close

12 June 2012, Tuesday

好興奮呀!!! 之前參加咗U Food食評Game, 選中咗我去U Food x 城市花園酒店 呈獻 米芝蓮得獎一星「粵」星級試食會, 今晚又有口福啦!!!

城市花園酒店「粵」中菜廳係2012年新晉"米芝蓮一星"食肆, 得獎名菜多羅羅, 包括旅發局2010年度「美食之最大賞」海鮮組金獎的「雪嶺紅梅映松露」, 及2011年「美食之最大賞」點心組金獎的「亮點」!!! 炙手可熱的名菜亦不少, 當中柚子脆蝦球及師傅炒香苗就係我的至愛!!!

餐廳為星級試食會間咗一間房, 房內放咗一張大圓枱, 落地玻璃外係一排翠綠嘅樹木, 空間感十足~

嘻嘻... 我嘅吉祥物每次一出場影「到此一遊」照都會引起一場哄動...

最驚喜係開餐前餐廳先送上小禮物, 居然係大廚自家制嘅XO醬!!! 嘩!!! 好開心呀!!! 呢度嘅XO醬超超超好食o架!!! 仲送咁大樽添, 出手好闊綽呀!!! 個袋仲靚到咁, 我已經同其他人「吱吱噚」, 話可以拎個袋o黎放電話同埋吉祥物...


好, 介紹吓今日嘅Tasting Highlights先... 係咪好心急呢~
. 「粵」四小碟
. 杏汁花膠燉蹄筋湯
. 紅梅蝦球
. 雪嶺紅梅映松露
. 北菇鮑汁扣鵝掌
. 龍井茶皇燻雞
. 鮑汁荷葉飯
. 雪蓮子五補茶

好豐富呀!!! 吞口水-ing... 鼓聲隨之而響起!!! (由我個肚傳出o黎, 哈哈)

各位食家先o黎一個自我介紹, 今晚有1位食家係第一次出席試食會, 另外2位就係上次「春日‧盛燕」下午茶自助餐試食會見過面, 佢地都話既緊張又興奮呀... 我明吖!!! 我第一次出席試食會時, 都緊張到全身僵硬呀!!! 大家So So咗一陣就齊人, 可以開餐啦, Yo Ho!!!

「粵」四小碟
蒜片和牛粒--和牛好好味, 軟腍冇根, 一口一粒, Size剛剛好, 和牛汁甜甜地, 平時食到嘅通常都只會伴蒜片, 今次伴上蔥條, 感覺特別美味~ 條蔥唔簡單o架, 每條蔥最香嘅部位就只得果幾寸o架咋~
蜜汁叉燒--肥廋比例2比8, 肉質軟腍, 味道濃淡得宜, 沉實的紅色, 應該唔會有太多色素, 可以放心食用...
脆皮素鵝--好味喎!!! 我係食肉獸, 一向好怕食素鵝, 因為試過嘅多數d皮都又肥又韌d餡又怪味, 呢度個皮好脆又唔油, d餡仲好好味, 讚!!!
柚子醋黑木耳--調味做得好好, 因為食完都唔知自己食咗菇...

杏汁花膠燉蹄筋湯--清澈嘅湯底, 完全冇渣, 煲得好好呀!!! 杏仁味超濃郁, 鐘意杏仁嘅朋友一定會愛上佢!!! 花膠好大片, 仲好厚肉呀, 軟綿綿咁, 每一口都充滿膠原蛋白, 姊妹們嘅欣物!!! 蹄筋煲完之後依然軟腍, 選料絕不馬虎~

紅梅蝦球--賣相實在精緻得有d過分, 咁靚叫人點捨得食呀!!! 蟹子好煙韌... 蝦球好爽脆... 嘩!!! 鋪係蝦球下面嘅, 居然係芥蘭度!!! 一條芥蘭只可以整到一條幾寸長嘅芥蘭度, 仲要挑選d最鮮嫩口嘅芥蘭, 老d嘅會太粗同埋好o鞋, 將莖去皮, 真係好花時間~

