都冇, Very Good呀!!!

羊腩煲+唐蒿--超超超好味!!! 羊腩起晒肥膏, 3斤起剩1斤, 好彈牙, 又唔硬, 好得呀!!! 我自己一個人食咗半煲, 哈哈哈~

脆皮炸子雞--又一好味之作, 平時我食雞一定唔食皮, 但係今晚食晒, 因為佢真係一D肥膏都冇, 肉嫩多汁, 好有雞味, 正正正!!!

馬仔--好重蛋味, 又唔粘牙, 好正呀!!!
合桃露--好重合桃味, 重有粒粒合桃碎, Good!!!
美點雙輝--少林食神話可以不理, 不過我包咗返屋企做宵夜, 我都覺得好好味喎, 皆因紅豆係我至愛, 佢香得o黎又唔會過甜, 正!!!

今晚呢一餐我照滿意!!!

原本我地今晚係想去大班樓, 不過FULL咗, 去稻菊又驚唔夠時間慢慢嘆, 希望下次有機會去啦~

是次每人消費約$540元
味道： 5 環境： 5 服務： 5 衛生： 5 抵食： 2
###
地址 : 尖沙咀金巴利道53號8號舖1樓
電話 : 2366 0286