Ken & Merry 為食男女，遊走世界!!!

14 November 2011, Monday

今日肉酸生日, 有拉力早同佢賀壽, 認真星光熠熠... 可惜最後早兄不敵病魔, 要留家休養...

路過上次間「峇里園印尼餐廳」, 見到入面得幾丁客, 如果我地上次食係咁就好啦...

o黎到「陣屋」門口, 見到件護甲好有型呀!!! 我地3個人坐6人卡位, 勁寬敞, 而且餐廳唔多客, 好寧靜, 我地可以暢所欲言...


餐牌好似好多o野揀咁... 揀咗好耐, 終於落到單啦...

三文魚親子飯(陣屋迷你飯)--真係好迷你呀!!!!!! D魚生尚算新鮮...


什锦刺身3種--甜蝦有D腥, 三文魚OK, 帶子都唔錯...


(左上) 鹽燒蘆筍豬肉串, 芝士燒免冶雞肉串, 汁燒安格斯牛肉串--蘆筍豬肉串都幾清新, 唔錯... 免冶雞肉串都OK, 安格斯牛肉串好得...
(右上) 炸芝士年糕--好好味呀!!! 我地放咗好耐先食, 好香芝士味, 軟綿綿熱辣辣, 點D BB醬感覺冇咁膩...
(左下) 蒜片炒雞腎--雞腎有D腥, 食1粒就怕怕...
(右下) 迷你蕃薯天婦羅--味道OK甜喎, 外層薄脆, 內裡軟熟, 不過個樣好似... 咦... (反胃-ing)


D食物碟碟都咁的骰, 食完第1 ROUND, 好似咩都冇落過肚咁... 點搞... 唔通等陣真係要去麥當當整個"足3兩"???

好, 第2 ROUND!!!

赤麵豉湯鍋燒烏冬--嘩!!! 又係咁細碗嘅... 不過好味喎個湯底... 等我返屋企都試吓用赤麵豉煮烏冬先...


照燒雞薄餅--嘩!!! PIZZA都係咁細嘅... 直徑同部手機差不多... 點食得飽呀??? 味道都只係OK程度...


我地一路大大聲話食唔飽, 又話唔知自己前世係咪耕田, 點解可以咁食得... 唔知係咪廚師聽到, 所以燒魷魚嘅SIZE終於變番正常...

原隻魷魚燒--好好味呀!!! 外皮有少少燒焦, 好香口... 魷魚好彈牙, 仲好有魷魚味, ICHIBAN呀!!! 食完隻魷魚終於覺得冇咁餓, 不過同"飽"仲有一段距離...
 

肉酸話好彩早兄冇o黎, 如果唔係, 我地成個餐牌食一轉都唔會飽...

食唔飽... 唯有轉戰甜品... 用我部新出嘅iPhone 4S搵吓附近有咩甜品食先... 呵呵呵呵~

是次每人消費約$190元
味道： 3 環境： 4 服務： 3 衛生： 3 抵食： 3
###
地址 : 旺角太子道西193號新世紀廣場8樓802號舖
電話 : 2393 8355