潮庭 Chiuchow Garden－Ken & Merry 為食男女，遊走世界!!!

27 September 2011, Tuesday

食完「龍景軒 Lung Keen Hing」, 睇埋「作死不離3兄弟 3 Idiots」, 仲有咩節目??? 咪都係食囉...

懶得四圍走, 所以都係響太古城食... 諗住一係食凍蟹, 再唔係就食龍蝦... 最終凍蟹勝出!!! 所以揀咗去之前食過幾次嘅「潮庭 Chiuchow Garden」...

餐牌話...「咱家潮州鮮凍大花蟹... 時價」... 即係要搵個人問吓啦... 唔該...

侍: 1,200蚊... 「A級」就抵食D囉... (好鹹唔淡嘅廣東話) (最緊要, 冇提幾大隻or幾重)
拉: (心諗) (A級抵食D??? 咁B級同C級又幾錢呀???)
侍: Blah Blah Blah... (高速地講一堆唔知咩話)
拉: (忟忟地) 我完全聽唔明你講咩!!!!!!

最後... 問咗好多次, 聽到眉頭都皺晒, 先聯想到所謂嘅「A級就抵食D囉」, 其實係「AE卡就抵食D囉」因為有50% Discount!!! 之前o黎食過, 所以知道AE白金卡好似係有Discount...

明明600蚊1隻凍蟹, 居然標到1200蚊咁買, 你覺得我會唔會食吖??? 當然係唔會啦!!! 響美X酒樓集團用1200蚊食1隻唔知幾重, 唔知好唔好食嘅凍蟹??? 我驚我講出o黎都比人笑啦!!! 決定唔食!!!

好百年鹵水鵝片--鵝片有腥味, 可能係雪味, 我唔係好識分...

甘苦涼瓜排骨煲--今晚鹹咗少少... D苦瓜就OK冇苦味... 太飽食唔落D排骨... D湯照舊飲晒...

潮州人家煎鯧魚件--Very Nice!!! 好魚油呀!!! 刀法如神, 將條魚Cut開1半再攤開, 表面睇好似好大條咁...

紅梅子梅羔醬烤骨(送)--恆生卡食滿300蚊免費送, 好似係加1蚊送, 唔記得啦... 原本以為送嘅一定麻麻地, 點知佢竟然幾好味喎, 仲要有幾粒係五花腩o黎o架!!!

食完條魚, 放埋過隔離枱, 過咗15分鐘都冇人埋o黎收碟... 大家睇吓, 間餐廳入面冇咩客o架咋, 正所謂服務員多過客, 有2個服務員Keep住響我面前翹起雙手響心口咁行o黎行去, 似監考多過似侍應... 我真係頂唔緊, 影低咗條魚骨... 再過咗10-15分鐘, 終於有個操純正廣東話嘅妹妹行埋o黎問我碟魚係咪唔要, 咦... 好生面口喎... 收碟都咁, 全晚當然係冇換過碟啦, 懶理你堆滿晒排骨定魚骨...