22 January 2013, Tuesday

Cityview酒店對我o黎講, 可謂非常陌生, 初時仲擔心會好難搵, 原來一出地鐵站行幾步路就到, 非常極之超級方便, 難怪酒店內有不少中外旅客出入...


位於1樓的樂雅軒, 是酒店內唯一的中菜館...


餐廳為法國藍帶美食協會會員...


餐廳的色調為大紅, 甚有喜慶味道, 柚木家具與擺設均極具中國風味...


是夜老友食家請客, 非常豪氣, 菜色包括花龍蝦及鮑魚, 好名貴哦... 感謝您的款待哦... (眼泛淚光-ing)
 
先來一壺龍井... 茶味香濃, 惜不夠順滑... 開茶時與老友食家討論飲咩茶時, 佢話驚飲茶會失眠, 估唔到服務員有留心我地的對話, 回來時好細心咁幫佢斟熱水, 值得一讚...

金錢鳳肝帶子
-- 賣相不俗, 帶子鮮味, 爽口彈牙, 煎香了表面, 醬汁甜甜的... 分開一層一層食, 味道尚可, 如夾埋一齊食, 叉燒味道太搶, 蓋過了雞肝的味道... 麵包吸咗好多油, 閃令令的, 唔敢食... 堆砌成花的子薑味道太酸...


花龍蝦鮑魚金必多湯(半隻)
-- 睇返餐牌, 再睇返相, 先知道花龍蝦冇咗花... 龍蝦肉新鮮爽口, 鮑魚切成條狀, 鮮甜爽彈, 素翅冇咩味... 金必多湯勁似茶餐廳Set Lunch的白湯, 湯入面有勁多薑粒, 同忌廉湯底完全唔Match...

天白花菇伴七頭鮑魚
-- 鮑魚扣得入味, 非常軟腍, 切開時, 糖芯位啜實隻叉, 正!!! 伴菜居然用唐蒿, 入口非常幼嫩, 好味!!! 不過唐蒿陣味唔係人人受得住, 但我超Like... 花菇好巨型, 我隻花菇又厚又硬, 老友食家果隻就好軟腍, 水準不太平均...

豆酥焗鱈魚球
-- 好油膩!!! 食1件已經非常膩!!! 鱈魚厚身, 份量十足, 焗後仍然保持柔軟滑嫩, 豆酥味道又酥又香... 伴碟的西蘭花, 異常突兀, 唔加好過...


仙骨湯燉天津大白菜
-- 湯底好鹹, 大白菜冇味又多沙, 湯與菜味道夾唔埋, Sorry, 飲唔晒...


珍味糯米包
-- 賣相骨子, 精巧別緻... 餡料有花膠同鮑魚, 仲有少少瑤柱同東菇粒... 可惜糯米包唔香又冇味, 唔知係咪因為冇落花生同燒肉呢...


生磨合桃露小丸子
-- 生磨合桃露幼滑冇粗粒, 味道不太甜, 較為杰身, 不錯... 內裡超多小丸子, 可惜小丸子太腍, 完全唔煙韌, 麻麻地...





合時鮮果碟
-- 鮮果非常新鮮, 冇浸過糖水, 菠蘿有少少酸, 西瓜起沙少甜, 火龍果異常清淡... 時夜菜色賣相真係不敢恭維, 估唔到鮮果碟更是求其, 我將佢移動過, 大家可以想像吓2個眼睛+1個大鼻子, 嘿...

對我o黎講, 菜單設計有d問題... 因為全部都係極度難消化的食物... 龍蝦、鮑魚、糯米、湯丸... 食1樣都可能會出事, 果晚食晒4樣, 結果個胃好似比舊大石壓住, 免疫大軍半夜仲打咗一場硬仗...

服務一等一, 唔知係咪因為我地邊抄筆記邊拍照, 勁似神秘客, 令2位疑似高層全晚輪流提供服務...

全晚只有4枱客, 環境非常寧靜, 最適合老朋友叙舊, 傾計一流, 款客亦不失禮...

哈哈... 洗手間仲好乾淨o架...

是次每人消費約 N/A 元
味道: 3 環境: 4 服務: 4 衛生: 4 抵食: 3
###

地址 : 油麻地窩打老道23號城景國際1樓
電話 : 2783 3286
arrow
arrow
    全站熱搜

    kenmerry 拉姑 發表在 痞客邦 留言(0) 人氣()