繼22、24、25、26號嘅幾輪狂食之後, 尋日(2007年12月27日)lunch已經唔多消化, 淨係食咗一碗粥, 因為夜晚仲要... 同幾個細妹(早, 力力, 肉酸)去日航博剎!!!

 

12月5號打電話去週圍book位都full晒, 唔係講緊平個d, 而係半島、洲際、都會海逸個d! 日航更係打咗成日都唔通, 好彩, 係我地放棄之際, 終於比我打通咗, 仲要有位個隻, 嗚嗚嗚嗚... 實在太好彩啦!!!

 

而且仲安排我地坐自成一角嘅圓梳化位, 但又勁近buffet枱, 點影相同傾計都唔會嘈到人啦, 嘻嘻...

 

æ燒大蝦--好好味架;

聖誕甜品--好苦呀, 細個睇醫生d藥水味呀... 朱古力蛋糕--好好味;

焗蠔--幾好味, 羊扒--一流, 唔係個胃唔舒服嘅話, 起碼食半打;

Cold Cut (拎拎下, 電話響, 唯有返埋個位先... ) -- 除咗三文魚餅有d腥, 其他都好好味;


æ刺身--好新鮮;

蘇油餅配咖哩--一流, 花生醬薄餅--超超超超好食;

甜品--件件極品, 但最正係咖啡法式燉蛋, 完美嘅化身! 其次係tirumisu(勁重酒味, 正) 同埋 芒果pancake卷(超正芒果味)! 仲有個朱古力香桃蛋糕, 味道係... 一流!!!


仲食咗個紅豆沙, 唔太甜, 勁多沙, 食完飽到上心口!!!

 


其實我仲飲咗中湯同食咗個意式沙律, 不過食得太快, 唔記得咗影相, 哈哈... 沙律bar真係唔錯, 除咗有傳統3種醬汁, 竟然仲有我至愛嘅橄欖油同黑醋, 值得一讚!!!

 

好耐未食過咁好食嘅buffet, 仲有好多野食架, 係我食唔落喳, 例如天婦羅, 關東煮, 牛肉shabu shabu, 雪糕, 沙冰, 即制pancake, 生果, 多款熱盆, 真係數都數唔晒, 咁嘅價錢, 聖誕節喎, 我比90分!!!


食完就黎個交換禮物環節, 我今年大豐收, 收到Yellow Christmas腳趾襪(好得意架), 大蝦天婦羅mouse手枕兼screen mate, crabtree抺手紙, 大口仔碗筷, 呵呵呵呵... 多謝咁多位妹子, 年初一... 我識做架啦!


之後仲去咗睇燈飾同影相, 好多年未試過啦, 即刻成個人後生晒, 嘩哈哈哈...

 



是次每人消費約$340元
味道: 4 環境: 4 服務: 4 衛生: 4 抵食: 4



###

地址 : 尖沙咀麼地道72號香港日航酒店
電話 : 2313-4222

創作者介紹
創作者 kenmerry 拉姑 的頭像
kenmerry 拉姑

Ken & Merry 為食男女,遊走世界!!!

kenmerry 拉姑 發表在 痞客邦 留言(3) 人氣()


留言列表 (3)

發表留言
  • JAN
  • 好豐富! 好一個開心而又滿足既聖誕!
    真令人羨慕!
     
  • Nicole
  • 你們一家人都較喜歡到日航博 剎 不過這個價錢都萛合理, 可能你們不是正日去食
  • dd913
  • bar,出年9月之星唔洗煩啦!