5 May 2013, Sunday

由於去年年尾決戰「開飯」之顛, 分身不暇, 暫停學習2季1:12微型公仔屋迷你店舖課程, 內心非常痛苦, 幸好最後贏得iPhone5及$4000旅遊禮券及$1500現金, 總算無白白犧牲...

其實今季我要去澳洲旅行, 最少要走2堂, 都有少少擔心跟唔上進度, 但又驚唔報會的唔起心肝去完成之前未完成的功課, 所以最後都決定報名, 迫自己重新投入... 正所謂出外靠朋友, 得到示範單位的關照, 拉姑魚蛋檔順利開業, 托賴...

今次係我的第5個Course, 由於生疏了2季, 重新開始, 一切都非常陌生, 錯漏百出, 更一度導致失眠... 感激同學們的支持與鼓勵, 翌夜已非常好瞓... 有一班咁好的同學仔, 很感動, 我真的很幸運...

今次再來一個KERORO微型劇場!!!

KERORO X「微型公仔屋 の 迷你魚蛋檔 (Dollhouse Miniature の Fish Ball )」第8場TAKE 4... ACTION!!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
背景音樂 : 《沉思曲》Méditation from Thais (經常出現係粵語長片中的「悲傷」的小提琴配樂)
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Keroro Solo 獨白 :

香港租金太貴, 無力負擔, 鋌而走險, 轉行做走鬼檔!!!

好靚勁辣咖哩魚蛋啦喂))) 滑過BB塊面嘅豬腸粉啦喂)))

魚蛋、豬皮、蘿蔔、牛丸、墨魚丸、腸仔、魷魚, 全部6蚊1串!!! 
懷舊白腸粉、蔥花蝦米腸, 8蚊3條, 10蚊5條!!!
甜醬、辣椒油、麻醬、豉油, 自助, 任添!!!

熱辣辣... 好靚勁辣咖哩魚蛋啦喂)))


嘩咔咔咔... 無聊完畢!!! 多謝Keroro-San粉墨登場, 幫手睇檔剪豬腸粉!!!

魚蛋檔全相... 
 

堅持源用雞皮紙袋, 向白色手抽膠袋說"不"!!!

牛丸咁大粒的超巨型魚蛋!!!


雖然魚蛋Size做錯了, 墨丸又唔夠色又唔夠紋重做, 魷魚用錯色要重做, 腸粉唔夠蝦米用紅蘿蔔頂包, 勁辣魚蛋汁流咗過蝦米腸果邊... 一切一切蝦碌, 都推動我下一次要提高警覺, 小心翼翼做好d...

萬幸的是, 大家都幾滿意我的作品... 雖然我自己覺得做得唔夠好... 但係冇辦法喇, 三寶檔又要開始趕功課, 我只可以向前看了...

###  拉姑網上微型教室 ###

請大家先準備好樹脂粘土及各種工具...

** 重要聲明 ** 由於時間關係, 車仔已經預先準備好!!! (同Miss買的, 唔係我自己鬥木)


Step 1) 魚蛋, 牛丸, 墨魚丸

樹脂粘土, 泥黃色, 啡黑色, 白色, 搓成圓形, 以海綿打圈, 可以用竹籤串起, 待乾~

Step 2) 腸仔

樹脂粘土, 紅色, 搓成長形, 可以用竹籤串起, 待乾~

Step 3) 白蘿蔔

樹脂粘土, 白色, 搓成長形, 待乾, 滾切~

Step 4) 醬瓶

樹脂粘土, 無色, 搓成梯形...
樹脂粘土, 任何色, 壓平, 貼到瓶身上, 插入以同色樹脂粘土搓長的瓶嘴... 待乾~

 Step 5) 蔥花蝦米腸

樹脂粘土, 白色, 搓成長形, 壓平, 裁成長方形... 灑上蔥花及蝦米, 捲起, 待乾~


拉姑網上微型教室, 學歷、年齡、性別、國籍不限, 有興趣者皆可... 大家都立即一齊動手做啦, 埋位啦喂~

再次感謝我最敬重的老師, 悉心教授如此精美的魚蛋檔~
arrow
arrow
    全站熱搜

    kenmerry 拉姑 發表在 痞客邦 留言(9) 人氣()