Ken & Merry 為食男女，遊走世界!!!

22 May 2011, Sunday

是日紅雨, 搵食唔去得遠, 最後決定去番半年前發現嘅新飯堂... 那霸!!!

午餐有接近20款選擇, 緊有一款啱你心水!!!

午餐沙律及前菜--苦瓜蕃茄沙律好新鮮, 一D苦味都冇, 配埋沙律醬好好味... 凍豆腐好有豆味...

涼瓜炒豬肉--每次都要食呢一味!!! 涼瓜完全唔苦, 配埋豬肉同豆腐同蛋醬, 仲覺得甜添呀...

香蔥牛肉卷--天氣太熱, 標晒汗, 所以唔叫必吃嘅牛肉豆腐鍋啦... 今日試下叫香蔥牛肉卷, 都好好味喎, D蔥炒得好香呀, 配埋薄牛肉, 好好味呀... 仲要配菜係沙律, 正...

服務很好, 每次奉上餐飲前都會抺枱, 而且女服務員連我地次次都係飲熱柚子蜜都記得, 利害!!! 環境都好寧靜, 坐得好舒服... 食物亦好足料... 拉姑誠意推介!!!

是次每人消費約$100元
味道： 4 環境： 4 服務： 4 衛生： 4 抵食： 3
###
地址 : 太古太古城第10期耀星閣地下G1015號店
電話 : 2186 6969