10 July 2012, Tuesday

U Food今次嘅星級試食會, 係去位於九龍灣德福花園嘅德藝會, 一見到已經興奮不已... 多年前曾經係德藝會會員, 每星期總有幾日會係德藝會流連... 今日再有機會去, 感覺好似約咗老朋友食飯咁...

今晚有20個食家出席, 好利害呀!!! 可以講得上係人才濟濟, 星光熠熠...

嘻嘻... 指定動作... 吉祥物「到此一遊」照... 不過今次比較尷尬, 因為... 要走上台先影到, 好鬼矚目, 呀哈哈哈...


德藝會進行咗大規模翻新工程, 宴會廳煥然一新, 行入去有WoW一聲嘅感覺... 呢度... 真係我以前經常流連嘅德藝會?!!

四四方方嘅宴會廳, 特高樓底, 水晶吊燈, 極之適合擺酒席...


個台仲好靚呀!!! 係我最鐘意嘅紫色同白色呀!!! 仲有鑽媽最鐘意嘅樓梯呀!!!


嘩嘩嘩... 仲有公主專用嘅南瓜馬車呀!!! 好靚好浪漫呀!!! 如果可以著住晚禮服同Honey一齊坐係上面影相就好啦~ 簡直好似置身童話世界入面咁呀!!!


開餐前, 收到德藝會送比各位食家嘅神秘禮物... 免費1天貴賓會籍!!! 多謝晒呀!!! 近期日食夜食, 真係好需要做吓運動減肥啦~


好, 介紹吓今晚嘅Tasting Menu先...
. 香芒沙律船
. 燒汁海參條
. 消暑佛跳牆
. 嫣紅脆石斑
. 西紅柿焗原隻鮑魚
. 冬林百籽蝦
. 西施海皇泡飯
. 燒焗椰皇蛋白

係咪好豐富呢~

等候期間, 指定動作... 各位食家先o黎一個自我介紹!!! 今晚真係好多新知舊遇, 臨走時有見過一次嘅食家撲埋o黎, 問我係咪kenmerry, 真係有d受寵若驚, 跟住大家傾咗幾句, 就要道別啦, 希望下次嘅星級試食會可以再重遇, 傾耐少少啦~

好o野, 開餐啦!!!

香芒沙律船 -- 嘩!!! 好Kawaii呀!!! 我覺得造型好似龍蝦仔, 唔知你又覺得似d咩呢?!! 什果沙律同蛋黃醬(Mayonnaise)絕對係最佳拍擋, 清甜嘅火龍果, 微酸嘅芒果, 非常醒胃, 實屬前菜首選!!! 而且夏天以生果入饌, 清新又健康, 多吃亦無妨!!!


燒汁海參條 -- 嘩!!! 好香呀!!! 造型仲好靚呀!!! 材料好豐富呀, 除咗海參, 仲有蓮藕、茄子、蜜糖豆、紅色燈籠椒、黃色燈籠椒, 樣樣都係我最鐘意食o架, 條條都切到一樣大小, 剩係用眼睇已經覺得好好味!!! 燒汁味濃, 甜甜地, 同材料好夾, 好味呀!!!
 
消暑佛跳牆 -- 佛跳牆夏天飲會唔會太滋補呀?!! 放心啦, 大廚為咗令個湯清淡d, 專登走咗金華火腿, 加入竹蔗茅根, 配合傳統材料海參、花膠、螺頭、春雞、冬菇、杞子燉制而成, 材料十足, 滋潤養顏, 果然佛跳牆都可以消暑吖~

嫣紅脆石斑 -- 石斑蘸上脆漿同炸至金黃色...

切件後, , 以小杯盛載太廚精心炮製嘅醬汁, 包含了士多啤梨的嫣紅, 泰國雞醬的酸甜, 甘香醬的甘香... 原以為炸魚會又乾又硬又唔新鮮, 但係魚肉出奇地鮮嫩, 可見大廚掌握火喉嘅功力恰到好處!!! 蘸士多啤梨醬汁同吃會有一份清新嘅感覺, 但係唔蘸汁吃同樣可口~

西紅柿焗原隻鮑魚 -- 以原個蕃茄盛載著原隻鮑魚, 配以牛油果、洋葱、西芹, 拌入白汁, 鋪上芝士同焗, 外型討好到不得了, 上枱時大家都不禁嘩嘩聲... 來自澳洲嘅鮑魚, 爽口彈牙, 原隻運到, 由餐廳自己開殼, 保證新鮮... 同樣來自澳洲嘅白酒, 本身帶有甜味, 不需要加入太多糖調味... 白汁與配汁味道好夾, 但係同蕃茄唔係太夾...
 
冬林百籽蝦 -- 百籽蝦曾經係滿月酒嘅必備菜色, 經大廚舊菜新做, 搖身一變成為矝貴的菜色!!! 材料選用海中蝦, 伴上蟹籽, 以冬瓜鋪底, 配以夜香花... 夏天食冬瓜好有益o架, 可以清熱解毒... 夜香花外型美觀, 具幽蘭芳香, 有清熱明目嘅藥療效用o架... 呢味菜的確係夏至的清新之選~

西施海皇泡飯 -- 今晚嘅壓軸好戲... 材料有冬菜、蝦、帶子、冬菇、芝麻、菜段、蔥花、已經煮熟嘅白米飯...

由大廚李師傅親自出馬, 為各位食家即席示範烹調... 先煮沸雞湯, 再加入所有材料, 最後加入用200幾度嘅油炸成嘅脆米... 咋一聲... 完成!!!
 
煮好嘅泡飯要即刻食, 如果唔係d炸米就會腍晒o架啦~ 脆米又香又脆, 仲好味過飯焦... 雞湯味道甜美濃郁, 蝦肉同帶子鮮甜爽口, 好好味呀!!! 全晚最有驚喜!!! 我想添飯呀!!!

服務員分飯期間, 我地一眾食家趁呢個時候同大廚上台影咗張大合照~

燒焗椰皇蛋白 -- 嘩!!! 酥皮湯?!!

原個椰皇切去頂部, 注入蛋白後, 蓋上酥皮一齊燒焗... 打開酥皮, 見到雪一般嘅蛋白, WoW... 蛋白好滑溜, 滲出絲絲椰皇味, 好清甜, 好好味呀!!! 

原來好戲真係要壓軸o架, 全晚最好味嘅係西施海皇泡飯同埋燒焗椰皇蛋白!!!

飽餐後大廚李師傅再出o黎與一眾食家交流飲食心得, 李師傅強調烹調應該係根據有咩材料就煮咩... 呢樣我識, 日本嘅懷石料理都係不時不吃!!!

席間一邊享用美食, 一邊與各位食家談天說地, 雖然有好幾位食家係第一次見面, 但係感覺一點也不陌生, 因為... 大家都鐘意食吖嘛!!! 自然有講唔完嘅話題啦...

感謝U Food嘅邀請同埋德藝會嘅款待!!!

是次每人消費約 N/A 元 (價值$493/位)
味道： 3 環境： 4 服務： 4 衛生： 4 抵食： 3
###
地址 : 九龍灣德福花園P13-14號
電話 : 2148 7576
arrow
arrow
    全站熱搜

    kenmerry 拉姑 發表在 痞客邦 留言(2) 人氣()

    E-mail轉寄