6 December 2010, Monday

之前貓兄係「享樂」團購「ART JAM 2 for 1」嘅同時, 已經一併團購埋「iCook 聖誕甜品班」, 每位HK$128, 個半鐘, 一次過做4款聖誕甜品, 好抵玩咁喎...

出發前又係同Honey去彩雲軒嘆一盅兩件... 之後係觀塘地鐵站同貓兄會合... 教室位於工廠大廈內, 屬小班教學規模... 由玻璃窗(左)到大門口(右)就係得咁大o架啦...


呢張相係玩緊Sony嘅「一掃全景」功能, 可能唔係太多人有「一掃全景」嘅Concept, 所以我被鬧啦, 嗚嗚嗚嗚... (女助手大聲呼喊"可以影相, 但係唔可以影Video!!!")

我地報嘅係「聖誕甜品班A」, 包括以下4款聖誕甜品: -
1) 鮮檸檬蜜糖慕絲芭菲
2) 低脂豆腐芝士餅
3) 脆焦糖乳酪布甸
4) 玉桂脆糖酥

懷住興奮嘅心情上堂... 點知... 原來... 係冇得自己落手落腳做o架... 淨係睇阿Sir示範... Oh... 心情直插谷底... 返到屋企話比Honey聽之後, 佢就問"咁同睇Video有咩分別?!!"... 嗯... 有嘅... 睇Video冇得試食囉...

阿Sir首先示範點整「低脂豆腐芝士餅」... 然後係「脆焦糖乳酪布甸」... 繼而係「玉桂脆糖酥」... 最後係「鮮檸檬蜜糖慕絲芭菲」...

示範「玉桂脆糖酥」時, 阿女助手話今日咁小人(總共5個), 可以比大家出o黎感受下, 平時多人就唔得o架啦... 結果單人匹馬嘅國語小姐就舉手兼衝出去... 所以... 我都唔理得佢介唔介意比我影到佢對玉手喇, 哈哈...

「玉桂脆糖酥」制成品...

「低脂豆腐芝士餅」制成品...

到咗「鮮檸檬蜜糖慕絲芭菲」嘅最後步驟, 大家又可以親身體驗一下, 點樣放一層"罐頭生果", 又放一層慕絲, 又放一層"罐頭生果", 又放一層慕絲, 最後加小小"碎得很"穀物係面作為裝飾... 嗯... 相信呢個步驟一定係「親子課程」嘅皇牌, 極之適合讀緊幼稚園嘅KaKa同埋鑽鑽去體驗一下...

我的「鮮檸檬蜜糖慕絲芭菲」...

另一個體驗位... 「脆焦糖乳酪布甸」嘅最後步驟, 大家又可以親自加白沙糖係面, 然後用火槍燒焦D糖...

我的「脆焦糖乳酪布甸」...

課堂的尾聲除咗係試食時間, 亦係廣告時間... 除咗推銷食材同廚具, 連抺枱布都有示範... 非常全面...

課堂開始時, 當然有介紹阿Sir "Max Wu"有幾猛料... 可能我話晒都叫做跟過創意西點教室嘅Johnny Chan學整朱古力, 又跟過COUP KITCHEN嘅Alfred Cheung學整蛋糕, 所以... 對阿Sir嘅猛料... 冇咩感覺囉...

arrow
arrow
    全站熱搜

    kenmerry 拉姑 發表在 痞客邦 留言(5) 人氣()