雪嶺紅梅映松露--得獎名菜, 賣相一等一!!! 一上枱即時引起一陣騷動, 攝影機嘅快門聲此起彼落... 冷靜落o黎, 先用眼睛去品嚐, 透明嘅玻璃杯, 透視出4個層次, 如同一杯藝術品, 外觀比較似甜品, 算唔算係份子料理呢?!!
底層嘅蛋白先蒸10分鐘至凝固, 然後加入菠菜汁蛋白再蒸10分鐘至凝固, 然後加入紅蘿蔔汁蛋白再蒸10分鐘至凝固, 行政總廚強調, 只要有液體蓋在已凝固的蛋白上, 蛋白便不會老... 好高深嘅學問呀!!! 最面層係東星斑, 中間夾咗花膠, 再配以黑松露, 好名貴呀!!! 靈感來自行政總廚拿手嘅懷舊菜...
個人最喜歡紅蘿蔔汁蛋白, 好強勁嘅紅蘿蔔味, 顏色又鮮艷...

北菇鮑汁扣鵝掌--鮑汁味道不俗, 鵝掌扣得軟腍, 北菇厚身, 小棠菜為求美觀走葉, 可以睇得出餐廳方面對食物嘅外觀要求嚴謹...

龍井茶皇燻雞--未見其雞, 先聞其味!!! 茶燻味充斥整個房間, 一眾食家紛紛讚好香!!! 掛住聽書, 進食時已經凍咗, 但係依然美味, 鹵水味濃, 好想食多幾件...

行政總廚正為大家詳細講解雪嶺紅梅映松露嘅制作竅門...

鮑汁荷葉飯--蝦米好香, 冬菇切丁, 鮑汁味同荷葉香完全滲入飯內, 以小蒸籠呈上, 賣相十分討好~ 個人比較鐘意師傅炒香苗嘅呢~

雪蓮子五補茶--"慢零"貓唔使再攀山涉水去搵天山雪蓮啦!!! 叫佢主人o黎食呢個甜品啦!!! 圓肉、紅棗、杞子、百合、雪蓮子... 樣樣都係寶, 入口清甜, 充滿膠質, 姊妹們, 唔使我多講, 你地都識得揀啦~

麥皮紫薯包--Tasting Menu以外嘅嚐試, 行政總廚私人醒嘅!!! 呢款包要係試食會2日後先至正式推出市場... 嘩!!! 咁我地今晚咪即係食咗「頭啖包」囉, 嘩咔咔咔... 有食家之後1日生日, 就當住呢籠包係壽包先啦, Happy Birthday to UUU...

齋睇麥皮就已經夠晒健康啦, 紫薯除咗香甜, 又多纖維, 而且仲唔係好似蓮蓉咁要落大量豬油去撈滑, 一眾食家明明一早就叫飽, 都可以鯨吞晒呢個包, 仲要齊齊讚好, 呢個包... 掂呀!!!


能夠同一班鐘意食嘅朋友一齊食咁豐富美味又滋補嘅晚餐, 身心上都好滿足呀!!! 席間除咗交換飲食心得, 仲交換埋旅遊心得... 

感謝U Food嘅邀請同埋城市花園酒店嘅款待!!!

舊年聖誕節同大除夕都係度食, 已經覺得好正, 今日再食依然美味, 希望佢可以再上一層樓, 同我一樣向二星級進發!!!

聖誕節2011 http://blog.yahoo.com/ken-merry/articles/798080
大除夕2011 http://blog.yahoo.com/ken-merry/articles/800240

是次每人消費約 N/A 元 (價值$493/位)
味道： 4 環境： 4 服務： 4 衛生： 5 抵食： 4
###
地址 : 北角城市花園道9號城市花園酒店1樓
電話 : 2806 4918
arrow
arrow
    全站熱搜

    kenmerry 拉姑 發表在 痞客邦 留言(4) 人氣()

    E-mail轉寄