Ken & Merry 為食男女，遊走世界!!!

5 April 2010, Monday

復活節假期第4日... 仍然冇節目...

上網呆遊一輪後, 突然靈機一觸, 醒起2010年勇奪米芝蓮一星嘅鹵水專門店, 事不宜遲, 即刻出發...

經的士司機一輪超級大兜路之後, 我地終於係13:24到達, 竟然13:32已經有得入, 等咗10分鐘都冇... 咦... 電視訪問又話要等粒幾兩粒鐘先有得入嘅...

呢個告示真係超級搞笑!!! 不過唔好以為佢誇張, 店內人手真係嚴重不足, 樓面得老闆娘同1個大嬸睇晒6張枱24個位... 個大嬸嘅待客之道係"將4隻手指深深插入4隻杯/碗內, 等所有人都可以食到佢嘅手汗味"...

家庭式老火靚湯(必飲)(不加味精)--蕃茄薯仔豬月展湯, 比較精淡... 唔明點解餐牌印住"必飲"...

阿鴻鴨舌--辣味有叉鴨舌... 小小麻辣, 都幾好味...

鹵水鵝片併墨魚--鵝片幾淋, 墨魚好脆, 豆腐幾滑, 鹵水味好淡, 但係花椒八角嘅香味好濃...

蔡瀾撈麵--豬油+豉油皇+薑+蔥+京蔥+火腿茸上湯... 可以分3種食法... 就咁食, 清清地... 撈湯食, 好好味, 好香好鮮... 撈秘制辣椒油食, 好香好惹味...

秘制辣椒油--用呢個拌撈麵真係超超超超超級好味, 小辣但好惹味, 十份足料... 同枱嘅夫婦食完晒D麵先發現呢個醬, 睇得出男嘅好愔然, 呵呵呵呵...

個地好"扇"呀!!! 好似油淋淋咁, 我食飽去埋單時都比佢"扇"咗一野, 大肚婆們要提防一下...

是次每人消費約$90元
味道： 4 環境： 2 服務： 1 衛生： 1 抵食： 4
###
地址 : 北角和富道84-94號銀輝大廈地下4號舖
電話 : 2570 1108